ວັນທີ 28 ພຶດສະພາ 2024 ທີ່ ຫ້ອງປະຊຸມຊັ້ນ 3, ກະຊວງອຸດສາຫະກໍາ ແລະ ການຄ້າ, ມີພິທີລົງນາມ ແຜນວຽກຮ່ວມມືສອງຝ່າຍ ສົກປີ 2024-2025 ລະຫວ່າງ ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ, ແຫ່ງ ສປປ ລາວ ແລະ ກົມຊັບສິນທາງປັນຍາ, ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ. ຫວຽດນາມ, ໃຫ້ກຽດເຂົ້າຮ່ວມເປັນສັກຄີພະຍານ ໃນພິທີລົງນາມຄັ້ງນີ້,  ທ່ານ ມະໄລທງ ກົມມະສິດ,  ລັດຖະມົນຕີ ກະຊວງອຸດສາຫະກໍາ ແລະ ການຄ້າ  ສປປ ລາວ ແລະ ທ່ານ ຫຮິ່ງ ແທງ ດາດ (Huỳnh Thành Đạt), ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ. ຫວຽດນາມ  ພ້ອມດ້ວຍບັນດາຫົວໜ້າຫ້ອງການ, ກົມ, ສະຖາບັນ ແລະ ພະນັກງານທີ່ກ່ຽວຂ້ອງສອງກະຊວງເຂົ້າຮ່ວມ.

          ຕາງໜ້າໃຫ້ແກ່ ສປປ ລາວ, ລົງນາມໂດຍ ທ່ານ ໄຊສົມເພັດ ນໍລະສິງ, ຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ສປປ ລາວ ແລະ ຕາງໜ້າ ໃຫ້ແກ່ ສສ. ຫວຽດນາມ, ລົງນາມໂດຍ ທ່ານ ລື່ ຮວງ ລ່ອງ (Lưu Hoàng Long) ຫົວນ້າກົມຊັບສິນທາງປັນຍາ, ກະຊວງວິທະຍາສາດ ແລະ ເຕັກໂນໂລຊີ ສສ. ຫວຽດນາມ.

      ຈຸດປະສົງ ການລົງນາມໃນຄັ້ງນີ້ ໂດຍປະຕິບັດຕາມບົດບັນທຶກການຮ່ວມມື ໃນຂົງເຂດວຽກງານຊັບສິນທາງປັນຍາ ລະຫວ່າງ ກົມຊັບສິນທາງປັນຍາ ສປປ ລາວ ແລະ ສຳນັກງານຊັບສິນທາງປັນຍາແຫ່ງຊາດ ສສ. ຫວຽດນາມ ລົງນາມໃນວັນທີ 7 ພະຈິກ 2015,  ເພື່ອ​ແນ​ໃສ່​ເພີ່ມ​ທະວີ​ການ​ຮ່ວມ​ມື​ ລະຫວ່າງ​ ສອງ​ປະ​ເທດ ​ໃນ​ຂົງ​ເຂດຊັບສິນທາງ​ປັນຍາ, ຜັນຂະຫຍາຍແຜນກິດຈະກໍາໃຫ້ເປັນອັນລະອຽດ ໂດຍສະເພາະ ຜ່ານການສ້າງ​ແຜນວຽກ ​ປະຈຳ​ປີ 2024-2025 ຊຶ່ງໃນແຜນວຽກດັ່ງກ່າວ ໄດ້ກໍານົດສອງແຜນວຽກ 02 ຂົງເຂດຄື: ການໄປທັດສະນະສຶກສາ ຂັ້ນບໍລິຫານ ແລະ ຂັ້ນວິຊາການ  ຢູ່ ສສ. ຫວຽດນາມ ກ່ຽວກັບນະ​ໂຍ​ບາຍ​ດ້ານ​ຊັບ​ສິນທາງປັນຍາ ແລະ ການພັດທະນາບຸກຄະລາກອນມະນຸດ ແລະ ສຶກສາແປກປ່ຽນບົດຮຽນໃນການກະກຽມເຂົ້າສົນທິສັນຍາສາກົນ ເພື່ອສ້າງຄວາມອາດສາມາດໃຫ້ພະນັກງານວິຊາການ ແລະ ເຈົ້າຫນ້າທີ່ກ່ຽວຂ້ອງ.

         ໃນການລົງນາມຮ່ວມມືຄັ້ງນີ້ ທັງສອງຝ່າຍ​ເຫັນ​ດີ​ເປັນ​ເອກະພາບກັນ ວ່າ: ຜູ້ຕາງໜ້າ​ຂອງ IP ຫວຽດນາມ ​ແລະ DIP ລາວ ຈະ​ຈັດໃຫ້ມີການພົບປະສອງຝ່າຍ ລະຫວ່າງ ກົມຊັບສິນທາງປັນຍາ ສປປ ລາວ ແລະ ກົມຊັບສິນທາງປັນຍາ ສສ ຫວຽດນາມ ຢ່າງເປັນປະຈໍາ ແລະ ຕໍ່ເນື່ອງ ເພື່ອທົບທວນ ແລະ ປະເມີນການຈັດຕັ້ງປະຕິບັດແຜນວຽກ ແລະ ກໍານົດທິດທາງການພັດທະນາວຽກງານຊັບສິນທາງປັນຍາຮ່ວມກັນໃນຕໍ່ໜ້າ.

ຂ່າວ ແລະ ຮູບພາບ: ກົມຊັບສິນທາງປັນຍາ