ຕອນບ່າຍເວລາ 13:00 ໂມງ ຂອງວັນທີ 31 ກໍລະກົດ 2023 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຄ ໄດ້ຈັດກອງປະຊຸມໂຄສະນາ-ປາຖະກະຖາ ວັນເກີດປະທານ ສຸພານຸວົງ ຄົບຮອບ 114 ປີ ແລະ ພິທີ ມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ແລະ ມີບັນດາສະຫາຍຄະນະບໍລິຫານງານພັກກະຊວງ, ບັນດາສະຫາຍຄະນະພັກຮາກຖານ, ເລຂາ, ຮອງເລຂາໜ່ວຍພັກ, ຄະນະໜ່ວຍພັກ, ບັນດາຫົວໜ້າ-ຮອງພະແນກ ສັງກັດບັນດາກົມ, ຫ້ອງການ, ສະຖາບັນຄົ້ນຄວ້າອຸດສາຫະກໍາ ແລະ ການຄ້າ, ບັນດາບໍລິສັດ – ລັດວິສາຫະກິດ ທີ່ຂຶ້ນກັບຄວາມຮັບຜິດຊອບຂອງກະຊວງ ອຄ , ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ຄະນະຮັບຜິດຊອບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເຂົ້າຮ່ວມທັງໝົດປະມານ 200 ສະຫາຍ.
ກອງປະຊຸມຄັ້ງນີ້ ໂດຍພາຍໃຕ້ການເປັນປະທານ ຂອງທ່ານ ນາງ ຈັນສຸກ ແສງພະຈັນ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ໂດຍມີຈຸດປະສົງ ເພື່ອໂຄສະນາ-ປາຖະກະຖາ ວັນເກີດປະທານ ສຸພານຸວົງ ຄົບຮອບ 114 ປີ (13 ກໍລະກົດ 1909 – 13 ກໍລະກົດ 2023) ແລະ ພິທີມອບ-ຮັບໃບຢັ້ງຢືນນາມມະຍົດ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ຊຶ່ງທ່ານໄດ້ໃຫ້ກຽດໂອ້ລົມ ແລະ ເລົ່າມູນເຊື້ອອັນພິລະອາດຫານ ແລະ ນໍ້າໃຈເສຍສະຫລະເພື່ອປະເທດຊາດ ເພື່ອປະຊາຊົນຂອງປະທານ ສຸພານຸວົງ ເພື່ອເຮັດໃຫ້ພະນັກງານ, ລັດຖະກອນ ຂອງກະຊວງ ອຄ, ບັນດາບໍລິສັດ – ລັດວິສາຫະກິດ ທີ່ຂຶ້ນກັບຄວາມຮັບຜິດຊອບຂອງກະຊວງ ອຄ , ສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ຮັບຮູ້ຊີວິດ ແລະ ການເຄື່ອນໄຫວປະຕິວັດ ພ້ອມທັງຍົກໃຫ້ເຫັນຜົນງານ ແລະ ຄຸນງາມຄວາມດີ ຂອງ ປະທານສຸພານຸວົງ ໃນໄລຍະຕໍ່ສູ້ຕ້ານຈັກກະພັດຜູ້ຮຸກຮານ ແລະ ໄລຍະປະເທດຊາດໄດ້ເອກະລາດ ມີການປົກປັກຮັກສາ ແລະ ສ້າງສາປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນລາວ ພ້ອມດຽວກັນນີ້ເພື່ອເຮັດໃຫ້ພະນັກງານລັດຖະກອນກໍາໄດ້ ຮໍ່າຮຽນເອົາແບບຢ່າງຄຸນງາມຄວາມດີ ນໍາເອົາບົດຮຽນມາຜັນຂະຫຍາຍເຂົ້າສູ່ວຽກງານຕົວຈິງຂອງຕົນ ປະກອບສ່ວນເປັນກໍາລັງແຮງສໍາຄັນໃນການພັດທະນາປະເທດຊາດໃນຕໍ່ໜ້າ.
ນອກຈາກນີ້, ທ່ານ ນາງ ກິ່ງສະດອນ ເພັດດາວເຮືອງ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານມະຕິຕົກລົງ ວ່າດວ້ຍການຮັບຮອງເອົາ ໜ່ວຍພັກເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022.
ຕອນທ້າຍ ທ່ານ ນາງ ຈັນສຸກ ແສງພະຈັນ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2022 ໃຫ້ແກ່ 24 ໜ່ວຍພັກຢ່າງສົມກຽດ.
ຂ່າວໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
ພາບໂດຍ: ທ ໄພຄໍາອີ ວິໄລຄໍາ, ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
