ກົມມາດຕະຖານ ແລະ ວັດແທກ, ກະຊວງ ອຸດສາຫະກໍາ ແລະ ການຄ້າ ຈັດງານມອບລາງວັນຄຸນນະພາບ ແຫ່ງຊາດ (Laos Quality Award 2024) ໃຫ້ຜູ້ປະກອບການ 12 ບໍລິສັດຂອງລາວ ທີ່ຄັດເລືອກຈາກ 100 ບໍລິສັດ ໃນນັ້ນ ມີລາງວັນຄໍາ 8 ບໍລິສັດ, ລາງວັນເງິນ 4 ບໍລິສັດ ແລະ ມອບໃບຢັ້ງຢືນກາໝາຍມາດຕະຖານແຫ່ງຊາດໃຫ້ແກ່ 4 ສັດ.

ພິທີດັ່ງກ່າວຈັດຂຶ້ນໃນວັນທີ 2 ຕຸລາ 2024 ທີ່ສູນການຄ້າລາວໄອເຕັກ ນະຄອນຫຼວງວຽງຈັນ ເຂົ້າຮ່ວມຂອງທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ, ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງ ອຄ, ທ່ານ ນາງ ຈັນທະຈອນ ວົງໄຊ ຮອງປະທານ ສະພາການຄ້າ ແລະ ອຸດສາຫະກໍາແຫ່ງຊາດລາວ, ມີຕາງໜ້າຈາກທາງພາກລັດ ແລະ ຜູ້ປະກອບການ ເຂົ້າຮ່ວມ.

ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ ໄດ້ກ່າວວ່າ: ຈຸດປະສົງການຈັດງານໃນຄັ້ງນີ້ ເພື່ອເປັນການຜັນຂະຫຍາຍເນື້ອໃນຕາມທິດຊີ້ນໍາຂອງລັດຖະບານ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ, ການຜັນຂະຫຍາຍຂໍ້ຕົກລົງ 91/ນຍ ແລະ ແຈ້ງການເລກທີ 1288/ຫສນຍ, ໂດຍສະເພາະແມ່ນການຊຸກຍູ້ສົ່ງເສີມໃຫ້ມີການຜະລິດພາຍໃນ, ຊົມໃຊ້ພາຍໃນ, ໃຫ້ກ້າວໄປສູ່ການສົ່ງອອກ ແລະ ຈຳກັດການນຳເຂົ້າ; ເພື່ອເປັນການສະໜັບສະໜູນການນໍາເອົາແນວທາງລາງວັນຄຸນນະພາບແຫ່ງຊາດ ໄປໃຊ້ໃນການປັບປຸງຄວາມສາ ມາດໃນການແຂ່ງຂັນ; ເພື່ອເປັນການຍ້ອງຍໍສັນລະເສີນໃຫ້ແກ່ບໍລິສັດ, ໂຮງງານ ທີ່ດຳເນີນການຜະລິດ ໂດຍປະສົບຜົນສຳເລັດຕາມມາດຕະຖານແຫ່ງຊາດ, ພາກພື້ນ ແລະ ສາກົນ; ເພື່ອເປັນການກະຕຸ້ນໃຫ້ມີການຮຽນຮູ້ ແລະ ແລກ ປ່ຽນວິທີການຜະລິດ ແລະ ຄວບຄຸມຄຸນນະພາບ ທີ່ເປັນເລີດ; ເພື່ອສະແດງໃຫ້ພາກພື້ນ ແລະ ສາກົນ ເຫັນໄດ້ເຖິງຄວາມມຸ່ງໝັ້ນ ໃນການຍົກລະດັບມາດຕະຖານໃຫ້ມີຄວາມເປັນເລີດ ໃນການບໍລິການຫານຈັດການທາງດ້ານມາດຕະຖານ ແລະຄຸນນະພາບ.

ສໍາລັບ ການຄັດເລືອກເອົາຫົວໜ່ວຍ ເຂົ້າຮ່ວມແຂ່ງຂັນ ແລະ ພິຈາລະນາຄັດເລືອກລາງວັນ ຄຸນນະພາບ ແຫ່ງຊາດ ໃນຄັ້ງນີ້ມີບໍລິສັດເຂົ້າຮ່ວມຄັດເລືອກຫຼາຍກ່ວາ 100 ບໍລິສັດ ເຊິ່ງປະກອບມີຫຼາຍຂົງເຂດຜະລິດຕະພັນ ເຊັ່ນ: ຂົງເຂດຜະລິດຕະພັນ ວັດສະດຸການກໍ່ສ້າງ, ຂົງເຂດຜະລິດຕະພັນອາຫານ ແລະ ເຄື່ອງດື່ມ, ຂົງເຂດຜະລິດຕະພັນກະສິກຳ ແລະ ຂົງເຂດອື່ນໆ. ຜ່ານການລົງຊຸກຍູ້, ຕິດຕາມ, ກວດກາ ແລະ ປະເມີນຂອງກົມມາດຕະຖານ ແລະ ວັດແທກ ຮ່ວມກັບພະແນກອຸດສາຫະກໍາ ແລະ ການຄ້າ ແຂວງ ແລະ ຄະນະກຳມະການເຕັກນິກ ແຫ່ງຊາດ ໃນປີ 2024 ໂດຍອີງໃສ່ມາດຖານ, ເງື່ອນໄຂ ແລະ ລະບຽບການ ເຊັ່ນ, ການວາງແຜນຍຸດທະສາດ, ນະໂຍບາຍຕໍ່ລູກຄ້າ ແລະ ຕະຫຼາດ, ການຂຶ້ນທະບຽນ ແລະ ການນໍາໃຊ້ກາໝາຍມາດຕະຖານຜະລິດຕະພັນສິນຄ້າ, ການກວດສອບຄຸນນະພາບ ຜະລິດຕະພັນສິນຄ້າ, ການຄຸ້ມຄອງ ແລະ ພັດທະນາແຮງງານ, ການບໍລິຫານ ໃນການຈັດຕັ້ງປະຕິບັດວຽກງານ ແລະ ໝາກຜົນຂອງການເຄື່ອນໄຫວ.

ຜ່ານການຄັດເລືອກສາມາດເລືອກໄດ້ບໍລິສັດທີ່ໄດ້ຮັບລາງວັນຄຳ 8 ບໍລິສັດ, ລາງວັນເງິນ 4 ບໍລິສັດ ແລະ ແລະ 4 ບໍລິສັດໄດ້ຮັບໃບຢັ້ງຢືນກາໝາຍມາດຕະຖານແຫ່ງຊາດ, ບໍລິສັດທີ່ໄດ້ຮັບ ລາງວັນຄຳ 8 ບໍລິສັດ ໄດ້ແກ່: ບໍລິສັດ ວຽງຈັນຫົງຊື້ໃສທິລາດຊີມັງ ຈຳກັດ, ບໍລິສັດ ຄຳມ່ວນຊີມັງ ຈຳກັດ, ບໍລິສັດ ຄຸນຄຳສະຕຣີອິນດັສທຣີ ຈຳກັດ, ບໍລິສັດ ນະຄອນຫຼວງອຸດສາຫະກຳເຫຼັກ ຈຳກັດ, ໂຮງງານອຸດສາຫະກຳ ໂຕໂຢລາວ ຈໍາກັດຜູ້ດຽວ, ບໍລິສັດ ທໍ່ນໍ້າລາວ ເທັກໂນໂລຊີ ຈຳກັດຜູ້ດຽວ, ໂຮງງານ ຜະລິດກະເບື້ອງກາສິງ ຈຳກັດ ແລະ ບໍລິສັດ ເບຍລາວ ຈຳກັດ.

ບໍລິສັດທີ່ໄດ້ຮັບ ລາງວັນເງິນ 4 ບໍລິສັດໄດ້ແກ່: ໂຮງງານ ຜະລິດນໍ້າດື່ມ ແລະ ນໍ້າກ້ອນໂລມາຄຳ ສ່ວນບຸກຄົນ, ບໍລິສັດ ນໍ້າຕານມິດລາວ ຈຳກັດ, ບໍລິສັດ ຊີມັງລາວ-ສະຫັວນນະເຂດ ຈຳກັດ ແລະ ບໍລິສັດ ຈຸງຢາອິຊີ ຊີມັງລາວ ຈຳກັດ ແລະ ບໍລິສັດໄດ້ຮັບໃບຢັ້ງຢືນກາໝາຍມາດຕະຖານແຫ່ງຊາດຄື: ສະຫະກອນຊາວສວນ ໃຈກາເຟ, ສະຫະກອນກາເຟວັນໃໝ່, ໂຮງສີເຂົ້າຍອດອ້ອຍ ແລະ ບໍລິສັດ ຢູ່ນີ້ຄອບຟີ ຈຳກັດ.

ສໍາລັບ ຄາດຄະເນຜົນໄດ້ຮັບ ເປັນການຊ່ວຍກະຕຸ້ນຊຸກຍູ້ ເສດຖະກິດພາຍໃນປະເທດ ເວົ້າລວມກໍຄື ພາກເອກະຊົນ ໂດຍສະເພາະເສດຖະກິດ ມະຫາພາກ ໃຫ້ມີການຂະຫຍາຍຕົວເພີ່ມຂຶ້ນ; ບໍລິສັດ/ໂຮງງານ ທີ່ເຂົ້າຮ່ວມຄັດເລືອກລາງວັນຄຸນນະພາບ ແຫ່ງຊາດ ຈະໄດ້ຮັບຜົນປະໂຫຍດໃນທຸກຂັ້ນຕອນ ເຊິ່ງເລີ່ມຈາກການກວດກາປະເມີນຕົນເອງ ຜູ້ບໍລິຫານຈະຮັບຮູ້ເຖິງສະພາບທີ່ແທ້ຈິງ ວ່າລະບົບການບໍລິຫານຈັດການຂອງຕົນ ຍັງມີຂໍ້ບົກຜ່ອງໃນດ້ານໃດ ຈຶ່ງຈະສາມາດກຳນົດວິທີການ ແລະ ເປົ້າໝາຍທີ່ຊັດເຈນ ໃນການສ້າງແຜນດຳເນີນງານເມື່ອບໍລິສັດ/ໂຮງງານ ໄດ້ຈັດຕັ້ງປະຕິບັດຕາມແຜນຈົນບັນລຸເປົ້າໝາຍທີ່ວາງໄວ້ ມີຄວາມພ້ອມ ແລະ ຕັດສິນໃຈເຂົ້າຮ່ວມຄັດເລືອກລາງວັນ, ບໍລິສັດ/ໂຮງງານ ຈະໄດ້ຮັບການລົງຕິດຕາມກວດກາ ປະເມີນດ້ວຍລະບົບແລະ ຂະບວນການທີ່ມີປະສິດທິຜົນ ຈາກຄະນະກຳມະການເຕັກນິກແຫ່ງຊາດ ໃນແຕ່ລະຂົງເຂດຜະລິດຕະພັນ ເຊິ່ງປະກອບມາຈາກຫຼາຍຂະແໜງການ ທັງພາກລັດ ແລະ ເອກກະຊົນ. 

ສຳລັບການກວດກາປະເມີນ ບໍລິສັດ/ໂຮງງານ ທີ່ໄດ້ຮັບ ຫຼື ບໍ່ໄດ້ຮັບລາງວັນ ຈະໄດ້ຮັບລາຍງານ ກ່ຽວກັບຈຸດດີ ແລະ ຈຸດທີ່ຄວນມີການປັບປຸງແກ້ໄຂ ເຊິ່ງຖືວ່າເປັນປະໂຫຍດຕໍ່ການນຳເອົາບັນຫາດັ່ງກ່າວ ໄປວາງແຜນປັບປຸງແກ້ໄຂ ບໍລິສັດ/ໂຮງງານ ໃຫ້ຄົບຖ້ວນສົມບູນຫຼາຍຂຶ້ນ, ບໍລິສັດ/ໂຮງງານ ທີ່ໄດ້ຮັບລາງວັນຄຸນນະພາບ ແຫ່ງຊາດ ຈະເປັນທີ່ຍອມຮັບຈາກອົງກອນຕ່າງໆທັງພາຍໃນ ແລະ ຕ່າງປະເທດ ແລະ ມີສິດໃຊ້ໂລ້ລາງວັນຄຸນນະພາບແຫ່ງຊາດ ເຊິ່ງບົ່ງບອກເຖິງຄວາມເປັນເລີດໃນລະບົບການບໍລິຫານຈັດການ ໃນການໂຄສະນາເຜີຍແຜ່ ບໍລິສັດ/ໂຮງງານຂອງຕົນ. ລວມທັງມີໂອກາດສົ່ງເສີມ ແລະ ສະໜັບສະໜູນການພັດທະນາຂີດຄວາມສາມາດ ໃນການແຂ່ງຂັນຂອງປະເທດ ໂດຍການນໍາສະເໜີວິທີການຈັດຕັ້ງປະຕິບັດ ທີ່ນໍາໄປສູ່ຄວາມສໍາເລັດ ແລະ ເປີດໂອກາດ ໃຫ້ມີການເຂົ້າຢ້ຽມຊົມ ບໍລິສັດ/ໂຮງງານ ເພື່ອເປັນແບບຢ່າງໃຫ້ແກ່ ຜູ້ໍປະກອບການ ອື່ນໆ ນຳໄປປັບປຸງ ໃຫ້ປະສົບຜົນສຳເລັດເຊັ່ນດຽວກັນ.

ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ