ຕອນບ່າຍເວລາ 01:30 ໂມງ ຂອງວັນທີ 10 ເມສາ 2023 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຸດສາຫະກໍາ ແລະ ການຄ້າ ໄດ້ຈັດກອງປະຊຸມໂຄສະນາ-ປາຖະກະຖາ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 68ປີ, ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບຮອບ 77ປີ ແລະ ມູນເຊື້ອວັນສ້າງຕັ້ງອົງການກວດກາພັກ-ລັດ ຄົບຮອບ 41ປີ ມີບັນດາສະຫາຍຄະນະພັກ-ຄະນະນໍາກະຊວງ, ບັນດາເລຂາຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານຫຼັກແຫຼ່ງ ແລະ ວິຊາການ ສັງກັດຢູ່ບັນດາໜ່ວຍພັກທົ່ວອົງຄະນະພັກ ກະຊວງ ອຄ ເຂົ້າຮ່ວມທັງໝົດປະມານ 250 ສະຫາຍ. 
ກອງປະຊຸມຄັ້ງນີ້ ພາຍໃຕ້ການເປັນປະທານ ຂອງສະຫາຍ ພຸດທະວັນ ນັນທະວົງ, ຄະນະປະຈໍາພັກ, ປະທານຄະນະກວດກາພັກ, ຫົວໜ້າກົມກວດກາ ໂດຍໃຫ້ກຽດເຜີຍແຜ່ເອກະສານສາມເນື້ອໃນສໍາຄັນຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 68ປີ, ວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບຮອບ 77ປີ ແລະ ມູນເຊື້ອວັນສ້າງຕັ້ງອົງການກວດກາພັກ-ລັດ ຄົບຮອບ 41ປີ; ພ້ອມດຽວກັນນີ້ ຜູ້ເຂົ້າຮ່ວມຍັງໄດ້ຮັບຊົມວິດີໂອ ຫວນຄືນຂະບວນວິວັດການຂະຫຍາຍຕົວ ແລະ ມູນເຊື້ອປະຫວັດສາດຂອງສາມວັນສໍາຄັນນີ້; ໂດຍມີຈຸດປະສົງໃຫ້ບັນດາຜູ້ເຂົ້າຮ່ວມທັງໝົດສາມາດກໍາໄດ້ເນື້ອໃນຈິດໃຈຂອງກອງປະຊຸມຄັ້ງນີ້ ນໍາໄປຜັນຂະຫຍາຍ ແລະ ຈັດຕັ້ງປະຕິບັດວຽກງານຂອງຂະແໜງ ອຄ ໃຫ້ປະກົດຜົນເປັນຈິງໃນຕໍ່ໜ້າ.
ຂ່າວ-ພາບໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
