ໜ່ວຍຊາວໜຸ່ມກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງໃຫຍ່ຄັ້ງທີ III ຂອງໜ່ວຍຊາວໜຸ່ມກົມຊັບສິນທາງປັນຍາ ໃນຄັ້ງວັນທີ 5 ກໍລະກົດ 2024, ທີ່ຫ້ອງປະຊຸມໃຫຍ່ຊັ້ນ 5 ຕຶກສໍານັກງານສົ່ງເສີມຈຸລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ໂດຍການເປັນທານຮ່ວມຂອງ ສະຫາຍ ໄຊສົມເພັດ ນໍລະສິງ, ກໍາມະການຄະນະບໍລິຫານງານພັກຊວງ, ເລຂາໜ່ວຍພັກກົມຊັບສິນທາງປັນຍາ, ສະຫາຍ ວັນດີ ສີມະໂນທອງ, ຮອງເລຂາຄະນະບໍລິຫານງານ ຊປປລ ກະຊວງ ອຄ ແລະ ສະຫາຍ ນ. ລິດດາວັນ ທີລະກຸນ ເລຂາໜ່ວຍຊາວໜຸ່ມກົມຊັບສິນທາງປັນຍາ, ມີຕາງໜ້າໜ່ວຍຊາວໜຸ່ມບັນດາກົມ 13 ສະຫາຍ, ຍິງ 4 ສະຫາຍ ແລະ ສະມາຊິກຊາວໜຸ່ມພາຍໃນກົມ 40 ສະຫາຍ ຍິງ 19 ສະຫາຍ.
ສະຫາຍ ນ. ລິດດາວັນ ທີລະກຸນ ເລຂາໜ່ວຍຊາວໜຸ່ມກົມຊັບສິນທາງປັນຍາ ໄດ້ກ່າວເປີດກອງປະຊຸມໃຫຍ່ຄັ້ງທີ III ຂອງໜ່ວຍຊາວໜຸ່ມກົມ ກຊປ ວ່າ: ຈຸດປະສົງກອງປະຊຸມຄັ້ງນີ້ເພື່ອເປັນການທົບທວນຄືນການຈັດປະຕິບັດວຽກງານໃນໄລຍະ 5 ປີຜ່ານມາ ແລະ ທິດທາງແຜນການໃນ 5 ປີຕໍ່ໜ້າ, ຊຶ່ງວາລະສໍາຄັນແມ່ນ ການຜ່ານບົດລາຍງານການເມືອງ, ບົດສໍາຫຼວດການນໍາພາ ທີ່ສະແດງໃຫ້ເຫັນຜົນງານອັນພົ້ນເດັ່ນທີ່ຍາດມາໄດ້ໃນໄລຍະ 5 ປີ, ຂໍ້ສະດວກ, ຂໍ້ຫຍຸ້ງຍາກ ແລະ ວິທີຈັດຕັ້ງປະຕິບັດ ຂອງຄະນະໜ່ວຍຊາວໜຸ່ມ ກຊປ. ພ້ອມນັ້ນ ບັນດາຜູ້ແທນຊາວ ໜຸ່ມຈະໄດ້ໃຊ້ສິດປະຊາທິປະໄຕຂອງຕົນເພື່ອປ່ອນບັດຄັດເລືອກເອົາຄະນະໜ່ວຍຊາວໜຸ່ມ ກຊປ ຊຸດໃໝ່.
ກອງປະຊຸມໄດ້ເຫັນດີເປັນເອກະພາບສູງ ຕໍ່ໜ້າທີການເມືອງຂອງຕົນ ຮັບຮອງເອົາບົດລາຍງານການເມືອງ, ບົດສຳຫຼວດການນຳພາຂອງຄະນະໜ່ວຍ ແລະ ທິດທາງແຜນການຕໍ່ໜ້າ ຂອງຄະນະໜ່ວຍຊາວໜຸ່ມກົມຊັບສິນ. ພ້ອມນັ້ນ ກໍ່ປ່ອນບັດຄັດເລືອກເອົາຄະນະໜ່ວຍຊາວໜຸ່ມຊຸດໃໝ່ ສະໄໝທີ III ບົນພື້ນຖານຫຼັກການລວມສູນປະຊາທິປະໄຕ ແລະ ສອດຄອງກັບມາດຖານເງື່ອນໄຂທີ່ກໍານົດໄວ້, ມີຜູ້ສະໝັກເລືອກຕັ້ງເປັນຄະນະໜ່ວຍຊຸດໃໝ່ ຈໍານວນ 7 ສະຫາຍ. ຊຶ່ງຜົນຂອງການປ່ອນບັດຄັດເລືອກເອົາຄະນະໜ່ວຍຊຸດໃໝ່ ໄດ້ຈຳນວນ 05 ສະຫາຍ ແລະ ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາຫົວໜ້າໜ່ວຍ, ຮອງຫົວໜ້າໜ່ວຍ ແລະ ຄະນະໜ່ວຍ ຄື: 1. ສະຫາຍ ບັນຊາ ຈັນມິ່ງ ເປັນເລຂາໜ່ວຍ; 2. ສະຫາຍ ສໍລະສີນ ແສງສີລາວົງ ເປັນຮອງເລຂາໜ່ວຍ; 3. ສະຫາຍ ນ. ລັດຕະນາ ສຸທໍາມະວົງ ເປັນຮອງເລຂາໜ່ວຍ(ຜູ້ກວດກາວຽກຊາວໜູ່ມ); 4. ສະຫາຍ ພອນພະສິດ ອິນສີຊຽງໃໝ່ ເປັນຄະນະໜ່ວຍ; ແລະ 5. ສະຫາຍ ສົມສະລິດ ໄມລໍຄໍາ ເປັນຄະນະໜ່ວຍ.
ຄະນະປະທານໄດ້ໃຫ້ທິດຊີ້ນໍາວ່າ: ຊົມເຊີຍມາຍັງຄະນະໜ່ວຍຊາວໜຸ່ມ ກຊປ ຊຸດເກົ່າ ທີ່ໄດ້ສຸມໃສ່ທຸກເຮື່ອແຮງ ແລະ ສະຕິປັນຍາໃນການຊີ້ນໍາ-ນໍາພາ ສະມາຊິກພາຍໃນໜ່ວຍຊາວໜຸ່ມ ກຊປ ເຫັນວ່າໄດ້ຮັບໝາກຜົນສໍາເລັດຕາມເປົ້າໝາຍ ໃນໄລຍະຜ່ານມາ, ພ້ອມນັ້ນ ກໍໄດ້ສະແດງຄວາມຍິນດີ ແລະ ຊົມເຊີຍ ຕໍ່ຄະນະໜ່ວຍຊາວໜຸ່ມຊຸດໃໝ່. ກອງປະຊຸມໃນຄັ້ງນີ້ ເປັນບາດກ້າວທີ່ສໍາຄັນ ໃຫ້ກັບຄະນະໜ່ວຍຊາວໜຸ່ມ ກຊປ ຊູດເກົ່າ ແລະ ຊຸດໃໝ່ ໃນການປະຕິບັດໜ້າທີ່ການເມືອງຂອງຕົນ ດ້ວຍຄວາມຮັບຜິດຊອບສູງ ກໍຄື ເຮັດສຳເລັດຕາມແຜນການ 5 ປີ ຂອງຄະນະໜ່ວຍຊາວໜຸ່ມກົມ, ກໍຄືກະຊວງອຸດສາຫະກໍາ ແລະ ການຄ້າ ວາງອອກ ແລະ ເປັນກໍາລັງແຮງປະກອບສ່ວນເຂົ້າໃນການກໍ່ສ້າງ, ຊີ້ນໍາ-ນໍາພາ ສະມາຊິກຊາວໜຸ່ມ ກໍຄືສະມາຊີກພັກ ຂອງກົມຊັບສິນທາງທາງປັນຍາ ໃຫ້ນັບມື້ນັບມີຄວາມເຂັ້ມແຂງຂື້ນທາງດ້ານວຽກງານວິຊາສະເພາະ ແລະ ວຽກງານການເມືອງແນວຄິດ.
ຕອນທ້າຍສະຫາຍກ່າວວ່າ: ມີຄວາມເຊື້ອໜັ້ນ ແລະ ຕີລາຄາສູງ ຕໍ່ຄວາມຮັບຜິດຊອບ ຂອງຄະນະໜ່ວຍຊາວໜຸ່ມ ຊຸດໃໝ່ ສືບຕໍ່ຮັກສາມູນເຊື້ອຄວາມສາໝັກຄີເປັນປືກແຜນ ໃນການສ້າງສາ ແລະ ພັດທະນາວຽກງານຂອງກົມ ໃຫ້ນັບມື້ນັບພັດທະນາຂື້ນ ເພື່ອຮອງຮັບໜ້າທີ່ການເມືອງຕາມແນວທາງຂອງ ພັກ-ລັດ ວາງອອກ ໄວ້ເປັນຢ່າງດີ.
ຂ່າວ-ພາບ:ໄພ່ຄໍາອີ ສູນສະຖິຕິ ແລະ ຂໍ້ມູນຂ່າວສານ ຫອຄ
