ນະຄອນຫຼວງວຽງຈັນ, ວັນທີ 25 ມັງກອນ ປີ 2023, ກົມທະບຽນ ແລະ ຄຸ້ມຄອງວິສາຫະກິດ, ກະຊວງອຸດສາຫະກໍາ ແລະ ການຄ້າ ໄດ້ຈັດພິທີເປີດເວັບໄຊ໌ຖານຂໍ້ມູນ ລະບຽບການຂໍອະນຸຍາດດໍາເນີນທຸລະກິດ ເພື່ອຊ່ວຍພາກທຸລະກິດໃຫ້ສາມາດເຂົ້າເຖິງຂໍ້ມູນດ້ານລະບຽນການເພື່ອເລີ່ມຕົ້ນ ແລະ ດຳເນີນທຸລະກິດ ໄດ້ຢ່າງງ່າຍດາຍ ໃນ ສປປ ລາວ ພ້ອມທັງຍັງຊ່ວຍປັບປຸງສະພາບແວດລ້ອມການດຳເນີນທຸລະກິດໂດຍລວມ ແລະ ກະຕຸ້ນການລົງທຶນໃນປະເທດ.

       ເວັບໄຊ໌ຖານຂໍ້ມູນລະບຽບການຂໍອະນຸຍາດດຳເນີນທຸລະກິດໃນ ສປປ ລາວ www.bned.moic.gov.la ເປັນຖານເກັບກຳ ແລະ ສະໜອງຂໍ້ມູນທາງອອນລາຍກ່ຽວກັບໃບຂໍອະນຸຍາດ, ໃບອະນຸຍາດ, ໃບຍັ້ງຢືນ, ໃບອະນຸຍາດອື່ນໆທີ່ຕ້ອງໄດ້ຂໍຈາກຂະແໜງການ ແລະ ໜ່ວຍງານຮັບຜິດຊອບ ທີ່ບຸກຄົນຕ້ອງຂໍອະນຸຍາດເພື່ອເລີ່ມຕົ້ນ ແລະ ດໍາເນີນທຸລະກິດ ໃນ ສປປ ລາວ. ເອກະສານແຕ່ລະລາຍການທີ່ເຜີຍແຜ່ໃນເວັບໄຊ໌ລວມມີ: ຂໍ້ມູນທົ່ວໄປທີ່ລະບຸໃບອະນຸຍາດໃດໜຶ່ງ, ​ຂອບກົດໝາຍເພື່ອຂໍໃບອະນຸຍາດ ແລະ ຂັ້ນຕອນ, ເອກະສານທີ່ຈຳເປັນ ແລະ ຫຼັກຖານ,​ ວິທີການນໍາສະເໜີ ແລະ ຂໍ້ມູນການຕໍ່ອາຍຸໃບອະນຸຍາດ ແລະ ຄ່າໃຊ້ຈ່າຍຕ່າງໆ. ປະຈຸບັນ, ເວັບໄຊ໌ນີ້ ສັງລວມເອົາ 362 ລາຍການ ຈາກບັນດາກະຊວງທີ່ກ່ຽວຂ້ອງທັງໝົົດ ເຊິ່ງໃນນີ້ລວມມີໃບອະນຸຍາດດຳເນີນທຸລະກິດ ແລະ ໃບຍັ້ງຢືນຕ່າງໆ.

          ພິທີເປີດເວັບໄຊ໌ ໃນຄັ້ງນີ້ ເປັນປະທານໂດຍທ່ານ ນາງ ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ເຂົ້າຮ່ວມໂດຍຕົວແທນຈາກພາກລັດທີ່ກ່ຽວຂ້ອງ, ຜູ້ໃຫ້ທຶນ ແລະ ສະມາຄົມທຸລະກິດຕ່າງໆ.

         ˝ເວັບໄຊ໌ນີ້ ຈະຊ່ວຍໃຫ້ເຈົ້າຂອງທຸລະກິດ ແລະ ຜູ້ປະກອບການສາມາດເຂົ້າເຖິງຂໍ້ມູນທີ່ຈຳເປັນ ເພື່ອເອົາໃບຂໍອະນຸຍາດດຳເນີນທຸລະກິດ, ໃບອະນຸຍາດສ່ວນຫຼາຍ ແລະ ໃບຍັ້ງຢືນຕ່າງໆທາງອອນລາຍ ແລະ ກໍຈະຊ່ວຍໃຫ້ພາກທຸລະກິດປະຢັດຄ່າໃຊ້ຈ່າຍ ແລະ ເວລາໃຫ້ແທດເໝາະກັບລະບຽບກົດໝາຍ. ເວັບໄຊ໌ຖານຂໍ້ມູນໃໝ່ນີ້ ແມ່ນມີຄວາມສຳຄັນໃນການສ້າງສະພາບແວດລ້ອມຂອງການດຳເນີນທຸລະກິດທີ່ໂປ່ງໃສ ແລະ ໄປຕາມລະບຽບຂອງການດຳເນີນທຸລະກິດ” ກ່າວໂດຍ ທ່ານ ນາງ ຈັນສຸກ ແສງພະຈັນ.

        ເວັບໄຊ໌ຖານຂໍ້ມູນ ຈະມີຜົນຍາວນານ ແລະ ສະໜອງໂອກາດທີ່ດີໃນການປັບປຸງສະພາບການດຳເນີນທຸລະກິດ ແລະ ສ້າງຄວາມສຳພັນທີ່ດີຂຶ້ນລະຫວ່າງປະຊາຊົນ ແລະ ລັດຖະບານ, ສ້າງຄວາມເຊື່ອໝັ້ນ ແລະ ມີມູມມອງທີ່ດີຂຶ້ນຕໍ່ກັບການບໍລິການຂອງພາກລັດ.

         ເວັບໄຊ໌ຖານຂໍ້ມູນລະບຽບການຂໍອະນຸຍາດດຳເນີນທຸລະກິດໃນ ສປປ ລາວ ໄດ້ຮັບການສະໜັບສະໜູນໂດຍໂຄງການ LCT ທີ່ຖືກຈັດຕັ້ງປະຕິບັດໂດຍກະຊວງ ອຸດສາຫະກໍາ ແລະ ການຄ້າ ໂດຍໄດ້ຮັບການສະໜັບສະໜູນດ້ານວິຊາການ ແລະ ການເງິນຈາກທະນາຄານໂລກ ແລະ ສົມທົບທຶນເພີ່ມເຕີມຈາກປະເທດອົດສະຕາລີ, ໄອແລນ ແລະ ສະຫະລັດອາເມລິກາ. ໂຄງການດັ່ງກ່າວ ມີຈຸດປະສົງເພື່ອຫຼຸດຜ່ອນອຸປະສັກ ທີ່ກີດຂວາງຕໍ່ການຂະຫຍາຍຕົວຂອງພາກເອກະຊົນ ໂດຍຜ່ານການປັບປຸງສະພາບແວດລ້ອມດ້ານການດໍາເນີນທຸລະກິດ ແລະ ດ້ານລະບຽບການຕ່າງໆ, ຫຼຸດຜ່ອນຕົ້ນທຶນການຄ້າ ແລະ ເພີ່ມທະວີຄວາມສາມາດໃນການແຂ່ງຂັນຂອງພາກທຸລະກິດ.

ພາບ ໂດຍ: ໄພຄໍາອີ ວິໄລຄໍາ

ແຫ່ລງຂ່າວ:  ກົມທະບຽນ ແລະ ຄຸ້ມຄອງວິສາຫະກິດ ກະຊວງ ອຄ