ໃນວັນທີ 10 ພຶດສະພາ 2023, ທີ່ຫ້ອງຮັບແຂກກະຊວງອຸດສາຫະກໍາ ແລະ ການຄ້າ, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ຕ້ອນຮັບການເຂົ້າຢ້ຽມ ແລະ ພົບປະ ຂອງທ່ານ Yang Xingping (ຢາງ ຊິງປິງ) ຮອງເຈົ້າແຂວງ ເສສວນ ແຫ່ງ ສາທາລະນະລັດ ປະຊາຊົນຈີນ ພ້ອມຄະນະທັງສອງຝ່າຍເຂົ້າຮ່ວມ
ໃນໂອກາດການເຂົ້າພົບປະສອງຝ່າຍ ແມ່ນເພື່ອການເສີມຂະຫຍາຍການຮ່ວມມື ດ້ານການຄ້າ ແລະ ອຸດສາຫະກຳ ລະຫວ່າງ ສປປ ລາວ ແລະ ແຂວງ ເສສວນ, ສປ ຈີນ, ການເສີມຂະຫຍາຍການຮ່ວມມືວຽກງານໂຄງການດ້ານວິສາວະກຳ ແລະ ການກໍ່ສ້າງ ເປັນຕົ້ນໂຄງການກໍ່ສ້າງ Logisitcs, ການເສີມຂະຫຍາຍການຮ່ວມມືດ້ານການປຸງແຕ່ງ ແລະ ພັດທະນາແຮ່ທາດ ເປັນຕົ້ນ ການປຸງແຕ່ງແຮ່ທາດ ແລະ ການເສີມຂະຫຍາຍການຮ່ວມມືດ້ານການພັດທະນາກະສິກຳ ແລະ ອື່ນໆ. ພ້ອມນັ້ນກໍຊຸກຍູ້ສົ່ງເສີມການຄ້າ-ການລົງທຶນ ແລະ ການຄ້າຊາຍແດນ ລາວ-ຈີນ, ການພັດທະນານິຄົມອຸດສາຫະກຳ ລຽບຕາມແລວທາງລົດໄຟ ລາວ-ຈີນ ແລະ ການອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ-ຈີນ ຕໍ່ ເອີຣົບ
ໂອກາດນີ້ ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງ ອຄ ກໍ່ສະແດງຄວາມຊົມເຊີຍຕໍ່ ທ່ານ Yang Xingping (ຢາງ ຊິງປິງ) ຮອງເຈົ້າແຂວງ ເສສວນ ແຫ່ງ ສາທາລະນະລັດ ປະຊາຊົນຈີນ ພ້ອມດ້ວຍຄະນະ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອ ເປັນຕົ້ນ: ສິດທິພິເສດທາງດ້ານການຄ້າ 98% ຂອງລາຍການສິນຄ້າທັງໝົດສົ່ງອອກໄປຈີນ, ສິດທິພິເສດແລະ ໂຄຕ້ານຳເຂົ້າສິນຄ້າເປັນຕົ້ນເຂົ້າ ແລະ ພືດພັກ, ໂຄງການຊ່ວຍເຫລືອການຈັດຕັ້ງປະຕິບັດແຜນວຽກຂອງ ສປປ ລາວ (2021-2025) ເພື່ອຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ (AEC) 2025 ແລະ ໂຄງການປັບປຸງລະບົບ ICT, ໂຄງການກອງທຶນພິເສດ ແມ່ນ້ຳຂອງ-ແມ່ນ້ຳລ້ານຊ້າງ, ການຍົກລະດັບວິຊາການ ແລະ ເຕັກນິກ, ພາຫະນະ, ວັດຖຸອຸປະກອນ ແລະ ອື່ນໆ.
ທ່ານ Yang Xingping (ຢາງ ຊິງປິງ) ຮອງເຈົ້າແຂວງ ເສສວນ ແຫ່ງ ສາທາລະນະລັດ ປະຊາຊົນຈີນ ໄດ້ສະແດງຄວາມຮູ້ສຶກເປັນກຽດ ແລະ ດີໃຈເປັນຢ່າງຍິ່ງ ທີ່ທ່ານຮອງລັດຖະມົນຕີ ມະໂນທອງ ວົງໄຊ ທີ່ໄດ້ຕ້ອນຮັບການເຂົ້າປະຢ້ຽມຢາມ ແລະ ພົບປະ ທີ່ເລິກເຊິ່ງດ້ານວິຊາການເປັນຕົ້ນດ້ານນະໂຍບາຍການຄ້າ ແລະ ການລົງທຶນ ລະຫວ່າງ ສປປ ລາວ-ສປ ຈີນ ເພື່ອໃຫ້ເກີດຜົນປະໂຫຍດທີ່ດີໃຫ້ແກ່ສອງປະເທດ
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
