ກົມເຈລະຈາການຄ້າ ແລະ ຮ່ວມມືເສດຖະກິດສາກົນ, ກະຊວງ ອຸດສາຫະກໍາ ແລະ ການຄ້າ (ອຄ) ຈັດກອງປະຊຸມ ຝຶກອົບຮົມ ກ່ຽວກັບ ສັນຍາຂອບວຽກເສດຖະກິດດິຈິຕອນ ຂອງອາຊຽນ ຂື້ນໃນລະຫວ່າງວັນທີ 24 – 25 ເມສາ 2024, ທີ່ໂຮງແຮມ ເມືອງແທັງ, ນະຄອນຫຼວງວຽງຈັນ. ໂດຍການເຂົ້າຮ່ວມເປັນປະທານຂອງ ທ່ານ ໄຊຊະນະ ໄຊຍະກອນ, ຫົວໜ້າກົມເຈລະຈາການຄ້າ ແລະ ຮ່ວມມືເສດຖະກິດສາກົນ ມີບັນດາກົມ, ພາກລັດ ແລະ ພາກທຸລະກິດເຂົ້າຮ່ວມ.
ທ່ານປະທານໄດ້ກ່າວວ່າ: ສັນຍາ DEFA ນີ້ຈະອຳນວຍຄວາມສະດວກໃຫ້ແກ່ການຄ້າດິຈິຕອນຂ້າມຊາຍແດນ, ຊ່ວຍໃຫ້ການເຮັດທຸລະກິດພາຍໃນພາກພື້ນງ່າຍດາຍຂື້ນ ໂດຍການປັບປຸງກົດລະບຽບດິຈິຕອນໃນຂົງເຂດທີ່ສໍາຄັນ ເຊັ່ນ: ການອໍານວຍຄວາມສະດວກທາງດ້ານການຄ້າດິຈິຕອນ, ການຈ່າຍເງິນ, ມາດຕະຖານ ແລະ ຂໍ້ມູນ. ໃນກອງປະຊຸມຂອງພວກເຮົາສອງມື້ນີ້ ຜູ້ເຂົ້າຮ່ວມຈະໄດ້ຮັບການບັນຍາຍຂອງ ທ່ານນາງ Leonila Guglya ຊ່ຽວຊານໂຄງການ USAID LBE, ພວກເຮົາຈະມີໂອກາດລົງເລິກເຖິງຄວາມຊັບຊ້ອນຂອງການຄ້າດິຈິຕອນໃນຫຼາຍດ້ານ ເຊັ່ນ ທຸລະກໍາທາງອີເລັກໂຕຣນິກ, ຄວາມປອດໄພທາງອິນເຕີເນັດ, ການປົກປ້ອງຜູ້ບໍລິໂພກອອນໄລ, ການພັດທະນາເຕັກໂນໂລຢີທີ່ພົ້ນເດັ່ນຂື້ນເຊັ່ນ ປັນຍາປະດິດ (Artificial Intelligence – AI), ເຊີ່ງເປັນຂົງເຂດທີ່ຈະກາຍພື້ນຖານອັນໜຶ່ງໃຫ້ກັບເສດຖະກິດຂອງພວກເຮົາໃນອະນາຄົດ. ພ້ອມທັງມີຄວາມສໍາຄັນເປັນພິເສດເພື່ອຊຸກຍູ້ຄວາມເຂົ້າໃຈຢ່າງເລິກເຊິ່ງກ່ຽວກັບການເຈລະຈາສັນຍາ DEFA ຂອງອາຊຽນ, ໂດຍສະເພາະແມ່ນຜົນກະທົບທີ່ຈະເກີດຂື້ນ ຈາກການຮັບຮອງເອົາເນື້ອໃນຂອງສັນຍາ ໃນຂອງຂະແໜງດິຈິຕອນ.
ທ່ານໃຫ້ຮູ້ຕື່ມວ່າ ເຫັນໄດ້ຈາກບັນດາປະເທດທີ່ມີການພັດທະນາເສດຖະກິດດິຈິຕອນໄປຢ່າງກ້າວໜ້ານັ້ນ, ເຫັນວ່າການຫັນເປັນດິຈິຕອນແມ່ນມີບົດບາດສູງໃນການຊຸກຍູ້ການຂະຫຍາຍໂຕຂອງເສດຖະກິດ, ເພີ່ມປະສິດທິພາບໃຫ້ກັບການຄ້າ, ແລະ ເປັນການສົ່ງເສີມນະວັດກໍາ. ຍິ່ງໄປກວ່ານັ້ນ, ໃນກອງປະຊຸມຄັ້ງນີ້ ກໍ່ແມ່ນເວທີປຶກສາຫາລືເພື່ອເປັນການພົບປະແລກປ່ຽນ ແລະ ປຶກສາຫາລືກັນ. ເຊື່ອໝັ້ນວ່າບັນດາທ່ານຈະເຂົ້າຮ່ວມການແບ່ງປັນຄວາມເຂົ້າໃຈຢ່າງຕັ້ງຫນ້າ ແລະ ມີສ່ວນຮ່ວມໃນການສົນທະນາທີ່ຈະເສີມຂະຫຍາຍຄວາມເຂົ້າໃຈລວມຂອງພວກເຮົາ, ຊຶ່ງຈະກາຍເປັນພື້ນຖານໃຫ້ກັບການຕັດສິນໃຈໃນຈຸດຢືນຂອງ ສປປ ລາວ ໃນການເຈລະຈາເນື້ອໃນສັນຍາ DEFA ຂອງອາຊຽນ. ຕໍ່ກັບເປັ້າໝາຍລວມຂອງພວກເຮົາໃນການສົ່ງເສີມເສດຖະກິດດິຈິຕອນ ແລະ ສົ່ງເສີມສະພາບແວດລ້ອມທີ່ເອື້ອອໍານວຍໃຫ້ແກ່ນະວັດຕະກໍາ ແລະ ເປັນສ່ວນໜຶ່ງໃນການປະກອບສ່ວນຕໍ່ຂະຫຍາຍໂຕຂອງເສດຖະກິດໂດຍລວມ.
ພາບ-ຂ່າວ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
