ໃນຕອນເຊົ້າຂອງວັນທີ 07 ມີນາ 2023, ທີ່ກະຊວງອຸດສາຫະກຳ ແແລະ ການຄ້າ, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ (ຂັ້ນສູນກາງ) ເພື່ອສະຫຼຸບຖອດຖອນບົດຮຽນ ການຈັດຕັ້ງປະຕິບັດວຽກງານຂອງຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ປະຈຳປີ 2022 ແລະ ກຳນົດທິດທາງແຜນການຈຸດສຸມໃນປີ 2023. ໂດຍການໃຫ້ກຽດເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ, ທັງເປັນປະທານຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ໂດຍມີທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ທັງເປັນຮອງປະ ທານຜູ້ປະຈໍາການ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ຮອງລັດຖະມົນຕີກະຊວງການເງິນ, ບັນດາທ່ານຫົວໜ້າກົມ, ຮອງກົມ, ຫົວໜ້າພະແນກ, ຮອງຫົວໜ້າພະແນກ ໃນຄະນະຊີ້ນໍາ ແລະ ກອງເລຂາຊ່ວຍວຽກຄະນະຊີ້ນຳ ແລະ ບັນດາກົມອອ້ມຂ້າງກະຊວງອຸດສາຫະກໍາ ແລະ ການຄ້າ ລວມທັງໝົດ 60 ທ່ານ.

ກອງປະຊຸມຄັ້ງນີ້ ເປັນຄັ້ງທີ 04 ຂອງຄະນະ ແລະ ເປັນຄັ້ງທໍາອິດພາຍຫຼັງມີການປັບປຸງຈາກ ຂໍ້ຕົກລົງ 71/ນຍ, ລົງວັນທີ 06 ຕຸລາ 2017 ມາເປັນ 126/ນຍ, ລົງວັນທີ 08 ທັນວາ 2022  ເຊີ່ງກອງປະຊຸມໄດ້ຮັບຟັງການສະຫຼຸບລາຍງານຜົນການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ປະຈຳປີ 2022, ການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ການປະກອບຄຳຄິດຄຳເຫັນ ຂອງບັນດາຂະແໜງການ ຕໍ່ກັບການຈັດຕັ້ງປະຕິບັດ ວຽກງານຄຸ້ມຄອງລາຄາສິນຄ້າສິນຄ້າ ແລະ ຄ່າບໍລິການ ໄລຍະຜ່ານມາ ເພື່ອເປັນການຖອດຖອນບົດຮຽນ ແລະ ນຳໄປຈັດຕັ້ງປະຕິບັດໃນແຜນການຈຸດສຸມ ປີ 2023

ຜ່ານການປະກອບຄໍາຄິດເຫັນ ຢ່າງກົງໄປກົງມາຂອງຜູ້ເຂົ້າຮ່ວມກອງປະຊຸມ, ໃນຕອນທ້າຍ ທ່ານລັດຖະ ມົນຕີ ກະຊວງອຸດສາຫະກຳ ແລະ ການຄ້າ (ປະທານກອງປະຊຸມ) ໄດ້ສະຫຼຸບສັງລວມເນັ້ນໜັກບາງບັນຫາ ເຊັ່ນ: 1. ວຽກງານການຄຸ້ມຄອງລາຄາສິນຄ້າ ແລະ ຄ່າບໍລິການ ຖືເປັນບັນຫາສຳຄັນ ເພື່ອປະຕິບັດແນວທາງນະໂຍບາຍຂອງພັກ-ລັດ ໃນການຮັກສາສະຖຽນລະພາບດ້ານລາຄາ ເພື່ອເປັນການປົກປ້ອງຜູ້ຊົມໃຊ້ໃນການເລືອກຊື້ສິນຄ້າໃນລາຄາທີ່ສົມເຫດສົມຜົນ, ຜູ້ປະກອບການ ກໍສາມາດດຳເນີນທຸລະກິດໄດ້ຢ່າງຄ່ອງຕົວບົນພື້ນຖານການແຂ່ງຂັນທີ່ເປັນທຳ ແລະ ຮັກສາໄດ້ຜົນປະໂຫຍດລວມຂອງລັດ (03 ຜົນປະໂຫຍດ)  ໃນເງື່ອນໄຂທີ່ເສດຖະກິດຂອງປະເທດເຮົາມີຄວາມຫຍຸ້ງຍາກ ແລະ ລາຄາສິນຄ້າມີການເໜັງຕີງຫຼາຍ ສະພາແຫ່ງຊາດກໍໄດ້ຕິດຕາມຊຸກຍູ້ພາກລັດໃຫ້ມີຄວາມເອົາໃຈໃສ່ຕື່ມໃນການຄຸ້ມຄອງລາຄາສິນຄ້າ ເພື່ອຊອກວິທີທາງແກ້ໄຂບັນຫາດັ່ງກ່າວ; 2. ບັນດາຂະແໜງການທີ່ຢູ່ໃນຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ນັບແຕ່ຂັ້ນສູນກາງ ຮອດທ້ອງຖິ່ນ ຕ້ອງໄດ້ເພີ່ມທະວີຄວາມເປັນເຈົ້າການໃນການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ທີ່ຂະແໜງການຕົນຮັບຜິດຊອບ ໂດຍສະເພາະລາຍການສິນຄ້າຄວບຄຸມ (ບັນຊີ ກ) ແລະ ລາຍການສິນຄ້າຕິດຕາມການເໜັງຕີງຂອງລາຄາ (ບັນຊີ ຂ); 3. ບັນດາຂະແໜງການ ຕ້ອງໄດ້ເອົາໃຈໃສ່ໃນການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ຕາມສິດ, ໜ້າທີ່ ແລະ ພາລະບົດບາດ ໃນຂະແໜງການຂອງຕົນ ຕາມທີ່ໄດ້ກຳນົດໄວ້ໃນ ມາດຕາ 17 ຂອງດຳລັດວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ສະບັບເລກທີ 474/ນຍ, ລົງວັນທີ 18 ພະຈິກ 2010. ພ້ອມທັງເຜີຍແຜ່ແນະນໍາ, ຊຸກຍູ້ ແລະ  ຕິດຕາມປະເມີນຜົນ ວຽກງານດັ່ງກ່າວ ຢູ່ໃນແຕ່ລະຂະແໜງ ການ ຂັ້ນສູນກາງ ແລະ ຂັ້ນທ້ອງຖິ່ນ; ແລະ 4. ເອົາໃຈໃສ່ຍົກລະດັບ ຂອດການປະສານງານລະຫວ່າງຂະແໜງການພາຍໃນຄະນະຊີ້ນຳວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ຕາມຂໍ້ຕົກລົງ 126/ນຍ, ລົງວັນທີ 08 ທັນວາ 2022 ໃຫ້ມີຄວາມກົມກຽວ ແລະ ເປັນເອກະພາບສູງໃນການຮ່ວມມື ສະໜອງຂໍ້ມູນຂ່າວສານໃຫ້ມີຄວາມຊັດເຈນ ແລະ ທັນກັບສະພາບການ ໃນການຈັດຕັ້ງປະຕິບັດວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ໃຫ້ໄດ້ຮັບປະສິດທິພາບສູງ

ຂ່າວ-ພາບ: ທ ໄພວັນ ໂຄດວັນທາ