ຕອນບ່າຍ ເວລາ 02:30 ໂມງ ຂອງວັນທີ 11 ຕຸລາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າພົບປະຢ້ຽມຂໍ່ານັບ ຂອງ ທ່ານ ຫຼີ ເຊິນຢາງ ຫົວໜ້າພະແນກການຄ້າແຂວງຢຸນນານ ສປ ຈີນ ພ້ອມດ້ວຍຄະນະ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອເປັນການປຶກສາຫາລືໃນວຽກງານການຄ້າ ແລະ ການລົງທຶນຢູ່ລາວ, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 19 ທ່ານ.
ໃນໂອກາດພົບປະຄັ້ງນີ້ ແມ່ນເປັນການເສີມຂະຫຍາຍການພົວພັນທີ່ດີ ຂອງສອງປະເທດ, ໃນປີ 2024 ປະເທດລາວຈະເປັນປະທານຈັດກອງປະຊຸມອາຊຽນ ແລະ ກອງປະຊຸມອື່ນທີ່ກ່ຽວຂ້ອງ ທັງເປັນປີເປີດການທ່ອງທ່ຽວລາວ ຊຶ່ງຈະເປັນໂອກາດທີ່ດີ ໃນການປຶກສາຫາລືການຮ່ວມມື, ການຊ່ວຍເຫຼືອຕໍ່ ສປປ ລາວ ໃນຫຼາຍຂະແໜງການ ລວມທັງການຊຸກຍູ້ສົ່ງເສີມການຄ້າສອງຝ່າຍ ແລະ ການລົງທຶນ ຢູ່ລາວໃຫ້ຫຼາຍຂຶ້ນ; ທັງສອງຝ່າຍໄດ້ປຶກສາຫາລື ກ່ຽວກັບການເສີມຂະຫຍາຍການຮ່ວມມືດ້ານການຄ້ານໍ້າມັນເຊື້ອໄຟ ລາວ-ຈີນ ໂດຍສະເພາະການສ້າງສາງຮອງຮັບນໍ້າມັນເຊື້ອໄຟ ຢູ່ລາວ, ການສົ່ງອອກງົວ-ຄວາຍ ໄປ ສປ ຈີນ, ການອຳນວຍຄວາມສະດວກໃນການຂົນສົ່ງສິນຄ້າ ຜ່ານທາງລົດໄຟ ລາວ- ຈີນ, ການແລກປ່ຽນບົດຮຽນການຄ້າອີເລັກໂຕນິກ (E-Commerce), ລະບົບການຄຸ້ມຄອງລາຄາສິນຄ້າ ຂອງຈີນ ແລະ ອື່ນໆ ພ້ອມທັງຊອກຫາວິທີການຮ່ວມທຸລະກິດນຳກັນ ໃຫ້ນັບມື້ນັບເພີ່ມຂຶ້ນ.
ທ່ານ ຫຼີ ເຊິນຢາງ ສະແດງຄວາມຂອບໃຈ ທີ່ທ່ານຮອງລັດຖະມົນຕີ ໄດ້ໃຫ້ການຕ້ອນຮັບ ແລະ ການແລກປ່ຽນຄໍາຄິດເຫັນທີ່ດີ ຊຶ່ງເຫັນໄດ້ສະຖານະພາບການພັດທະນາຂອງປະເທດລາວ ທີ່ເຊື່ອມໂຍງກັບບັນດາປະເທດໃນພາກພື້ນ, ພ້ອມທັງສະເໜີ ການສ້າງກົນໄກການປະສານງານ ລະຫວ່າງ ພະແນກການຄ້າແຂວງຢຸນນານ ກັບ ກະຊວງ ອຄ ຂອງລາວ ໃຫ້ສະໜິດແໜ້ນຂຶ້ນກວ່າເກົ່າ ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື, ສະໜັບສະໜູນ ໃນວຽກງານຫຼາຍດ້ານ ລະຫວ່າງ ສປປ ລາວ – ຈີນ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.
ຕອນທ້າຍ ທ່ານຮອງລັດຖະມົນຕີ ໄດ້ສະແດງຄວາມຂອບໃຈ ແລະ ອວຍພອນໄຊ ຕໍ່ທ່ານ ຫຼີ ເຊິນຢາງ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ມີຄວາມສຸກໃນຊີວິດຄອບຄົວ ແລະ ປະສົບຜົນສໍາເລັດໃນໜ້າທີ່ການງານໃນໄລຍະມາເຄື່ອນໄຫວວຽກງານຢູ່ ສປປ ລາວ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຊ ອຄ
