ວັນທີ 03 ມິຖຸນາ 2024 ທີ່ ຫ້ອງປະຊຸມໃຫຍ່ ຊັ້ນ 1 ຂອງກະຊວງອຸດສາຫະກໍາ ເເລະ ການຄ້າ ໄດ້ຈັດກອງປະຊຸມພົບປະ ເເລະ ປຶກສາຫາລື ລະຫວ່າງ ກະຊວງອຸດສາຫະກໍາ ເເລະ ການຄ້າ ເເລະ ກະຊວງກະສິກໍາ ເເລະ ປ່າໄມ້ ພາຍໃຕ້ການເປັນປະທານຮ່ວມ ລະຫວ່າງ ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກໍາ ເເລະ ການຄ້າ ເເລະ ທ່ານ ຮສ. ປອ. ລິນຄໍາ ດວງສະຫວັນ, ລັດຖະມົນຕີ ກະຊວງກະສິກໍາ ເເລະ ປ່າໄມ້. ເຂົ້າຮ່ວມກອງປະຊຸມໃນຄັ້ງນີ້ ເເມ່ນມີຮອງລັດຖະມົນຕີ, ພະນັກງານຕາງໜ້າຈາກ ຫ້ອງການ, ບັນດາກົມ ແລະ ສະຖາບັນ ຂອງສອງກະຊວງ. ພ້ອມນີ້, ກໍມີຕາງໜ້າຈາກ ຫ້ອງວ່າການສໍານັກງານນາຍົກລັດຖະມົນຕີ, ກະຊວງພາຍໃນ, ສູນສະຖິຕິແຫ່ງຊາດ, ພະເເນກອຸດສາຫະກໍາ ເເລະ ການຄ້າ ເເລະ ພະເເນກກະສິກໍາ ເເລະ ປ່າໄມ້ ນະຄອນຫຼວງວຽງຈັນ ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ.

ຈຸດປະສົງຂອງກອງປະຊຸມໃນຄັ້ງນີ້ ເເມ່ນເພື່ອ: 1) ຮັບຟັງການລາຍງານຜົນການຈັດຕັ້ງປະຕິບັດບົດບັນທຶກກອງປະຊຸມພົບປະ ເເລະ ປຶກສາຫາລືວຽກງານ ລະຫວ່າງ ກະຊວງກະສິກໍາ ເເລະ ປ່າໄມ້ ເເລະ ກະຊວງອຸດສາຫະກໍາ ເເລະ ການຄ້າ ຄັ້ງວັນທີ 14 ມິຖຸນາ 2023; 2) ປຶກສາຫາລືກົນໄກ ເເລະ ວິທີການໃນການເເກ້ໄຂບັນຫາທີ່ຍັງຄົງຄ້າງ ຂອງສອງຂະເເໜງການ ທີ່ຕ້ອງໄດ້ຮ່ວມກັນເເກ້ໄຂຕາມບົດບັນທຶກຜົນຂອງກອງປະຊຸມ ຄັ້ງວັນທີ 14​ ມິຖຸນາ 2024 ໃຫ້ຂາດຕົວ ເເລະ ມີໝາກຜົນຕົວຈິງ; ເເລະ ປຶກສາຫາລືກົນໄກ ເເລະ ວາງມາດຕະການຮ່ວມກັນໃນການຈັດຕັ້ງຜັນຂະຫຍາຍທິດຊີ້ນໍາຂອງຂັ້ນເທິງ ທີ່ມອບໝາຍໃຫ້ສອງຂະເເໜງການ ຕ້ອງມີສ່ວນຮ່ວມ ເເລະ ຄວາມຮັບຜິດຊອບຮ່ວມກັນ ເພື່ອເເກ້ໄຂບັນຫາເຄັ່ງຮ້ອນຕ່າງໆ ທີ່ ລັດຖະບານ ກໍຄືສັງຄົມໄດ້ຍົກຂຶ້ນ ໃຫ້ມີປະສິດທິພາບປະສິດທິຜົນດີຂຶ້ນກວ່າເກົ່າ ເເລະ ໄດ້ຮັບໝາກຜົນສໍາເລັດ ເທື່ອລະກ້າວ ໂດຍສະເພາະປີ່ນອ້ອມບັນຫາການຄຸ້ມຄອງລາຄາສິນຄ້າ, ການຊຸກຍູ້ສົ່ງເສີມການຜະລິດເປັນສິນຄ້າ ໃຫ້ມີຄວາມຫຼາກຫຼາຍ ເພື່ອຮັບໃຊ້ພາຍໃນ ກ້າວໄປເຖິງການຫຼຸດຜ່ອນ ເເລະ ຈໍາກັດການນໍາເຂົ້າເທື່ອລະກ້າວ.

ກອງປະຊຸມຄັ້ງນີ້ ສອງກະຊວງ ໄດ້ເຫັນດີເປັນເອກະພາບທີ່ຈະສືບຕໍ່ປະສານສົມທົບກັນ ເພື່ອປຶກສາຫາລື ແລະ ເເກ້ໄຂ ຕໍ່ກັບບາງບັນຫາຕົ້ນຕໍ ດັ່ງນີ້: 1. ກົມວິຊາການກ່ຽວຂ້ອງ ຈະສືບຕໍ່ຮ່ວມກັນລົງເລິກປຶກສາຫາລືພາລະບົດບາດໃນຂອດການຄຸ້ມຄອງລາຄາຂອງສອງຂະເເໜງການ ລວມທັງການປັບປຸງກົນໄກ ເເລະ ເເບບເເຜນວິທີການເຮັດວຽກງານຮ່ວມກັນໃນຕໍ່ໜ້າ ໃນການຮ່ວມກັນຄົ້ນຄວ້າເເກ້ໄຂບັນຫາຕົ້ນທຶນການຜະລິດ ເເລະ ຊີ້ເເຈງປັດໃຈພື້ນຖານທີ່ກະທົບຕໍ່ຕົ້ນທຶນການຜະລິດຢ່າງມີວິທະຍາສາດ, 2. ປະສານສົມທົບກັນຢ່າງເປັນປົກກະຕິ, ມີການເເລກປ່ຽນຮ່ວມກັນຕໍ່ໜ້າໃນວຽກທີ່ຍັງບໍ່ທັນຈະເເຈ້ງ ເເລະ ເຫັນວ່າຍັງມີຄວາມຊໍ້າຊ້ອນ, 3. ເອົາໃຈໃສ່ໃນການຕິດຕາມ, ກວດກາ ເເລະ ຕ້ານການຈໍາໜ່າຍ ເເລະ ການນໍາເຂົ້າສິນຄ້າກະສິກໍາທີ່ບໍ່ຖືກຕາມລະບຽບ, 4. ເອົາໃຈໃສ່ສົ່ງເສີມການຜະລິດພາຍໃນໃຫ້ຫຼາຍຂຶ້ນ ເພື່ອຫຼຸດຜ່ອນການນໍາເຂົ້າສິນຄ້າໂດຍສະເພາະເເມ່ນສິນຄ້າກະສິກໍາ, 5. ສອງກະຊວງຕ້ອງໄດ້ສ້າງເງື່ອນໄຂໃນການຜະລິດ ເເລະ ສົ່ງເສີມໃຫ້ມີຕະຫຼາດຮອງຮັບໃນການຈໍາໜ່າຍສິນຄ້າ, 6. ຄຸ້ມຄອງຕັ້ງເເຕ່ຂອດຂັ້ນການຜະລິດຈົນຮອດການຈໍາໜ່າຍໃນຕະຫຼາດ ໃຫ້ມີລາຄາທີ່ເໝາະສົມ, ແລະ ສືບຕໍ່ປຶກສາຫາລື ກ່ຽວກັບບັນຊີອຸດສາຫະກໍາປຸງເເຕ່ງຂັ້ນ 1 ເເລະ ຂັ້ນ 2 ໃຫ້ມີຄວາມຈະເເຈ້ງ.

ຂ່າວ-ພາບ: ຫ້ອງການ ອຄ