ວັນທີ 9 ມິຖຸນາ 2023 ຜ່ານມາ ທີ່ຫ້ອງປະຊຸມກະຊວງອຸດສາຫະກໍາ ແລະ ການຄ້າ, ຄະນະກໍາມາທິການສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ, ກະຊວງອຸດສາຫະກໍາ ແລະ ການຄ້າ ໄດ້ຈັດພິທີມອບຂອງຂັວນ ເນື່ອງໃນໂອກາດສະເຫຼີມສະຫຼອງວັນເດັກນ້ອຍສາກົນ, ວັນທີ 1 ມິຖຸນາ 2023, ໃຫ້ກຽດເປັນປະທານໂດຍ ທ່ານ ນ. ຈັນສຸກ ແສງພະຈັນ ຮອງລັດຖະມົນຕີ ກະຊວງ ອຄ, ມີທ່ານຮອງລັດຖະມົນຕີ ກະຊວງ ອຄ, ຕາງໜ້າບັນດາກົມ, ຫ້ອງການກະຊວງ, ສະຖາບັນ ແລະ 3 ອົງການຈັດຕັ້ງມະຫາຊົນເຂົ້າຮ່ວມ.

ເນື່ອງໃນໂອກາດສະເຫຼີມສະຫຼອງວັນເດັກນ້ອຍສາກົນ ວັນທີ 1 ມິຖຸນາ 2023, ວັນສາກົນຢຸດຕິການໃຊ້ແຮງງານເດັກ 12 ມິຖຸນາ 2023 ແລະ ວັນປູກຕົ້ນໄມ້ແຫ່ງຊາດ ວັນທີ 01 ມິຖຸນາ 2023 ທີ່ໜູນວຽນມາເຖິງນີ້. ທົ່ວປວງຊົນທັງຊາດ ໄດ້ຖືເປັນວັນສໍາຄັນອີກວັນໜຶ່ງຈິ່ງໄດ້ພ້ອມກັນສ້າງຂະບວນການສະເຫຼີມສະຫຼອງວັນດັ່ງກ່າວຂຶ້ນໃນຂອບເຂດທົ່ວປະເທດ ຕາມສະພາບເງື່ອນໄຂຕົວຈິງ.

ຄະນະກໍາມາທິການສົ່ງເສີມຄວາມກ້າວໜ້າຂອງແມ່ຍິງ ແລະ ແມ່ ເດັກ, ກະຊວງອຸດສາຫະກໍາ ແລະ ການຄ້າ ໄດ້ຈັດພິທີດັ່ງກ່າວຂື້ນ ເພື່ອຮັບປະກັນໃຫ້ແກ່ການປົກປ້ອງສິດ ແລະ ຜົນປະໂຫຍດຂອງເດັກນັບມື້ໃຫ້ໄດ້ຮັບຜົນສູງຂຶ້ນນັ້ນ, ຄະນະນໍາກະຊວງ, ຄະນະພັກ, ອົງການຈັດຕັ້ງມະຫາຊົນ ໄດ້ຖືເປັນວຽກງານໜຶ່ງທີ່ສໍາຄັນໃນແຕ່ລະປີ ເພື່ອປະກອບສ່ວນສ້າງເງື່ອນໄຂສະພາບແວດລ້ອມໃຫ້ແກ່ການປະຕິບັດສິດທິເດັກ, ໃຫ້ຫ່າງໄກຢາເສບຕິດ ແລະ ສິ່ງມືນເມົາຕ່າງໆ.

ຂ່າວ-ພາບ: ທ ໄພວັນ ໂຄດວັນທາ ສູນສະຖະຕິ ແລະ ຂໍ້ມູນຂ່າວສານ