ຕອນເຊົ້າ ເວລາ 9:00 ໂມງ ຂອງວັນທີ 12 ມີນາ 2024 ທີ່ ໂຮງແຮມ ແລນມາກ ໄດ້ມີພິທີເປີດງານສະເຫຼີມສະຫຼອງວັນແມ່ຍິງສາກົນ ວັນທີ 8 ມີນາ ຄົບຮອບ 114 ປີ ໃຫ້ແມ່ຍິງ ກະຊວງອຸດສາຫະກໍາ ແລະ ການຄ້າ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ: ນາງ ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ເຂົ້າຮ່ວມຂອງ ທ່ານ ນາງ ອັນເນັດເທິະ ຄະນົບລອຄ, ເອກຄັກຄະລັດຖະທູດ ເຢຍລະມັນ ປະຈຳ ສປປ ລາວ. ທ່ານ ນາງ ອາລຸນີ ກົມມະສິດ, ພັນລະຍາທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ. ພ້ອມດ້ວຍບັນດາທ່ານພັນລະຍາລັດຖະມົນຕີ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ບັນດາທ່ານຫົວໜ້າ, ຮອງຫົວໜ້າກົມ, ຫ້ອງການ, ສຳນັກງານ, ສະຖາບັນ, ເລຂາທິການສະພາການຄ້າ ແລະ ອຸດສາຫະກຳ, ຜູ້ອຳນວຍການ ລັດວິສາຫະກິດ, ບໍລິສັດ, ຜູ້ຕາງໜ້າໂຄງການ GIZ, ຫຼາຍກ່ວາ 150 ທ່ານ.
ໂດຍຂື້ນອ່ານທົບທວນຄືນໂດຍຫຍໍ້ປະຫວັດຄວາມເປັນມາຂອງວັນທີ 8 ມີນາ ຄົບຮອບ 114 ປີ ຂອງ ທ່ານ ນາງ ສົມໝາຍ ພົມມຸນິວົງ, ຄະນະບໍລິຫານງານສູນກາງສະຫະພັນແມ່ຍິງ, ປະທານສະຫະພັນແມ່ຍິງກະຊວງ ອຄ. ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ໃນປີນີ້ ຊຶ່ງວຽນມາບັນຈົບຄົບຮອບ 114 ປີ ຖືໄດ້ວ່າເປັນວັນທີ່ມີຄວາມໝາຍຄວາມສຳຄັນ ໃນໜ້າປະຫວັດສາດໂລກ ເພື່ອລະນຶກເຖິງຄວາມເຂັ້ມແຂງຂອງແມ່ຍິງ ທີ່ໄດ້ຕໍ່ສູ້ເພື່ອສິດເສລີພາບ ແລະ ຄວາມເປັນທຳ, ຊຶ່ງໃນມື້ນີ້ ສະຫະພັນຍິງກະຊວງ ອຄ ໄດ້ພ້ອມກັນຈັດຕັ້ງຂະບວນການສະເຫຼີມສະຫຼອງວັນດັ່ງກ່າວ ອັນເຕັມໄປດ້ວຍບັນຍາກາດຟົດຟື້ນ ໄປພ້ອມໆກັບຂະບວນການສະເຫຼີມສະຫຼອງວັນແມ່ຍິງໃນທົ່ວປະເທດ ກໍຄືໃນທົ່ວໂລກ. ໃນອາທິດທີ່ຜ່ານມາ ຊຶ່ງສະຫະພັນແມ່ຍິງເອງກໍ່ໄດ້ຈັດກິດຈະກຳ ໃຫ້ເອື້ອຍນ້ອງແມ່ຍິງທັງໝົດໄດ້ວາງ
ຂາຍສິນຄ້າ ອຸປະໂພກບໍລິໂພກ, ເຄື່ອງຫັດຖະກຳ ແລະ ອື່ນໆ ຂຶ້ນທີ່ກະຊວງ ຂອງພວກເຮົາ ຢ່າງມີຂະບວນຟົດຟື້ນ ຊຶ່ງເປັນກິດຈະກຳສົ່ງເສີມການສ້າງລາຍຮັບໃຫ້ບັນດາໜ່ວຍສະຫະພັນແມ່ຍິງໃຫ້ມີລາຍໄດ້ເພີ່ມ ແລະ ການຈັດກອງປະຊຸມຂຶ້ນໃນມື້ນີ້ກໍ່ເພື່ອເປັນການຫວນຄືນປະຫວັດຄວາມເປັນມາຂອງວັນດັ່ງກ່າວ, ລາຍງານຄວາມຄືບໜ້າ ການສ້າງແຜນປະຕິບັດງານ ການເຊື່ອມສານ ບົດບາດ ຍິງ-ຊາຍຂອງຂະແໜງ ອຄ ແລະ ພ້ອມນີ້ກໍມີການຈັດເວທີສົນທະນາຫົວຂໍ້ສ້າງຄວາມອາດສາມາດໃນການເຮັດການຄ້າຜ່ານລະບົບເອເລັກໂຕນິກເພື່ອເປັນການສ້າງຄວາມເຂັ້ມແຂງ ໃຫ້ເອື້ອຍນ້ອງແມ່ຍິງ.
ໃນໂອກາດວັນສຳຄັນນີ້ ຂ້າພະເຈົ້າຂໍຮຽກຮ້ອງໃຫ້ທຸກພາກສ່ວນ, ຈົ່ງພ້ອມກັນສືບຕໍ່ເອົາໃສ່ໃຈຢ່າງຕັ້ງໜ້າສົ່ງເສີມ ແລະ ພັດທະນາຄວາມກ້າວໜ້າຂອງແມ່ຍິງໃຫ້ເປັນທີ່ຮັບຮູ້ ແລະ ຍອມຮັບໃນສັງຄົມ ເພື່ອໃຫ້ເພດຍິງ ສາມາດຢືນຢູ່ແຖວໜ້າໃນການຈັດຕັ້ງປະຕິບັດວຽກງານໄປຄຽງຄູ່ກັບເພດຊາຍ ແລະ ສືບຕໍ່ປະຕິບັດໜ້າທີ່ ແລະ ພາລະບົດບາດຂອງການເປັນລູກທີ່ດີຂອງພໍ່ແມ່, ພັນລະຍາທີ່ດີຂອງສາມີ, ແມ່ທີ່ດີຂອງລູກ ແລະ ການເບິ່ງແຍງຄອບຄົວໃຫ້ມີຄວາມຜາສຸກ. ຖ້າຈະເຮັດໄດ້ຄືແນວນັ້ນ, ຂ້າພະເຈົ້າຂໍຮຽກຮ້ອງມາຍັງເອື້ອຍນ້ອງແມ່ຍິງທຸກຄົນ ເວົ້າລວມ, ເວົ້າສະເພາະ ແມ່ນແມ່ຍິງໃນຂະແໜງອຸດສາຫະກຳ ແລະ ການຄ້າ ໃຫ້ສືບຕໍ່ຕັ້ງໜ້າເສີມຂະຫຍາຍຄວາມຮູ້ຄວາມສາມາດຂອງຕົນ ໃຫ້ສັງຄົມເຫັນໄດ້ສັກກະຍະພາບຂອງຕົນ ໂດຍຍັງຮັກສາໄວ້ດ້ານຄຸນສົມບັດຂອງຄວາມເປັນຜູ້ຍິງ ກໍຄື: ຄວາມລະອຽດອ່ອນ, ຄວາມອ່ອນໂຍນ, ຄວາມໂອບເອື້ອອາລີ ແລະ ຮູ້ຈັກປະສົມປະສານລະຫວ່າງ ຄວາມອ່ອນໂຍນ, ຄວາມອົດທົນ ແລະ ຄວາມເຂັ້ມແຂງ ເພື່ອໃຫ້ສາມາດພັດທະນາຕົນເອງ ໃຫ້ກາຍເປັນແມ່ຍິງທີ່ມີຄວາມສາມາດ ແລະ ກ້າວໜ້າຕາມຍຸກສະໄໝ ເພື່ອສ້າງບົດບາດໃໝ່.
ຕອນທ້າຍນີ້ ທ່ານປະທານ ກໍສະແດງຄວາມຂອບໃຈເປັນຢ່າງຍິ່ງ ມາຍັງບັນດາທ່ານທັງໝົດ ທີ່ໄດ້ຊັບຊ້ອນເວລາອັນມີຄຸນຄ່າມາເຂົ້າຮ່ວມກອງປະຊຸມໃນມື້ນີ້; ພິເສດແມ່ນຂໍສະແດງຄວາມຂອບໃຈ ມາຍັງທ່ານ ເອກອັກຄະລັດຖະທູດເຢຽລະມັນ, ປະທານຄະນະບໍລິຫານງານສະຫະພັນແມ່ຍິງກະຊວງອຸດສາຫະກຳ ແລະ ການຄ້າ ທີ່ໃຫ້ກຽດເປັນປະທານຮ່ວມ, ໂຄງການ ສົ່ງເສີມຄວາມອາດສາມາດໃນການແຂ່ງຂັນພາຍໃຕ້ກອບແຜນງານຂໍ້ລິເລີ່ມການເຊື່ອມໂຍງອາຊຽນ ທີ່ສະໜັບສະໜູນດ້ານງົບປະມານໃນການຈັດກອງປະຊຸມໃນມື້ນີ້ ຊຶ່ງເປັນການປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າແມ່ຍິງຂອງຂະແໜງອຸດສາຫະກຳ ແລະ ການຄ້າ, ຂອບໃຈຊ່ຽວຊານ, ຄູ່ຮ່ວມສົນທະນາ ທັງພາກລັດ ແລະ ທຸລະກິດ ທີ່ໄດ້ມາແລກປ່ຽນບົດຮຽນອັນມີປະໂຫຍດໃນມື້ນີ້.
ຂ່າວ-ພາບ: ໄພຄໍາອີ ຫ້ອງການກະຊວງ ອຄ.
