ຕອນເຊົ້າ ເວລາ 9: 00ໂມງ ຂອງວັນທີ 10 ມີນາ 2023 ທີ່ໂຮງແຮມແລນມາກ, ນະຄອນຫຼວງວຽງຈັນ, ເພື່ອສະເຫຼີມສະຫຼອງວັນແມ່ຍິງສາກົນ, ກະຊວງ ອຸດສາຫະກຳ ແລະ ການຄ້າ ຮ່ວມກັບສະມາຄົມນັກທຸລະກິດຍິງ ໄດ້ຈັດງານສົນທະນາ ພາຍໃຕ້ຫົວ ຂໍ້ “ການກ້າວເຂົ້າສູ່ຂະແໜງທຸລະກິດ ທີ່ມີຜູ້ຊາຍເຮັດເປັນຫຼັກ”. ງານສົນທະນາດັ່ງກ່າວມີຈຸດປະສົງເພື່ອສ້າງຄວາມເຂົ້າໃຈ ກ່ຽວກັບອຸປະສັກທີ່ພົ້ນເດັ່ນທີ່ຜູ້ປະກອບການຍິງຕ້ອງປະເຊີນ ແລະ ສ້າງຄວາມຮັບຮູ້ກ່ຽວກັບບົດບາດຂອງຜູ້ນຳທີ່ເປັນແມ່ຍິງໃນຂະແໜງ ທຸລະກິດທີ່ຜູ້ຊາຍເຮັດເປັນຫຼັກນັ້ນ ໄດ້ຊ່ວຍເສດຖະກິດແນວໃດ ພາຍຫຼັງການແຜ່ລະບາດຂອງພະຍາດໂຄວິດ19.
ໃນສປປ ລາວ, ຜູ້ປະກອບການຍິງ ມີທ່າອ່ຽງທີ່ຈະສຸມໃສ່ໃນວິສາຫະກິດຂະໜາດນ້ອຍກວ່າ, ສ່ວນຫຼາຍຈະສຸມຢູ່ໃນຂົງເຂດການບໍລິການ ກະຈາຍທົ່ວປະເທດລາວ ເຊີ່ງມີຈຳນວນໜ້ອຍທີ່ມີການປະກອບທຸລະກິດທາງດ້ານການຄ້າ ໃນຂະນະທີ່ຜູ້ຊາຍມີແນວໂນ້ມທີ່ຈະສຸມໃສ່ຂະແໜງການກໍ່ສ້າງ, ການຂົນສົ່ງ ແລະ ຄຸ້ມຄອງສາງ, ໄຟຟ້າ, ບໍ່ແຮ່ ແລະ ອື່ນໆ ເຊີ່ງແມ່ນວິສາຫະກິດຂະໜາດກາງ ແລະ ໃຫຍ່ ແລະ ມັກເປັນຂະແໜງການທຸລະກິດທີ່ມີລາຍໄດ້ສູງ.
ໃນງານສົນທະນາ, ທ່ານນາງ ຈັນສຸກ ແສງພະຈັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວວ່າ ຮອດເວລາແລ້ວທີ່ຈະຕ້ອງໄດ້ຮັບຮູ້ຄວາມສຳເລັດ ແລະ ການປະກອບສ່ວນ ຂອງແມ່ຍິງໃນທຸກຂະແໜງການ ແລະ ໃຫ້ຄວາມສຳຄັນຕໍ່ການມີສ່ວນຮ່ວມຢ່າງເຕັມທີ່ຂອງແມ່ຍິງ ໃນຂະແໜງການຕ່າງໆ. “ພວກເຮົາຈະຕ້ອງໄດ້ທັບມ້າງ ຄວາມຄິດແບບລຳອຽງເຊິ່ງເປັນສິ່ງກີດຂວາງ ຕໍ່ສັກກະພາບຂອງແມ່ຍິງ ທີ່ຈະກ້າວເຂົ້າສູ່ ຂະແໜງທຸລະກິດ ທີ່ມີຜູ້ຊາຍເຮັດເປັນຫຼັກ.”
ໃນຂະນະທີ່ກ່າວເຖິງຄວາມສຳຄັນຂອງການນຳໃຊ້ແນວທາງແບບຄົບຊຸດໃນການສົ່ງເສີມການສ້າງ ຄວາມເຂັ້ມແຂງດ້ານເສດຖະກິດຂອງແມ່ຍິງ, ທ່ານນາງ ຈັນທະຈອນ ວົງໄຊ, ປະທານສະມາຄົມ ນັກທຸລະກິດຍິງ ໄດ້ເນັ້ນໜັກຕື່ມວ່າ “ພວກເຮົາຈຳເປັນຕ້ອງປ່ຽນແປງນະໂຍບາຍທາງເສດຖະກິດ, ກົດໝາຍ ຫຼື ລະບຽບການ ພ້ອມກັບທັດສະນະຄະຕິ ແລະ ຄ່ານິຍົມທາງສັງຄົມ.”
ທ່ານ ນາງ ວຽງຊຳ ອິນດາວົງ, ຜູ້ຈັດການວຽກງານສື່ສານພາຍນອກ ແລະ ສົ່ງເສີມການມີສ່ວນຮ່ວມ ຂອງ ອະດີດນັກສຶກສາອົດສະຕຣາລີ, ຈາກສະຖາບັນລາວ-ອົດສະຕຣາລີ ເປັນຜູ້ດຳເນີນ ການສົນທະນາ ໃນເທື່ອນີ້ ເຊິ່ງ ຈະບອກເລົ່າເລື່ອງລາວ ເສັ້ນທາງຄວາມສຳເລັດຂອງ 4 ນັກທຸລະກິດຍິງ ທີ່ຕໍ່ສູ້ເພື່ອກ້າວເຂົ້າສູ່ທຸລະກິດຂະແໜງທີ່ສ່ວນໃຫຍ່ແມ່ນຜູ້ຊາຍເປັນຫຼັກ ເຊີ່ງທຸລະກິດເຫຼົ່ານີ້ປະກອບມີທຸລະກິດປະເພດ ນຳເຂົ້າ-ສົ່ງອອກ, ໂຮງຈັກໂຮງງານ, ທີ່ປຶກສາດ້ານວິສະວະກຳ ແລະ ທຸລະກິດປະເພດກວດສອບ/ຢັ້ງຢືນຄຸນນະພາບຂອງລະບົບ. ຜູ້ບັນຍາຍ ປະກອບມີ ທ່ານນາງ ສີຣິພອນ ພັນທະວົງສ, ຜູ້ອຳນວຍການ ບໍລິສັດວິຊາການໄຟຟ້າ, ໂຍທາ ແລະ ກົນຈັກລາວ, ທ່ານ ນາງ ບຸນຮຽງ ພົມມີໄຊ, ຜູ້ອຳນວຍການບໍລິສັດ ຈຳປາຫອມ ການຄ້າ ຂາອອກ-ຂາເຂົ້າ, ທ່ານນາງ ສີວິໄລ ຣາຊະຈັກ, ຜູ້ອຳນວຍການບໍລີສັດ ເອັມອາ ທີ່ປຶກສາມາດຕະຖານສາກົນ, ທ່ານນາງ ວິດາລີ ຈັນທະຜາສຸກ, ຮອງປະທານບໍລິສັດ ເອັສຊີ ອອກແບບ ແລະ ກໍ່ສ້າງ ເຊິ່ງພວກນາງເປັນຜູ້ທີ່ໄດ້ກ້າວເຂົ້າສູ່ຂະແໜງທຸລະກິດທີ່ຜູ້ຊາຍເຮັດເປັນຫຼັກ. ງານສົນທະນາໃນຄັ້ງນີ້ ເຂົ້າຮ່ວມໂດຍຕົວແທນຈາກພາກລັດທີ່ກ່ຽວຂ້ອງ, ຄູ່ຮ່ວມພັດທະນາ ແລະ ສະມາຄົມທຸລະກິດຕ່າງໆ.
ງານສົນທະນາຄັ້ງນີ້ໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມມາດໃນການແຂ່ງຂັນ ແລະ ການຄ້າ (LCT) ທີ່ຖືກຈັດຕັ້ງປະຕິບັດໂດຍກະຊວງ ອຸດສາຫະກໍາ ແລະ ການຄ້າ ໂດຍໄດ້ຮັບການສະໜັບສະໜູນດ້ານວິຊາການ ແລະ ການເງິນຈາກທະນາຄານໂລກ ແລະ ສົມທົບທຶນເພີ່ມເຕີມຈາກປະເທດອົດສະຕາລີ, ໄອແລນ ແລະ ສະຫະລັດອາເມລິກາ. ໂຄງການດັ່ງກ່າວ ມີຈຸດປະສົງເພື່ອຫຼຸດຜ່ອນອຸປະສັກ ທີ່ກີດຂວາງການຂະຫຍາຍຕົວຂອງພາກເອກະຊົນ ໂດຍຜ່ານການປັບປຸງສະພາບແວດລ້ອມດ້ານການດໍາເນີນທຸລະກິດ ແລະ ດ້ານລະບຽບການຕ່າງໆ, ຫຼຸດຜ່ອນຕົ້ນທຶນການຄ້າ ແລະ ເພີ່ມທະວີຄວາມສາມາດໃນການແຂ່ງຂັນຂອງພາກທຸລະກິດ.
ຂ່າວ-ພາບ: ໄພຄໍາອີ ວິໄລຄໍາ ສູນສະຖິຕິ ແລະ ຂໍ້ມູນຂ່າວສານ. ກຜຮ/ກະຊວງ ອຄ.
