ກົມຊັບສິນທາງປັນຍາ ໄດ້ຊຸກຍູ້ສິນຄ້າຖິ່ນກຳເນີດ (GI) ລາວ ບຸກຕະຫຼາດສາກົນ ພ້ອມທັງສົ່ງເສີມ GI ເຂົ້າໄກ່ນ້ອຍ ແລະ ຊາລາວ ໃຫ້ເປັນທີ່ຮັບຮູ້ໃນເວທີລະດັບໂລກ
ທ່ານ ໄຊບັນດິດ ໄຊຍະວົງຄຳດີ ຮອງຫົວໜ້າກົມຊັບສິນທາງປັນຍາ ໄດ້ໃຫ້ສຳພາດວ່າ “ ກົມຊັບສິນທາງປັນຍາ ໃຫ້ຄວາມສຳຄັນ ແລະ ສົ່ງເສີມ ສິນຄ້າຖິ່ນກຳເນີດ ຫຼື GI ລາວຢ່າງຕໍ່ເນື່ອງ ເພື່ອໃຫ້ຄວາມຄຸ້ມຄອງ ແລະ ຍົກລະດັບສິນຄ້າ ຈາກທ້ອງຖິ່ນໃຫ້ເປັນທີ່ຮູ້ຈັກຢ່າງແຜ່ຫຼາຍ ທັງຕະຫຼາດພາຍໃນ ແລະ ສາກົນ” ລວມທັງການພັກດັນ ແລະ ສ້າງຄວາມເຂັ້ມແຂງໃຫ້ຜູ້ປະກອບການ GI ຜ່ານໂຄງການຕ່າງໆ ເພື່ອຂະຫຍາຍຊ່ອງທາງການຕະຫຼາດ ແລະ ການສ້າງຄວາມເຊື່ອໝັັ້ນໃນຄຸນນະພາບ, ເອກະລັກສະເພາະ ແລະ ມາດຕະຖານ GI ໃຫ້ກັບຜູ້ບໍລິໂພກ.
ໂດຍໃນລະຫວ່າງວັນທີ 15-18 ທັນວາ 2023 ທີ່ຜ່ານມາ ກົມຊັບສິນທາງປັນຍາ ໄດ້ນຳເອົາສິນຄ້າ GI ຈຳນວນ 03 ລາຍການ (ຊາກໍແມນ, ເຂົ້າໄກ່ນ້ອຍຊຽງຂວາງ, ເຂົ້າໄກ່ນ້ອຍຫົວພັນ) ເຂົ້າຮ່ວມວາງສະແດງສິນຄ້າໃນງານ
THE 16 th CAMBODIAN & IMPORT-EXPORT GOODS EXHIBITION ທີ່ປະເທດກຳປູເຈຍ ຊຶ່ງເປັນງານວາງສະແດງສິນຄ້າ ທີ່ຍິ່ງໃຫ່ຍ ເພື່ອເຮັດໃຫ້ຜູ້ຄ້າ ແລະ ຜູ້ນຳເຂົ້າສິນຄ້າ ທີ່ເຂົ້າມາຮ່ວມງານ ໄດ້ທົດລອງຊິມສິນຄ້າ ແລະ ສ້າງໂອກາດໃນການເຈລະຈາທຸລະກິດ ສ້າງໂອກາດໃນການສົ່ງອອກສິນຄ້າ ໄປຍັງຕ່າງປະເທດ. ກິດຈະກຳດັ່ງກ່າວແມ່ນໄດ້ຮັບການສະໜັບສະໜູນທຶນຮອນ ຈາກອົງການຝຣັ່ງເພື່ອການພັດທະນາ (AFD) ໂດຍຜ່ານໂຄງການສົ່ງເສີມ ແລະ ປົກປ້ອງຖິ່ນກຳເນີດ ລະດັບອະນຸພາກພື້ນ ຊຶ່ງ ລວມມີ 03 ປະເທດ ຄື: ສປປ ລາວ, ກຳປູເຈຍ ແລະ ມຽນມາ. ງານວາງສະແດງນີ້ ເປັນໂອກາດໃຫ້ກັບສິນຄ້າ GI ຂອງ ສປປ ລາວ ເນື່ອງຈາກວ່າເປັນການເຕົ້າໂຮມບັນດານັກທຸລະ ກິດ, ຜູ້ປະກອບການ, ນັກຊ່ຽວຊານດ້ານອຸດສາຫະກຳ ຈາກທົ່ວພາກພື້ນ ແລະ ເປັນເວທີໃຫ້ບັນດາຜູ້ຕາງໜ້າຂອງ ສປປ ລາວ ໄດ້ສ້າງເຄືອຂ່າຍ, ໂຄສະນາຜະລິດຕະພັນ ຂອງຕົນ ແລະ ຄົ້ນຫາຄູ່ຮ່ວມມື ທີ່ມີທ່າແຮງ ແລະ ການຮ່ວມມືກັບບັນດາຄູ່ຄ້າ ຂອງ ກຳປູເຈຍ ແລະ ສາກົນ, ສ້າງຄວາມຮັບຮູ້ຂອງຜະລິດຕະພັນ GI ຂອງລາວ ຢ່າງກວ້າງຂວາງ, ສ້າງໂອກາດການສົ່ງອອກ ປະກອບສ່ວນຊຸກຍູ້ເສດຖະກິດຊຸມຊົນ, ຍົກລະດັບຊີວິດການເປັນຢູ່ຂອງປະຊາຊົນ, ຊຸມຊົນໃຫ້ດີຂຶ້ນ ຢ່າງຍືນຍົງ.
ຜົນໄດ້ຮັບຈາກການວາງສະແດງແມ່ນສິນຄ້າ GI ຂອງ ສປປ ລາວ ໄດ້ຮັບຄວາມສົນໃຈຢ່າງຫຼວງຫຼາຍ ຈາກຜູ້ປະ ກອບການ ແລະ ຜູ້ບໍລິໂພກ ຈົນເຮັດໃຫ້ສິນຄ້າທີ່ນຳມາວາງສະແດງ ຖືກຂາຍໝົດພາຍໃນໄລຍະເວລາອັນສັ້ນ. ທັງເປັນ Soft power ທີ່ສຳຄັນທີ່ຊ່ວຍໃນການຖ່າຍທອດຄວາມເປັນເອກະລັກສະເພາະຂອງຊຸມຊົນທ້ອງຖິ່ນ ທັງເປັນການໂຄສະນາສະແດງໃຫ້ເຫັນລັກສະນະພິເສດຂອງສິນຄ້າ GI ຂອງແຕ່ພຶ້ນທີ ທີ່ໄດ້ຕິດພັນກັບປັດໃຈທາງ ທຳມະຊາດ ແລະ ປັດໃຈມະນຸດ ກໍຄືບັນດາພູມປັນຍາຂອງຄົນໃນທ້ອງຖິ່ນ ໃນການຜະລິດສິນຄ້າ GI. ນອກຈາກນັ້ນແລ້ວ ສິນຄ້າຖິ່ນກໍາເນີດ ແຕ່ລະຊະນິດ ແມ່ນມີເລື່ອງລາວ ແລະ ປະຫວັດຄວາມເປັນມາສະເພາະຂອງໃຜລາວ ຊຶ່ງຈຸດເດັ່ນ ແລະ ຄວາມນ່າສົນໃຈນີ້ ສາມາດພັດທະນາຕໍ່ຍອດກັບ ໃນການທ່ອງທ່ຽວທາງດ້ານວັດທະນະທຳ ຫຼື ການທ່ອງທ່ຽວທາງດ້ານອາຫານ (Gastronomy Tourism) ໄດ້.
ພາບ-ຂ່າວ: ໄດ້ມາຈາກ ກົມຊັບສິນທາງປັນຍາ ກະຊວງ ອຄ.
