ຕອນບ່າຍ ເວລາ 4 : 00 ໂມງ ຂອງວັນທີ 20 ກຸມພາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Li Chenyang, ຫົວໜ້າພະແນກການຄ້າ ແຂວງ ຢູນນານ ແຫ່ງ ສປ ຈີນ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລື ກ່ຽວກັບການເຄື່ອນໄຫວວຽກງານການຮ່ວມມື ລະຫວ່າງ ສປປ ລາວ ແລະ ແຂວງຢູນານ ໃນຕໍ່ໜ້າ, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 30 ທ່ານ.
ໃນໂອກາດພົບປະຄັ້ງນີ້ ທັງສອງຝ່າຍໄດ້ປຶກສາຫາລືຮ່ວມກັນ ກ່ຽວກັບວຽກງານການຮ່ວມມືຫຼາຍດ້ານ ຄື:ດ້ານການຄ້າ, ການລົງທຶນ ເພື່ອສົ່ງເສີມພັດທະນາພື້ນຖານໂຄງລ່າງ ໃຫ້ແກ່ ສປປ ລາວ ໃນໄລຍະຜ່ານມາ ແລະ ຕໍ່ໜ້າພ້ອມທັງ ປຶກສາຫາລື ແລະ ແລກປ່ຽນບົດຮຽນ ກ່ຽວກັບ ການຍົກລະດັບການຮ່ວມມືດ້ານການຄ້າສອງຝ່າຍ ເປັນຕົ້ນ ການຊຸກຍູ້ການສົ່ງອອກສິນຄ້າກະສິກຳຂອງ ລາວ ໄປ ສປ ຈີນ, ການເພີ້ມທະວີການຮ່ວມມືກ່ຽວກັບການຄ້າຂ້າມຊາຍແດນ ແລະ ການອຳນວຍຄວາມສະດວກໃນການຂົນສົ່ງສິນຄ້າຜ່ານແດນ.
ໃນນີ້ການຮ່ວມມືສ່ວນໃຫຍ່ແມ່ນຮູບແບບການຄ້າຊາຍແດນ (ໂດຍສະເພາະລາວ-ຢຸນນານ) ຊື່ງປະຕິບັດພາຍໃຕ້ຂອບສັນຍາການຄ້າເສລີ ອາຊຽນ-ຈີນ, ສັນຍາການຄ້າອາຊີ-ປາຊີຟິກ, ສັນຍາ RCEP; ສິນຄ້າໄດ້ຮັບບູລິມະສິດພິເສດ-ໂຄຕ້າ ແລະ ສິດທິພິເສດດ້ານອັດຕາພາສີນຳເຂົ້າ ເປັນຕົ້ນ ສິດທິພິເສດ 98% ຂອງລາຍການສິນຄ້າສົ່ງອອກທັງໝົດໄປ ສປ ຈີນ.ສິນຄ້າຫຼັກທີ່ ສປປ ລາວ ນໍາເຂົ້້າ ໃນປີ 2022 ປະກອບມີ: ອຸປະກອນກົນຈັກ (ນອກຈາກເຄື່ອງກົນຈັກພາຫະ ນະ), ເຄື່ອງໃຊ້ໄຟຟ້າ ແລະ ອຸປະກອນໄຟຟ້າ, ຊິ້ນສ່ວນອາໄຫຼ່ລົດ, ເຫລັກ ແລະ ເຫລັກກ້າ ແລະ ອື່ນໆ.
ສິນຄ້າຫຼັກທີ່ ສປປ ລາວ ສົ່ງອອກ ໃນປີ 2022 ປະກອບມີ: ຄຳປະສົມ, ຄຳແທ່ງ, ໝາກກ້ວຍ, ແຮ່ທອງ, ແຮ່ເຫລັກ, ຜະລິດຕະພັນໄມ້ ແລະ ເຟີນີເຈີ້, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ຝຸ່ນ(ປຸຍ), ຢາງພາລາ, ຫມາກໄມ້(ໝາກໂມ, ໝາກນອດ, ໝາກຂາມ) ແລະ ອື່ນໆ. ສປ ຈີນ ຖືເປັນຄູ່ຄ້າອັນດັບ 2 ຂອງ ສປປ ລາວ ຊຶ່ງເຫັນໄດ້ໃນໄລຍະ 5 (2018-2022) ທີ່ຜ່ານມາ ມູນຄ່າການຄ້າສອງຝ່າຍສາມາດບັນລຸໄດ້ 15,9 ຕື້ໂດລາ, ສະເລ່ຍເພີ້ມຂື້ນ 15,63%/ປີ. ມູນຄ່າສິນຄ້າການສົ່ງອອກ: 9.039 ລ້ານໂດລາສະຫະລັດ, ມູນຄ່າສິນຄ້າການນໍາເຂົ້າ: 6.895 ລ້ານໂດລາສະຫະລັດ.
ດ້ານການລົງທຶນນັບແຕ່ປີ 2008, ການລົງທຶນຂະແໜງກິດຈະການທົ່ວໄປມີຈຳນວນ 80.570 ຫົວໜ່ວຍ, ມີມູນຄ່າການລົງທຶນທັງໝົດປະມານ 477 ຕື້ໂດລາ (ຜູ້ລົງທຶນອັນດັບ 1) ແລະ ມີການລົງທຶນໃນກິດຈະການສຳປະທານ ແລະ ເຂດເສດຖະກິດພິເສດ ທັງໝົດ 921 ໂຄງການ ຊຶ່ງມີມູນຄ່າ 13,67 ຕື້ໂດລາ ຈັດເປັນ (ຜູ້ລົງທຶນອັນດັບ 1) .
ຂະແໜງການທີ່ມີມູນຄ່າການລົງທຶນຫຼາຍສຸດປະກອບມີ: ຂະແໜງກະສິກຳ, ປ່າໄມ້ ແລະ ການປະມົງ; ການຄ້າຂາຍຍົກ ແລະ ຂາຍຍ່ອຍ; ສ້ອມແປງລົດຍົນ ແລະ ລົດຈັກ; ການເຄື່ອນໄຫວດ້ານສາຍວິຊາຊີບ, ວິທະຍາສາດ ແລະ ເຕັກນິກ; ອຸດສາຫະກໍາ ແລະ ປຸງແຕ່ງ; ການກໍ່ສ້າງ ແລະ ຂະແໜງການເຄື່ອນໄຫວບໍລິການ ສະໜັບສະໜູນ ແລະ ຄຸ້ມຄອງບໍລິຫານ ແລະ ອື່ນໆ.
ການລົງທຶນດ້ານອຸດສາຫະກໍາປຸງແຕ່ງ ທີ່ເປັນຂະໜາດໃຫຍ່ຂອງນັກລົງທຶນຈີນ ເຊັ່ນ: ໂຮງງານກັ່ນນໍ້າມັນ ຂອງບໍລິສັດປີໂຕຣເຄມີ ຈໍາກັດ (Laopec) ຕັ້ງຢູ່ເຂດເສດຖະກິດກວມລວມໄຊເສດຖາ, ໂຮງງານຜະລິດເຫຍື້ອເຈັ້ຍ (ບໍລິສັດ ຊັນເປເປີ ຈໍາກັດ) ຕັ້ງຢູ່ເມືອງ ເຊໂປນ ແຂວງ ສະຫວັນນະເຂດ, ໂຮງງານຜະລິດຊີມັງ, ໂຮງງານຜະລິດເຫລັກເສັ້ນ ແລະ ເຫລັກຮູບປະພັນ, ໂຮງງານ ຜະລິດຢາປາບສັດຕູພືດ ແລະ ເຄມີພັນ (ບໍໍລິສັດ ເຕັກໂນໂລຊີຊີວະພາບລາວພັນທະມິດ ຈໍາກັດ) ຕັ້ງຢູ່ເມືອງປາກງື່ມ ນະຄອນຫຼວງວຽງຈັນ, ສູນຫັດຖະກໍາ ຫຼັກ 16 ແລະ ອື່ນໆ.
ການປຶກສາຫາລືຄັ້ງນີ້ ເພື່ອສະໜັບສະໜູນເປັນການຊອກຫາໂອກາດສົ່ງເສີມ ແລະ ຂະຫຍາຍການຮ່ວມມືທາງດ້ານ ອຸດສາຫະກຳ ແລະ ການຄ້າ ໃນຕໍ່ໜ້າຂອງສອງປະເທດ ໂດຍສະເພາະ ສປປ ລາວ ແລະ ການຄ້າແຂວງຢູນນາ ສປ ຈີນ.
ທ່ານ Li Chenyang, ຫົວໜ້າພະແນກການຄ້າ ແຂວງຢູນນານ ໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ແຂວງຢູນນານ ສປ ຈີນ ໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.
ພາບ-ຂ່າວ ໂດຍ: ໄພຄໍາອີ ສູນສະຖິຕິ ແລະ ຂໍ້ມູນຂ່າວສານ, ກະຊວງ ອຄ.
