ກະຊວງອຸດສາຫະກຳ ແລະ ການຄ້າ (ອຄ) ເປີດຊຸດຮຽນ ທິດສະດີການເມືອງ ຂັ້ນຕົ້ນໄລຍະ 03 ເດືອນ ຊຸດທີ I ໃຫ້ແກ່ສະມາຊິກພັກ-ພະນັກງານຫຼັກແຫຼ່ງຂອງກະຊວງ ອຄ ຂື້ນໃນວັນທີ 22 ເມສາ 2024 ທີ່ຫ້ອງປະຊຸມກະຊວງ ອຄ ໃຫ້ກຽດເຂົ້າຮ່ວມເປັນປະທານຂອງ ສະຫາຍ ນາງ ຈັນສຸກ ແສງພະຈັນ ຮອງເລຂາຄະນະພັກ, ຮອງລັດຖະມົນຕີກະຊວງ ອຄ ແລະ ສະຫາຍ ນາງ ບຸນມີ ຈຸນລະຈັກ, ຮອງເລຂາຄະນະພັກ, ຮອງຫົວໜ້າສະຖາບັນການເມືອງ, ມີຄະນະປະຈໍາພັກ, ບັນດາສະຫາຍເລຂາ, ຮອງເລຂາຄະນະຮາກຖານພັກ, ສະຫາຍ ປອ ສຸພາວະດີ ຫຼ້າຄຳສາຍ, ຫົວໜ້າກົມຄຸ້ມຄອງການຮຽນ-ການສອນ, ສະຖາບັນການເມືອງ ແລະ ການປົກຄອງແຫ່ງຊາດ ແລະ ບັນດາສະຫາຍນັກສຳມະນາກອນ ເຂົ້າຮ່ວມ
ສະຫາຍ ນາງ ຈັນສຸກ ແສງພະຈັນ ໄດ້ກ່າວວ່າ: ການເປີດການຮຽນ-ການສອນທິດສະດີການເມືອງຂັ້ນຕົ້ນ ຄັ້ງນີ້ ກໍ່ເປັນໜຶ່ງໃນການຈັດຕັ້ງຜັນຂະຫຍາຍ ມະຕິ ເລກທີ 04/ຄບສພ ກ່ຽວກັບ ການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງດ້ານວຽກງານພະນັກງານ ໂດຍການສ້າງແຜນບຳລຸງກັບທີ່ໃຫ້ພະນັກງານຫຼັກແຫຼ່ງ ໂດຍສະເພາະແມ່ນບັນດາເປົ້າໝາຍທີ່ນອນໃນແຜນກຳນົດພະນັກງານນຳພາ-ຄຸ້ມຄອງ ທີ່ຍັງຢູ່ໃນຂັ້ນວິຊາການ ແລະ ຂັ້ນຮອງຫົວໜ້າພະແນກ ໃຫ້ມີລະດັບຄວາມຮັບຮູ້ ຄວາມເຂົ້າໃຈ ແລະ ເປັນເອກະພາບ ຕໍ່ແນວທາງປ່ຽນແປງໃໝ່ຂອງພັກ, ສາມາດເຮັດໜ້າທີ່ຂົນຂວາຍ ແລະ ນຳພາຈັດຕັ້ງຜັນຂະຫຍາຍໃຫ້ເປັນແຜນວຽກລະອຽດໃນຂົງເຂດທີ່ຕົນຮັບຜິດຊອບ.
ການເປີດຮຽນເປັນການສ້າງກາລະໂອກາດອັນດີ ໃນການເຊື່ອມຊຶມຮຽນຮູ້ເຮັດໃຫ້ສາມາດກຳໄດ້ ຄວາມຮູ້ພື້ນຖານທາງດ້ານທິດສະດີການເມືອງ, ການປົກຄອງ, ກຳໄດ້ ຫຼັກມູນພື້ນຖານຂອງທິດສະດີ ມາກ-ເລນິນ ແນວຄິດໄກສອນ ແລະ ແນວທາງນະໂຍບາຍຂອງພັກ, ປັບປຸງທັດສະນະຫຼັກໝັ້ນຂອງສະມາຊິກພັກ-ພະນັກງານໃຫ້ມີຄວາມໜັກແໜ້ນ, ຮູ້ຈຳແນກໄດ້ມິດ-ສັດຕູ, ເຊື່ອມຊຶມຕໍ່ການນຳພາຂອງພັກ ກໍ່ຄືຈຸດໝາຍອຸດົມການຂອງພັກເຮົາ; ເປັນການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ, ຍົກສູງສະຕິຄວາມເປັນແບບຢ່າງນຳໜ້າແກ່ມະຫາຊົນ, ສ້າງແບບແຜນການດຳລົງຊີວິດທີ່ປອດໃສຂາວສະອາດ, ຍົກສູງສະຕິຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ; ກໍາແໜ້ນແນວທາງ ແຜນນະໂຍບາຍຂອງພັກ, ເປັນຕົ້ນແມ່ນແນວທາງການປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ສ້າງຄວາມເປັນເອກະພາບກັບແນວທາງ, ແຜນນະໂຍບາຍຂອງພັກ ເພື່ອນຳໄປຜັນຂະຫຍາຍ ແລະ ຈັດຕັ້ງປະຕິບັດໃນຂົງເຂດວຽກງານຕົວຈິງທີ່ຕົນຮັບຜິດຊອບໃຫ້ເກີດດອກອອກຜົນສູງ. ອັນນີ້ແມ່ນສິ່ງຈຳເປັນ ແລະ ຄວາມຮຽກຮ້ອງຕ້ອງການໃນການສ້າງ ແລະ ກຽມຄວາມພ້ອມໃຫ້ສະມາຊິກພັກ-ພະນັກງານໃຫ້ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ຂອງຂະແໜງອຸດສາຫະກຳ ແລະ ການຄ້າ ໃນສະເພາະໜ້າ ແລະ ຍາວນານ ເປັນການຫຼຸດພົ້ນອອກຈາກຈິນຕະນາການອັນເກົ່າທີ່ບໍ່ສອດຄ່ອງ, ສ້າງທັດສະນະຫຼັກໝັ້ນຊົນຊັ້ນທີ່ຖືກຕ້ອງ, ສ້າງແນວຄິດທີ່ເປັນເອກະພາບສູງກັບແນວທາງນະໂຍບາຍກໍຄືອຸດົມການ ແລະ ຈຸດໝາຍ.
ເພື່ອບັນລຸຕາມຈຸດປະສົງ ແລະ ລະດັບຄາດໝາຍ ໃຫ້ບັນດານັກສຳມະກອນ ກຳແໜ້ນທິດນຳທີ່ວ່າ ທິດສະດີຕ້ອງຕິດພັນກັບພຶດຕິກຳຕົວຈິງ, ເພາະວ່າພຶດຕິກຳແມ່ນມາດຖານສັດຈະທຳ, ຮຽນຮູ້ເຊື່ອມຊືມແນວທາງແຜນນະໂຍບາຍຂອງພັກ ຕ້ອງຕິດພັນກັບການຮູ້ຜັນຂະຫຍາຍໃຫ້ສອດຄ່ອງ ໂດຍອີງໃສ່ຫຼັກມູນທິດສະດີ ແລະ ການຖອດຖອນບົດຮຽນຈາກພຶດຕິກຳຕົວຈິງ, ເປັນແບບຢ່າງນຳໜ້າໃຫ້ແກ່ມະຫາຊົນ, ຕ້ອງຖືສຳຄັນການໃຈ້ແຍກບັນຫາຕ່າງໆຢ່າງເລິກເຊິ່ງ ແລະ ມີວິທີແກ້ໄຂຢ່າງເໝາະສົມ, ເອົາໃຈໃສ່ຄົ້ນຄວ້າດ້ວຍຕົນເອງ, ແລກປ່ຽນບົດຮຽນລະຫວ່າງສຳມະນາກອນ ແລະ ວິທະຍາກອນ, ສຳລັບສຳມະນາກອນ ຕ້ອງຄົ້ນຄວ້າຮໍ່າຮຽນ ແລະ ປະຕິບັດລະບຽບຂອງການຮຽນ ຢ່າງເຂັ້ມງວດ ສ່ວນວຽກງານວິຊາສະເພາະອື່ນໆແມ່ນມອບໝາຍໃຫ້ຜູ້ອື່ນເຮັດແທນຢ່າງຂາດຕົວໃນໄລຍະເຂົ້າຮ່ວມຊຸດຮຽນຄັ້ງນີ້.
ໃນໂອກາດນີ້ທ່ານສະແດງຄວາມຊົມເຊີຍ ຕໍ່ຄະນະຮັບຜິດຊອບຊຸດຮຽນ, ພິເສດແມ່ນສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ອຸທິດກຳລັງ, ເຫື່ອແຮງ, ສະຕິປັນຍາ ແລະ ເປັນເຈົ້າການຊ່ວຍກະຊວງ ອຄ ໃນການກະກຽມ, ສ້າງເງື່ອນໄຂ ແລະ ອຳນວຍຄວາມສະດວກໃນທຸກດ້ານເພື່ອບຳລຸງສ້າງ ແລະ ພັດທະນາຊັບພະຍາກອນມະນຸດຂອງກະຊວງ ອຄ.
ຂ່າວ-ພາບ: ໄພວັນ ສູນສະຖະຕິ ແລະຂໍ້ມູນຂ່າວສານ ຫອຄ
