ຕອນບ່າຍ ເວລາ 14 : 30 ໂມງ ຂອງວັນທີ 29 ພະຈິກ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າພົບປະຢ້ຽມຢາມຂອງ ທ່ານ Kao Kim Hourn (ເກົາ ກິມຮຸນ) ເລຂາທິການໃຫຍ່ອາຊຽນ ພ້ອມຄະນະ, ມີຜູ້ຕາງໜ້າຈາກສອງຝ່າຍເຂົ້າຮ່ວມ ຈໍານວນປະມານ 35 ທ່ານ.
ໃນໂອກາດພົບປະຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ສະແດງຄວາມຍິນດີຕ້ອນຮັບ ທ່ານ Kao Kim Hourn (ເກົາ ກິມຮຸນ) ພ້ອມຄະນະທີ່ໄດ້ມາເຄື່ອນໄຫວວຽກງານຂອງຕົນ ຢູ່ ສປປ ລາວ ຊຶ່ງທ່ານໄດ້ສະເໜີ ບາງບັນຫາໃນການປຶກສາຫາລື ກັບທ່ານເລຂາທິການໃຫຍ່ອາຊຽນ ຄື: 1/ ຄວາມຄືບໜ້າຂອງ PEDs ຂອງ ສປປ ລາວ ພາຍໃຕ້ຄໍາຂວັນ “ອາຊຽນ: ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ” (ASEAN: Enhancing Connectivity and Resilience); 2/ ແຜນວຽກບູລິມະສິດດ້ານເສດຖະກິດອາຊຽນ (Priority Economic Deliverables – PEDs) ຂອງສປປ ລາວ ໃນປີ 2024 ມີ 3 ກຸ່ມຍຸດທະສາດ (Strategic Thrusts) ແລະ 14 PEDs ເຊັ່ນ: ກຸ່ມຍຸດທະສາດ 1: ການເຊື່ອມໂຍງ ແລະ ເຊື່ອມຈອດດ້ານເສດຖະກິດ (Integrating and Connecting Economies); ກຸ່ມຍຸດທະສາດ 2: ການສ້າງອະນາຄົດແບບຍືນຍົງ ແລະ ທຸກພາກສ່ວນມີສ່ວນຮ່ວມ (Forging an Inclusive and Sustainable Future); ກຸ່ມຍຸດທະສາດ 3: ການຫັນປ່ຽນເພື່ອກ້າວໄປສູ່ດິຈິຕອນໃນອະນາຄົດ (Transforming for Digital Future) ຊຶ່ງປະຈຸບັນ 14 PEDs ໄດ້ຮັບຮອງໂດຍລັດຖະບານລາວ ແລະ ໄດ້ສົ່ງ Concept notes ໃຫ້ຂະແໜງການມີຄໍາເຫັນເພີ່ມເຕີມ; 14 PEDs ດັ່ງກ່າວຈະໄດ້ປຶກສາຫາລືໃນລາຍລະອຽດຕື່ມໃນກອງປະຊຸມເຈົ້າໜ້າທີ່ອາວຸໂສເສດຖະກິດອາຊຽນແບບວົງແຄບໃນຕົ້ນເດືອນທັນວາ ປີ 2023 ນີ້; ພ້ອມທັງການແຈ້ງແຜນຈັດກອງປະຊຸມສໍາລັບປີ 2024 ຄື: ສປປ ລາວ ຈະໄດ້ຮັບເປັນເຈົ້າພາບກອງປະຊຸມສະເພາະເສົາຄໍ້າເສດຖະກິດ ຈໍານວນ 8 ຄັ້ງ, ໃນນັ້ນ ຂັ້ນລັດຖະມົນຕີ 3 ຄັ້ງ, ຂັ້ນຮອງລັດຖະມົນ 2 ຄັ້ງ ແລະ ຂັ້ນເຈົ້າໜ້າທີ່ອາວຸໂສເສດຖະກິດ 3 ຄັ້ງ ຊຶ່ງລາຍລະອຽດຈະໄດ້ຜ່ານກັນໃນກອງປະຊຸມ SEOM Retreat ຕື່ມ. ນອກນີ້, ຍັງໄດ້ສະເໜີໃຫ້ທ່ານເລຂາທິການໃຫຍ່ອາຊຽນ ສືບຕໍ່ໃຫ້ການສະໜັບສະໜູນກອງປະຊຸມລັດຖະມົນຕີ ແລະ ເຈົ້າໜ້າທີ່ອາວຸໂສເສດຖະກິດປະເທດ CLMV ໂດຍສະເພາະການສົ່ງພະນັກງານຈາກກອງເລຂາອາຊຽນມາຊ່ວຍໃນການກະກຽມເນື້ອໃນ, ໂລເຈລຄໍຕິກ ແລະ ສະໜອງຂໍ້ມູນໃຫ້ກອງປະຊຸມ CLMV ແຕ່ລະຄັ້ງ ເພື່ອກຽມຄວາມພ້ອມໃນການເປັນປະທານກອງປະຊຸມອາຊຽນ ຂອງສປປ ລາວໃນປີ 2024.
ພ້ອມດຽວກັນນີ້, ທ່ານ Kao Kim Hourn (ເກົາ ກິມຮຸນ) ໄດ້ປຶກສາຫາລືກ່ຽວກັບ 1/ ຄວາມຄືບໜ້າການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ (ສະພາບເສດຖະກິດ, ການຄ້າ, ການລົງທຶນ, ສັນຍາການຄ້າເສລີຕ່າງໆ, ແລະ ອື່ນໆ); 2/ ການກະກຽມເປັນປະທານອາຊຽນປີ 2024 ຂອງສປປ ລາວ ແລະ ແຜນວຽກບູລິມະສິດດ້ານເສດຖະກິດອາຊຽນປີ 2024; 3/ ການສ້າງປະຊາຄົມເສດຖະກິດອາຊຽນ ພາຍຫລັງປີ 2025; ພ້ອມທັງການສົ່ງເສີມວຽກງານການທ່ອງທ່ຽວພາຍໃນອາຊຽນ ໃຫ້ຫັນເປັນດິຈິຕອນຫຼາຍຂຶ້ນກວ່າເກົ່າ ຊຶ່ງສປປ ລາວ ກໍເປັນສາມາຊິກໃນບັນດາປະເທດອາຊຽນ ຫວັງວ່າຈະໄດ້ຮັບຄວາມຮ່ວມມືເປັນຢ່າງດີ; ນອກນີ້, ທ່ານຍັງໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີທີ່ໄດ້ໃຫ້ຕ້ອນຮັບຢ່າງອົບອຸ່ນ ແລະ ໃຫ້ຄໍາໝັ້ນສັນຍາຈະໃຫ້ຄວາມຮ່ວມມື ແລະ ສະໜັບສະໜູນໃນວຽກງານອາຊຽນ ແກ່ສປປ ລາວ.
ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ຕໍ່ທ່ານ Kao Kim Hourn (ເກົາ ກິມຮຸນ) ຕ່ໍການສືບຕໍ່ສະໜັບສະໜູນໃຫ້ຄວາມຮ່ວມມື ໃນວຽກງານອາຊຽນ ແລະ ການເປັນປະທານອາຊຽນຂອງ ສປປ ລາວ ປີ 2024, ການພົບປະແລກປ່ຽນຄວາມຄິດເຫັນຫຼາຍອັນທີ່ເປັນປະໂຫຍດ ພ້ອມທັງອວຍພອນໄຊ ໃຫ້ທ່ານພ້ອມຄະນະ ຈົ່ງມີຄວາມສຸກ, ສຸຂະພາບແຂງແຮງ ແລະ ປະສົບຜົນສໍາເລັດໃນການເຄື່ອນໄຫວວຽກງານ ຢູ່ສປປ ລາວ.
ພາບ-ຂ່າວ: ນ ຖື ແຫວນວົງສົດ ສູນສະຖິຕິ ແລະ ຂ້ໍມູນຂ່າວສານ
