ທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ຕ້ອນຮັບການເຂົ້າຢ້ຽມຢາມ ຂອງ ທ່ານ Prarshant Agrawal (ປຣາຊານ ອາເກີ່ວາລ), ເອກອັກຄະລັດຖະທູດ ອິນເດຍ ທີ່ມາຮັບໜ້າ ໃໝ່ປະຈຳ ສປປ ລາວ ພ້ອມດ້ວຍຄະນະ ແລະ ຕາງໜ້າຂອງກົມກ່ຽວຂ້ອງຈາກກະຊວງອຸດສາຫະກຳ ແລະ ການຄ້າກໍ່ໄດ້ເຂົ້າຮ່ວມ ໃນຕອນເຊົ້າ ຂອງວັນທີ 06 ກຸມພາ 2024 ທີ່ ກະຊວງອຸດສາຫະກຳ ແລະ ການຄ້າ.
ເຊິ່ງໂອກາດການພົບປະໃນຄັ້ງ ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ກໍ່ໄດ້ສະແດງຄວາມຍິນດີ ນຳທ່ານ Prarshant Agrawal (ປຣາຊານ ອາກຮາໂວ), ເອກອັກຄະລັດຖະທູດ ອິນເດຍ ປະຈຳ ສປປ ລາວ ທີ່ມາດຳລົງຕຳແໜ່ງ ເປັນເອກອັກຄະລັດຖະທູດ ປະຈຳ ສປປ ລາວ ຄົນໃໝ່.
ພ້ອມດຽວກັນນັ້ນ, ທ່ານ ລັດຖະມົນຕີ ກະຊວງ ອຄ ຍັງໄດ້ກ່າວລາຍງານຫຍໍ້ ໃນການຮ່ວມມືລະຫວ່າງ ລາວ ແລະ ອິນເດຍ ໃນໄລຍະຜ່ານມາທີ່ພົ້ນເດັ່ນຄື:
- ອີງໃສ່ໂຕເລກການຄ້າສອງຝ່າຍ ລາວ-ອິນເດຍ ເຫັນວ່າມູນຄ່າຫລາຍກວ່າ 100 ລ້ານໂດລາສະຫະລັດ ໃນໄລຍະ 5 ປີທີ່ຜ່ານມາ ແລະ ອິນເດຍ ກໍ່ຍັງເປັນຄູ່ຄ້າລັກຂອງ ລາວ (Top 10 trading partner of Lao PDR).
- ການຊຸກຍູ້ ແລະ ສະໜັບສະໜູນ ຂອງ ອິນເດຍ ໃນການຈັດຕັ້ງປະຕິບັດວຽກງານໃນຂອບ CLMV ທີ່ເນັ້ນໃສ່ ການສຶກສາ, ສາທາລະນະສຸກ , ສິ່ງແວດລ້ອມ ແລະ ອື່ນໆ ແລະ ຫວັງວ່າ ອິນເດຍຈະຊຸກຍູ້ການຮ່ວມມືດ້ານວິຊາການ ແລະ ທຶນຮອນ ໃນວຽກງານພັດທະນາ ຂະແໜງອຸດສາຫະກຳ ແລະ ການຄ້າ ໃນຕໍ່ໜ້າ.
- ປະຈຸບັນນີ້, ຂອບການຮ່ວມມື CLV and CLMV ກຳລັງຢູ່ໃນການສ້າງແຜນຮ່ວມມື ໄລຍະແຕ່ນີ້ຮອດ ປີ 2030 ໃນນັ້ນໄດ້ເນັ້ນໄດ້ເນັ້ນໃສ່ ການພັດທະນາການຄ້າ ເປັນຕົ້ນການວາງສະແດງສິນຄ້ານານາຊາດ-ການຂົນສົ່ງສິນຄ້າ-ການອຳນວຍຄວາມສະດວກຢູ່ດ່ານພາສີ…ແລະອຸດສາຫະກຳ ເປັນຕົ້ນ ເຫລັກ, ເຄມີ, ແຜ່ນແພ-ຕັດ ຫຍິບ, ຊີມັງ, ນ້ຳມັນ-ເປດໂຕຣເຄມີ ແລະ ອື່ນໆ.
- ຊຸກຍູ້ການຮ່ວມມືໃນຂອບກຳມາທິຮ່ວມ ລາວ ແລະ ອິນເດຍ ຫລື JC Laos-India ເພື່ອສົ່ງເສີມ ແລະ ພັດທະນາການຄ້າ, ອຸດສາຫະກໍາ, ທຸລະກິດໃຫ້ຂະຫຍາຍຕົວຂື້ນເລື້ອຍໆ (ກອງປະຊຸມ JC ຄັ້ງລ້າສຸດແມ່ນ ຄັ້ງທີ 9 ຈັດຂື້ນໃນ ປີ 2018 ທີ່ຜ່ານມາ).
ນອກຈາກນັ້ນ,
+ ສິນຄ້າຫຼັກທີ່ ສປປ ລາວສົ່ງອອກໄດ້ແກ່: ໂລຫະຄຳປະສົມເງິນ, ກົ່ວ, ຜະລິດຕະພັນໄມ້, ກາເຟ (ຍັງບໍ່ທັນປຸງແຕ່ງ), ຂີ້ຊີ, ເກືອໂບຣມ, ເຄື່ອງນຸ່ງຫົ່ມ ແລະ ອື່ນໆ..
+ ສິນຄ້າຫຼັກທີ່ ສປປ ລາວ ນຳເຂົ້າໄດ້ແກ່: ຜະລີດຕະພັນການຢາ (ເພສັດຊະກຳ), ພາຫະນະທາງບົກ (ນອກຈາກລົດໄຖນາ ແລະ ລົດຈັກ), ເຄື່ອງໄຟຟ້າ ແລະ ອຸປະກອນໄຟຟ້າ, ອຸປະກອນລົດຈັກ (ນອກຈາກເຄືື່ອງກົນຈັກພາຫະນະ), ຝ້າຍ ແລະ ຜະລິດຕະພັນຈາກຝ້າຍ, ກະໂລ , ເຄື່ອງນຸ່ງຫົ່ມ ແລະ ອື່ນໆ.
ແລະ ທ່ານຍັງໄດ້ກ່າວຕື່ມອີກວ່າ ເພື່ອເຮັດໃຫ້ການພົວພັນໃນຂະແໜງອຸດສາຫະກຳ ແລະ ການຄ້າ ລະຫວ່າງ ສປປ ລາວ ແລະ ອິນເດຍ ນັບມື້ນັບຂະຫຍາຍຕົວ ແລະ ເຂົ້າສູ່ລວງເລິກ ຈຶ່ງມີຂໍ້ສະເໜີດັ່ງນີ້:
- ສະເໜີໃຫ້ມີການແລກປ່ຽນຂໍ້ມູນ ລະຫວ່າງ ນັກທຸລະກິດລາວ-ອິນເດຍ ຢ່າງເປັນປະຈຳຜ່ານສະຖານທູດ ຫຼື ກອງປະຊຸມພົບປະຂອງສອງປະເທດ ເພື່ອດຶງດູດນັກລົງທຶນ ຂອງສອງປະເທດໃຫ້ນັບມື້ນັບຫຼາຍຂຶ້ນ ແລະ ເພື່ອຊອກຫາຊ່ອງທາງໃນການສົ່ງອອກສິນຄ້າຂອງລາວໄປຍັງຕະຫຼາດອິນເດຍ.
- ສະເໜີໃຫ້ມີການແລກປ່ຽນບົດຮຽນ ເພື່ອສຶກສາຄວາມເປັນໄປໄດ້ໃນການຮ່ວມມືພັດທະນາອຸດສາຫະກຳປຸງແຕ່ງສິນຄ້າກະສິກຳ, ອຸດສາຫະກຳ, ICT ແລະ ອື່ນໆ.
- ສ້າງແຜນການສົ່ງເສີມການຕະຫຼາດ ເປັນຕົ້ນການອຳນວຍຄວາມສະດວກໃຫ້ແກ່ພາກລັດ ແລະ ພາກທຸລະກິດໄດ້ເຂົ້າຮ່ວມງານວາງສະແດງສິນຄ້າໃນງານສຳຄັນຕ່າງໆຢູ່ອິນເດຍ.
- ເພື່ອເປັນການສົ່ງເສີມການພົວພັນການຄ້າ ແລະ ການລົງທຶນ ລະຫວ່າງ ສອງປະເທດ ແມ່ນເຫັນດີໃຫ້ມີການຈັດກອງປະຊຸມພົບປະແລກປ່ຽນ ລະຫວ່າງ ພາກລັດ ແລະ ພາກເອກະຊົນຂອງສອງປະເທດ.
- ສະເຫນີ ພິຈາລະນາ ການສ້າງແຜນການສົ່ງເສີມການຕະຫຼາດ ເປັນຕົ້ນການອຳນວຍຄວາມສະດວກໃຫ້ແກ່ພາກລັດ ແລະ ພາກທຸລະກິດໄດ້ເຂົ້າຮ່ວມງານວາງສະແດງສິນຄ້າໃນງານສຳຄັນຕ່າງໆຢູ່ອິນເດຍ ເຊັ່ນ ກົນຈັກ ພັດທະນາ ປຸງແຕ່ງ ສີນຄ້າກະສິກຳ, ການແປຮູບສີນຄ້າ, ນະວັດຕະກຳຫມ່
- ການລົງທຶນ ໃສ່ຫ້ອງແລັບ ກວດສອບສານເຄມີ ຫລື Nutrition fact – ຄິດວ່າ ທາງອີນເດຍ ມີທ່າແຮງ ເລື່ອງກະສິກຳ ຢາກໃຫ້ເບີ່ງຈຸດ Agriculture food processing laboratory certify ເພື່ອພວກເຮົາບໍຕ້ອງສົ່ງໄປກວດຢູ່ໄທ.
ທ້າຍນີ້, ທ່ານ ລັດຖະມົນຕີກະຊວງອຸດສາຫະກຳ ແລະ ການຄ້າ ກໍ່ໄດ້ສະແດງຄວາມຂອບໃຈ ຕໍ່ທ່ານ Prarshant Agrawal (ປຣາຊານ ອາກຮາໂວ), ພ້ອມດ້ວຍຄະນະ ຕ່ໍການສືບຕໍ່ ການສະໜັບສະໜູນໃຫ້ຄວາມຮ່ວມມື, ການພົບປະແລກປ່ຽນຄວາມຄິດເຫັນຫຼາຍອັນທີ່ເປັນປະໂຫຍດ ພ້ອມທັງອວຍ ພອນໄຊ ໃຫ້ທ່ານພ້ອມຄະນະ ຈົ່ງມີຄວາມຜາສຸກ, ສຸຂະພາບແຂງແຮງ ແລະ ປະສົບຜົນສໍາເລັດໃນການເຄື່ອນໄຫວວຽກງານ ຢູ່ ສປປ ລາວ.
ຂ່າວ-ພາບ: ເພັດປະກາຍ ສີສົມບູນ
