ຕອນບ່າຍ ເວລາ 02:00 ໂມງ ຂອງວັນທີ 04 ສິງຫາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ EDI IRWAN BIN MAHMUD ເອກອັກຄລັດຖະທູດປະເທດມາເລເຊຍ ປະຈໍາ ສປປ ລາວ ພ້ອມດ້ວຍຄະນະ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອເປັນການມາແນະນຳຕົວ ໃນການມາຮັບໜ້າທີ່ເອກອັກຄະລັດຖະທູດຜູ້ມີອໍານາດເຕັມ ແຫ່ງປະເທດມາເລເຊຍ ປະຈໍາ ສປປ ລາວ ຄົນໃໝ່, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 10 ທ່ານ.
ໃນໂອກາດພົບປະຄັ້ງນີ້ ແມ່ນເປັນການເສີມຂະຫຍາຍການພົວພັນທີ່ດີ ຂອງສອງປະເທດ ແລະ ຂອບໃຈທີ່ລັດຖະບານ ມາເລເຊຍ ໄດ້ໃຫ້ການຮ່ວມມື ແລະ ຊ່ວຍເຫຼືອຕໍ່ ສປປ ລາວ ໃນຫຼາຍຂະແໜງການ ລວມທັງການຊຸກຍູ້ສົ່ງເສີມການຄ້າສອງຝ່າຍ ແລະ ການລົງທຶນ ຢູ່ລາວຫຼາຍຂຶ້ນ; ທັງສອງຝ່າຍໄດ້ປຶກສາຫາລື ກ່ຽວກັບການເສີມຂະຫຍາຍການຮ່ວມມືດ້ານການຄ້າ, ການຮ່ວມມືດ້ານພະລັງງານໄຟຟ້າ (EDL) ຢູ່ແຂວງຈໍາປາສັກ ລະຫວ່າງ ລາວ-ມາເລເຊຍ, ການປຸງແຕ່ງກະສິກໍາທັນສະໄໝ, ການພັດທະນາອຸດສາຫະກຳປຸງແຕ່ງ ແລະ ອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ-ມາເລເຊຍ ຕໍ່ ເອີຣົບໃນອານະຄົດ ຊຶ່ງໃນປະຈຸບັນປະເທດລາວກໍ່ມີທາງລົດໄຟ ລາວ-ຈີນ ຈະເປັນໂອກາດທີ່ດີອັນໜຶ່ງໃນການຂົນສົ່ງສິນຄ້າສົ່ງອອກໄປປະເທດຈີນ ທີ່ຖືວ່າເປັນຕະຫລາດທີ່ມີຄວາມຕ້ອງການສິນຄ້າຈາກບັນດາປະເທດອາຊຽນເປັນຈໍານວນຫລາຍ; ເຫັນໄດ້ວ່າມູນຄ່າການຄ້າ ລະຫວ່າງ ສປປ ລາວ ແລະ ມາເລເຊຍປີ 2022 ແມ່ນເພີ່ມຂຶ້ນ; ທັງເປັນການເສີມຂະຫຍາຍການຮ່ວມມືດ້ານເສດຖະກິດການຄ້າ, ການລົງທຶນໃນຕໍ່ໜ້າຂອງສອງປະເທດ. ພ້ອມທັງສະເໜີ ສອງສະພາອຸດສາຫະກຳ ແລະ ການຄ້າແຫ່ງຊາດລາວ ແລະ ສະພາການຄ້າມາເລເຊຍ ໃຫ້ມີການປະສານສົມທົບ ແລະ ແລກປ່ຽນປະສົບການ ໃນການຊຸກຍູ້ໃຫ້ນັກທຸລະກິດຂອງສອງປະເທດ ໄດ້ມີການພົບປະຊຶ່ງກັນ ແລະ ກັນ, ຊອກຫາວິທີການຮ່ວມທຸລະກິດນຳກັນໃຫ້ຫຼາຍຂຶ້ນ.
ທ່ານ EDI IRWAN BIN MAHMUD ສະແດງຄວາມຂອບໃຈ ທີ່ທ່ານລັດຖະມົນຕີ ກຊ ອຄ ໄດ້ໃຫ້ການຕ້ອນຮັບພ້ອມທັງ ການແລກປ່ຽນຄໍາຄິດເຫັນທີ່ດີ ຊຶ່ງເຫັນໄດ້ສະຖານະພາບການພັດທະນາຂອງປະເທດລາວ ທີ່ເຊື່ອມໂຍງກັບບັນດາປະເທດໃນພາກພື້ນຈາກປະເທດ Landlock ກາຍເປັນ Landlink ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື, ສະໜັບສະໜູນ ໃນວຽກງານຫຼາຍດ້ານ ລະຫວ່າງ ສປປ ລາວ – ມາເລເຊຍ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.
ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ແລະ ອວຍພອນໄຊ ຕໍ່ທ່ານ ເອກອັກຄະລັດຖະທູດ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຊີວິດຄອບຄົວ ແລະ ປະສົບຜົນສໍາເລັດໃນໜ້າທີ່ການງານໃນໄລຍະມາປະຈໍາການຢູ່ລາວ; ພ້ອມທັງມີຜົນສໍາເລັດອັນໃຫຍ່ຫຼວງ ໃນການປະກອບສ່ວນເສີມສ້າງຄວາມຈະເລີນງອກງາມ ຂອງສອງລັດຖະບານ ແລະ ປະຊາຊົນສອງປະເທດ. ນອກຈາກນີ້, ທ່ານລັດຖະມົນຕີຍັງໄດ້ມອບກະຕ່າຂອງຂວັນຜະລິດຕະພັນຂອງລາວ ໃຫ້ແກ່ທ່ານທູດ ເພື່ອເປັນການໂຄສະນາສິນຄ້າຜະລິດຈາກປະເທດລາວໃຫ້ບັນດາປະເທດໄດ້ຮັບຮູ້ ຢ່າງກວ້າງຂວາງ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ ກຊ ອຄ
