ຕອນບ່າຍຂອງວັນທີ 5 ພຶດສະພາ 2023 ຜ່ານມາ, ທີ່ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມ ຄົບຄະນະສະໄໝສາມັນ ຄັ້ງທີ 5 ຂອງຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ ສະໄໝ V, ປະຈໍາໄຕມາດ I ປີ 2023 ໂດຍການເປັນປະທານ ຂອງ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານ ພັກກະຊວງອຸດສາຫະກໍາ ແລະ ການຄ້າ ຜູ້ເຂົ້າຮ່ວມມີບັນດາສະຫາຍ ຄະນະບໍລິຫານງານພັກ ອຄ ແລະ ບັນດາສະຫາຍເລຂາ, ຄະນະໜ່ວຍພັກ, ຫົວໜ້າກົມ ແລະ ສະຖາບັນ ອ້ອມຂ້າງອົງຄະນະພັກ ອຄ.
ຈຸດປະສົງກອງປະຊຸມຄັ້ງນີ້ ເພື່ອສະຫຼຸບຕີລາຄາ ແລະ ຖອດຖອນບົດຮຽນໃນການຈັດຕັ້ງປະຕິບັດວຽກງານໃນໄລຍະ 3 ເດືອນ ຕົ້ນປີ 2023 ທີ່ຜ່ານມາ ແລະ ເປັນການວາງແຜນການເຄື່ອນໄຫວວຽກງານລະອຽດ ຂອງແຕ່ລະໜ່ວຍພັກອ້ອມຂ້າງ ກໍຄືຂອງຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ ໃນຕໍ່ໜ້າ; ຊຶ່ງກອງປະຊຸມຈະໄດ້ຜ່ານເນື້ອໃນຮ່າງບົດສະຫຼຸບການນໍາພາ-ຊີ້ນຳ ປະຈຳໄຕມາດ I ແລະ ທິດທາງຈຸດສຸມ ປະຈໍາໄຕມາດ II ປີ 2023 ແລະ ຜ່ານເນື້ອໃນຮ່າງບົດສະຫຼຸບການຈັດຕັ້ງປະຕິບັດແຜນພັດທະນາອຸດສາຫະກຳປຸງແຕ່ງ ແລະ ການຄ້າ ປະຈຳໄຕມາດ I ( ເດືອນ 1-3 ປີ 2023) ແລະ ທິດທາງແຜນການ ປະຈໍາໄຕມາດ II ( ເດືອນ 4-6 ປີ2023)
ພ້ອມນັ້ນບັນດາສະຫາຍເຂົ້າຮ່ວມກອງປະຊຸມ ຈະໄດ້ປະກອບຄໍາເຫັນຕໍ່ຮ່າງບົດສະຫຼຸບດັ່ງກ່າວ ເພື່ອຖອດຖອນບົດຮຽນໃນການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ທິດທາງຈຸດສຸມ ກໍຄືແຜນການໃຫ້ລະອຽດໃນການຈັດຕັ້ງປະຕິບັດ 3 ເດືອນຕໍ່ໜ້າຂອງແຕ່ລະໜ່ວຍພັກ ກໍຄືຂອງຄະນະບໍລິຫານງານພັກ ກະຊວງອຸດສາຫະກໍາ ແລະ ການຄ້າ
ເພື່ອເຮັດໃຫ້ກອງປະຊຸມໃນຄັ້ງນີ້ມີເນື້ອໃນຄົບຖ້ວນ ແລະ ໄດ້ຕາມຈຸດປະສົງແຜນການທີ່ວາງໄວ້ ຂໍສະເໜີໃຫ້ບັນດາ ສະຫາຍ ຄະນະບໍລິຫານງານພັກ ກະຊວງ ອຄ ແລະ ບັນດາສະຫາຍເລຂາໜ່ວຍພັກ/ຮອງເລຂາ, ຫົວໜ້າກົມ ແລະ ຫົວໜ້າສະຖາບັນ ອ້ອມຂ້າງອົງຄະນະພັກກະຊວງ ອຄ ພ້ອມກັນຄົ້ນຄວ້າປະກອບຄໍາຄິດເຫັນຢ່າກົງໄປກົງມາໃສ່ຮ່າງບົດສະຫຼຸບ ປະຈໍາ 3 ເດືອນຕົ້ນປີ ແລະ ທິດທາງຈຸດສຸມ 3 ເດືອນໃນຕໍ່ໜ້າຂອງຄະນະບໍລິຫານງານພັກ ກະຊວງ ອຄ ໃຫ້ລະອຽດ ແລະ ເພື່ອຮັບປະກັນໃຫ້ວຽກງານຈຸດສຸມທີ່ວາງໄວ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນ, ມີຜົນສຳເລັດຕາມລະດັບຄາດໝາຍ ສະເໜີໃຫ້ບັນດາສະຫາຍເອົາໃຈໃສ່ລົງເລິກບາງບັນຫາຕື່ມ ດັ່ງນີ້
ໃຫ້ບັນດາໜ່ວຍພັກເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ, ສະມາຊິກພັກ ພາຍໃຕ້ຄວາມຮັບຜິດຊອບຂອງຕົນ ໃຫ້ເລິກເຊິງ ແລະ ແທດເຖິງທຸກເປົ້າໝາຍ ເພື່ອເຮັດໃຫ້ສະມາຊິກພັກມີຄວາມສະຫງົບ, ມີຄວາມອຸ່ນອຽນທຸ່ນທ່ຽນປະຕິບັດໜ້າທີ່ການເມືອງທີ່ໄດ້ຮັບມອບໝາຍ ມີຜົນສໍາເລັດ ແລະ ໃຫ້ບັນດາໜ່ວຍພັກເອົາໃຈໃສ່ລົງເລິກຕື່ມໃນການສະຫຼຸບລາຍງານການນຳພາ-ຊີ້ນຳຂອງໜ່ວຍພັກ ປະຈໍາເດືອນ, ປະຈໍາໄຕມາດ ແລະ ປີ ໃຫ້ມີຄວາມຖືກຕ້ອງ, ຊັດເຈນ, ວ່ອງໄວ ແລະ ສອດຄ່ອງກັບໂຄງຮ່າງ ຂອງບົດທີ່ຄະນະພັກ-ຄະນະນໍາ ກະຊວງກຳນົດໃຫ້. ຊຶ່ງການຈັດຕັ້ງປະຕິບັດໃນໄລຍະຜ່ານມາ ສັງເກດເຫັນວ່າ ບັນດາໜ່ວຍພັກສ່ວນຫຼາຍສະຫຼຸບຍັງບໍ່ທັນໄດ້ດີ ໂດຍສະເພາະດ້ານວຽກງານວິຊາສະເພາະ ເຫັນວ່າ ການຈັດວາງບັນດາໜ້າວຽກທີ່ສຳເລັດ ແລະ ທິດທາງຈຸດສຸມ ຍັງມີຄວາມສັບສົນບໍ່ສອດຄ່ອງກັບໂຄງຮ່າງຂອງບົດ ໂດຍບໍ່ໄຈ້ແຍກເນື້ອໃນ ຕາມ 5 ແຜນງານ ຍັງເຮັດແບບລວມໆ
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
