ໃນລະຫວ່າງວັນທີ 21-22 ມິນາ 2024, ທີ່ໂຮງແຮມ ລາວເທວ, ນະຄອນຫຼວງວຽງຈັນ, ກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ, ກອງປະຊຸມລະດັບພາກພື້ນອາຊຽນ ກ່ຽວກັບການສ້າງຄວາມເຂັ້ມແຂງ ໃຫ້ແກ່ເຄືອຂ່າຍສູນສົ່ງເສີມເຕັກໂນໂລຊີ ແລະ ນະວັດຕະກຳ (TISC), ໃຫ້ກຽດເປັນປະທານຮ່ວມຂອງ ທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ແລະ ທ່ານ Andrew CZAJKOWSKI, ຜູ້ຕາງໜ້າຈາກອົງການຊັບສິນທາງປັນຍາໂລກ (WIPO).
ໃນກອງປະຊຸມຄັ້ງນີ້ ມີຜູ້ຕາງໜ້າ ແລະ ຊ່ຽວຊານຈາກອົງການຊັບສິນທາງປັນຍາໂລກ, ຜູ້ຕາງໜ້າຈາກກອງເລຂາອາຊຽນ, ຜູ້ຕາງໜ້າຈາກບັນດາປະເທດສະມາຊິກອາຊຽນ ຄື: ບຣູໄນ ດາຣູຊາລາມ, ກຳປູເຈຍ, ອິນໂດເນເຊຍ, ລາວ, ມາເລເຊຍ, ຟີລິບປິນ, ໄທ ແລະ ຫວຽດນາມ ນອກນັ້ນຍັງມີຜູ້ຕາງໜ້າຈາກບັນດາ ຫ້ອງການ, ກົມ, ມະຫາວິທະຍາໄລແຫ່ງຊາດ ແລະ ສະຖາບັນຄົ້ນຄວ້າ ໄດ້ເຂົ້າຮ່ວມ ສັງເກດການ ພ້ອມທັງພະນັກງານຂອງກົມທີ່ກ່ຽວຂ້ອງ ເຂົ້າຮ່ວມທັງໝົດ ຈໍານວນ 38 ທ່ານ.
ໃນໂອກາດນີ້ ທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ ໄດ້ ມີຄໍາເຫັນ ແລະ ກ່າວຕ້ອນຮັບບັນດາຜູ້ຕາງໜ້າຈາກປະເທດສະມາຊິກອາຊຽນ ແລະ ຜູ້ເຂົ້າຮ່ວມກອງປະຊຸມ ພ້ອມນັ້ນ ທ່ານໄດ້ສະແດງຄວາມຂອບໃຈມາຍັງ ທ່ານ Andrew CZAJKOWSKI, ຜູ້ຕາງໜ້າຈາກອົງການຊັບສິນທາງປັນຍາໂລກ (WIPO) ແລະ ສໍານັກງານສິດທິບັດ ແຫ່ງປະເທດຍີ່ປຸ່ນ JPO ທີ່ໄດ້ໃຫ້ການສະໜັບສະໜູນໃນການຈັດກອງປະຊຸມໃນຄັ້ງນີ. ພ້ອມທັງ ກ່າວເປີດກອງປະຊຸມໃນຄັ້ງນີ້ ຊຶ່ງມີເນື້ອໃນບາງຕອນ ທ່ານກ່າວວ່າ: ລັດຖະບານແຫ່ງ ສປປ ລາວ ໄດ້ຮັບຮູ້ເຖິງຄວາມສໍາຄັນ ແລະ ຄຸນຄ່າອັນໃຫຍ່ຫຼວງຂອງການສ້າງ ແລະ ພັດທະນາເຄືອຂ່າຍສູນ TISC ທັງພາຍໃນ ແລະ ຕ່າງປະເທດ ກໍຄື ລະດັບຊາດ ແລະ ພາກພື້ນອາຊຽນ. ປັດຈຸບັນ ສປປ ລາວ ພວມສົມທົບກັບຂະແໜງການກ່ຽວຂ້ອງກະກຽມສ້າງສູນ TISC ແລະ ພວກເຮົາມີແຜນຈະສ້າງສູນ TISC ຢ່າງໜ້ອຍ 1-2 ສູນພາຍໃນປີ 2024 ເພື່ອສະໜອງຂໍ້ມູນສິດທິບັດ ແລະ ເຕັກໂນໂລຊີນະວັດຕະກໍາ ໃຫ້ແກ່ ຜູ້ທີ່ສົນໃຈ, ນັກຄົ້ນຄ້ວາ ແລະ ຜູ້ປະດິດສ້າງ. ກອງປະຊຸມຄັ້ງນີ້ ເປັນໂອກາດອັນດີ ເພື່ອສ້າງຄວາມເຂັ້ມແຂງ ແລະ ພັດທະນາເຄືອຂ່າຍສູນ TISC ໃນພາກພື້ນອາຊຽນ, ຊຸກຍູ້ການແລກປ່ຽນປະສົບການທີ່ດີ ໃນການຈັດຕັ້ງປະຕິບັດໜ້າທີ່ ແລະ ແລກປ່ຽນຄວາມຮູ້ ໃນການພັດທະນາຊັບພະຍາກອນມະນຸດ ຂອງບັນດາບັນດາປະເທດອາຊຽນ ແລະ ອົງການຈັດຕັ້ງສາກົນ.
ຂ່າວ – ຮູບພາບ: ກົມຊັບສິນທາງປັນຍາ
