ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ໄດ້ຈັດພິທີມອບການຢັ້ງຢືນໃຫ້ຫົວໜ່ວຍວິສາຫະກິດທີ່ໄດ້ຮັບຮອງການຢັ້ງຢືນມາດຕະຖານ GMP,GHP,HACCP ແລະ ປິດໂຄງການຍົກລະດັບການແຂ່ງຂັນຂອງຂະແໜງທຸລະກິດກະສິກຳ ໂດຍຜ່ານການຢັ້ງຢືນການຜະລິດທີ່ດີ ແລະ ລະບົບວິເຄາະ – ຄວບຄຸມຈຸດວິກິດ “Enhancing Competitiveness of Agri-business Sector Through Certification of GMP and HACCP” ຂື້ນໃນວັນທີ 31 ສິງຫາ 2023, ທີ່ ໂຮງແຮມ ລາວພຣາຊາ ພາຍໃຕ້ການເປັນປະທານ ຂອງ ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກຳ ແລະ ການຄ້າ, ມີຮອງລັດຖະມົນຕີ ກະຊວງ ອຄ, ບັນດາທ່ານຫົວໜ້າກົມ/ຮອງຫົວໜ້າກົມ ພາຍໃນກະຊວງ ອຄ, ມີຕາງໜ້າກະຊວງການຕ່າງປະເທດ, ຜູ້ຕາງໜ້າຫ້ອງການເສດຖະກິດ-ການຄ້າ ສະຖາທູດ ສປ ຈີນ ປະຈໍາລາວ, ພະແນກ ອຄ ແຂວງ/ນະຄອນຫ໌ຼວງ, ມີຫົວໜ່ວຍທຸລະກິດ ແລະ ວິຊາການກ່ຽວຂ້ອງເຂົ້າຮ່ວມທັງໝົດຈຳນວນ 82 ທ່ານ.
ຈຸດປະສົງເພື່ອມອບໃບຢັ້ງຢືນໃຫ້ແກ່ 07 ຫົວໜ່ວຍວິສາຫະກິດ ທີ່ໄດ້ຮັບຮອງມາດຕະຖານຈາກພາຍໃນ ແລະ ສາກົນ ດ້ານ GMP/GHP ແລະ HACCP ພ້ອມກັນນີ້ກໍ່ເພື່ອເຜີຍແຜ່ຜົນສໍາເລັດການຈັດຕັ້ງປະຕິບັດໂຄງການດັ່ງກ່າວ, ເພື່ອປະເມີນໂຄງການ ແລະ ຖອດຖອນການຈັດຕັ້ງປະຕິບັດໂຄງການໃນໄລຍະຜ່ານມາ (ຂໍ້ສະດວກ, ຂໍ້ຫຍຸ້ງຍາກ ແລະ ບັນຫາອື່ນທີ່ຕິດພັນ), ເພື່ອສະຫຼຸບປິດໂຄງການດັ່ງກ່າວຢ່າງເປັນທາງການ.
ກົມສົ່ງເສີມວິສາຫະກິດຂະໜາດນ້ອຍ ແລະ ກາງ (ກສວ) ໃນນາມເປັນຜູ້ຈັດຕັ້ງປະຕິບັດໂຄງການດັ່ງກ່າວ ໂດຍໄດ້ຮັບການສະໜັບສະໜູນຈາກໂຄງການແມ່ນໍ້າຂອງ – ແມ່ນໍ້າລ້ານຊ້າງ ຂອງລັດຖະບານ ສ.ປ ຈີນ ໃນສົກປີ 2020 ໃນມູນຄ່າ 136.000 ໂດລາສາຫະລັດ. ເນື່ອງຈາກ ປິ 2020 ເກິດມີສະພາບການແຜ່ລະບາດຂອງ COVID-2019 ສົ່ງຜົນເຮັດໃຫ້ການຈັດຕັ້ງປະຕິບັດໂຄງການເລື່ອນວັນເວລາໃນການຈັດຕັ້ງອອກໄປ ມາຮອດປີ 2021 ຈຶ່ງໄດ້ຄົ້ນຄ້ວາປັບແຜນກິດຈະກໍາຂອງໂຄງການໃຫມ່ ໂດຍສະເໜີປັບປ່ຽນແຜນການຈັດຈ້າງຊ່ຽວຊານຕ່າງ ປະເທດ ມາເປັນຊ່ຽວຊານພາຍໃນແທນ ເພື່ອໃຫ້ໂຄງການສາມາດເຄຶ່ອນໄຫວ ແລະ ຈັດຕັ້ງປະຕິບັດກິດຈະກຳຕາມແຜນທີ່ໄດ້ກຳນົດໄວ້ໃນເບື້ອງຕົ້ນ ມາເຖິງ ປີ 2022 ໂຄງການຈິ່ງໄດ້ເລີ່ມຈັດຕັ້ງປະຕິບັດກິດຈະກໍາດັ່ງກ່າວ ໂດຍກໍານົດ 03 ແຂວງເປົ້າໝາຍ ຄື ແຂວງຫຼວງນ້ຳທາ, ຈຳປາສັກ ແລະ ແຂວງສາລະວັນ ໂດຍໃຫ້ພະແນກອຸດສາຫະກຳ ແລະ ການຄ້າແຂວງ ຄັດເລືອກເອົາວິສາຫະກິດຂະແໜງທຸລະກິດກະສິກຳເພື່ອເຂົ້າຮ່ວມໂຄງການ, ບັນດາວິສາຫະກິດທີ່ຖືກຄັດເລືອກເຂົ້າຮ່ວມໂຄງການປະກອບມີດັ່ງນີ້: ແຂວງຫຼວງນໍ້າທາ ມີຈໍານວນ 03 ຫົວໜ່ວຍວິສາຫະກິດ: ບໍລິສັດ ກັນທະວົງສົ່ງເສີມການຜະລິດ ແລະ ປຸງແຕ່ງ ຈຳກັດຜູ້ດຽວ (ໂຮງງານຜະລິດໜາກຕາວ), ໂຮງງານນໍ້າດື່ມນໍ້າຫ້າ, ໂຮງງານນໍ້າດື່ມ-ນໍ້າກ້ອນດອກຈໍາປາ ສ່ວນບຸກຄົນ; ແຂວງສາລະວັນ ມີຈໍານວນ 02 ຫົວໜ່ວຍວິສາຫະກິດ: ບໍລິສັດກະເສດວີນາສາລະວັນ ຂາເຂົ້າ-ຂາອອກ ຈຳກັດຜູ້ດຽວ (ໂຮງງານຜະລິດແປ້ງມັນຕົ້ນ) ແລະ ບໍລິສັດຜະລິດເຫຼົ້າຂາວເມືອງຄົງເຊໂດນ ຈຳກັດຜູ້ດຽວ (ໂຮງງານເຫຼົ້າຂາວເມືອງຄົງ); ແລະ ແຂວງຈໍາປາສັກມີຈໍານວນ 02 ຫົວໜ່ວຍວິສາຫະກິດ: ບໍລິສັດ ອິນດູຈີນຮ່ວມມືພັດທະນາລາວ ຈຳກັດຜູ້ດຽວ (ໂຮງສີເຂົ້າ IDP) ແລະ ບໍລິສັດ ສົມພອນ ພັດທະນາກະສິກຳ ຄົບວົງຈອນ ຈຳກັດ (ໂຮງງານຜະ ລິດນໍ້າໜາກໜອດ).
ຂ່າວ-ພາບ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
