ໃນລະຫວ່າງວັນທີ 22-27 ພຶດສະພາ 2023, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ) ໄດ້ນໍາພາຄະນະ ທີ່ປະກອບດ້ວຍພາກລັດ ແລະ ພາກເອກະຊົນ ເດີນທາງໄປຢ້ຽມຢາມ ແລະ ແລກປ່ຽນບົດຮຽນ ກ່ຽວກັບວຽກງານອຸດສາຫະກຳ ແລະ ການຄ້າ ຢູ່ ສ. ເກົາຫລີ. ຈຸດປະສົງຕົ້ນຕໍ ແມ່ນເພື່ອຖອດຖອນບົດຮຽນ ກ່ຽວກັບການສົ່ງເສີມ ແລະ ຄຸ້ມຄອງວຽກງານອຸດສາຫະກຳ ແລະ ການຄ້າ ລວມທັງການພົບປະຄະນະກຳມະການກະກຽມຈັດງານວາງ ສະແດງໂລກທີ່ເມືອງ ປູຊານ 2030 ຂອງ ສ. ເກົາຫລີ ແລະ ຢ້ຽມຢາມເຂດທີ່ຈະສ້າງໃຫ້ເປັນສະຖານທີ່ວາງສະແດງຖ້າ ສ.ເກົາຫລີ ໄດ້ຮັບເລືອກເປັນປະເທດເຈົ້າພາບຈັດງານດັ່ງກ່າວ.
ໃນໂອກາດນີ້ ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ ຍັງໄດ້ເຄື່ອນໄຫວພົບປະ ແລະ ແລກປ່ຽນບົດຮຽນຮ່ວມກັບຄະນະນຳລະດັບສູງຂອງກະຊວງການຄ້າ, ອຸດສາຫະກຳ ແລະ ພະລັງງານ ແຫ່ງ ສ. ເກົາຫລີ ເພື່ອເພີ່ມທະວີການຮ່ວມມືດ້ານການຄ້າ ແລະ ຊູກຍູ້ໃຫ້ມູນຄ່າສອງຝ່າຍ ໃຫ້ນັບມື້ເຕີບໃຫຍ່ ຂະຫຍາຍຕົວ ລວມທັງການຮ່ວມມືໃນວຽກງານວາງສະແດງສິນຄ້າ ທັງໃນລະດັບສອງຝ່າຍ, ພາກພື້ນ ແລະ ສາກົນ ແລະ ອຸດສາຫະກຳປຸງແຕ່ງອາຫານ. ພ້ອມກັນນັ້ນ, ທ່ານຍັງໄດ້ນໍາພາຄະນະ ເຂົ້າຮ່ວມພົບປະ ການນໍາຂອງກະຊວງ SMEs ແລະ Startups ເພື່ອປຶກສາຫາລື ແລະ ແລກປ່ຽນບົດຮຽນກ່ຽວກັບການພັດທະນາສູນບົ່ມເພາະທຸລະກິດ SME (SME Incubation center) ພ້ອມທັງນະໂຍບາຍຊຸກຍູ້ສົ່ງເສີມ ທຸລະກິດ SMEs.
ນອກນັ້ນ, ທ່ານຍັງໄດ້ນໍາພາຄະນະຜູ້ແທນລາວ ໄປຢ້ຽມຢາມບັນດາບໍລິສັດ ແລະ ຫົວໜ່ວຍທຸລະກິດການຜະລິດຢູ່ນະຄອນຫລວງ ໂຊລ ໂດຍສະເພາະ ໂຮງງານຜະລິດກິມຈິ, ບໍລິສັດນຳເຂົ້າ ແລະ ສົ່ງອອກ, ສູນບົ່ມເພາະທຸລະກິດ SMEs ແລະ ບໍລິສັດກັ່ນນ້ຳມັນເຊື້ອໄຟລາຍໃຫຍ່ ຂອງ ສ. ເກົາຫລີ ເພື່ອປຶກສາຫາລື ຄວາມເປັນໄປໄດ້ໃນການຮ່ວມມືດ້ານພະລັງງານໃນອະນາຄົດ ລວມໄປເຖິງການຈັບຄູ່ທາງທຸລະກິດ ເພື່ອຂະຫຍາຍຊ່ອງທາງ ແລະ ໂອກາດໃນການສົ່ງອອກສິນຄ້າຂອງລາວ ແລະ ການຫັນເປັນທັນສະໄໝ ຮູ້ຈັກນຳໃຊ້ນະວັດຕະກໍາ ແລະ ເຕັກໂນໂລຊີທີ່ທັນສະໄໝ ເຂົ້າໃນການຜະລິດ.
ການເຄື່ອນໄຫວຢ້ຽມຢາມ ສ. ເກົາຫລີຄັ້ງນີ້, ຄະນະຜູ້ແທນຂອງລາວ ນອກຈາກຈະໄດ້ແລກປ່ຽນຄວາມຄິດຄຳເຫັນ ແລະ ຖອດຖອນບົດຮຽນກ່ຽວກັບການພັດທະນາວຽກງານອຸດສາຫະກຳ ແລະ ການຄ້າ, ຍັງເປັນການເພີ່ມທະວີສາຍພົວພັນມິດຕະພາບ ລະຫວ່າງ ສອງຝ່າຍ ຊຶ່ງຈະນໍາມາຊຶ່ງຜົນປະໂຫຍດຢ່າງຫຼວງຫຼາຍ ມາສູ່ ສປປ ລາວ ເວົ້າລວມ, ເວົ້າສະເພາະໃຫ້ແກ່ ວຽກງານສົ່ງເສີມການຄ້າ ແລະ ການລົງທຶນ; ສົ່ງເສີມທຸລະກິດ SMEs; ອຸດສາຫະກຳປຸງແຕ່ງ, ການຄຸ້ມຄອງ ແລະ ການສະໜອງນ້ຳມັນເຊື້ອໄຟ ແລະ ການເພີ້ມມູນຄ່າການຄ້າສອງຝ່າຍໃຫ້ຂະຫຍາຍຕົວຂຶ້ນໃນອະນາຄົດອັນໃກ້ນີ້.
ແຫລ່ງຂ່າວ: ພະແນກຮ່ວມມືເສດຖະກິດການຄ້າ ກຜຮ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ
