ກົມມາດຕະຖານ ແລະ ວັດແທກ ກະຊວງອຸດສາຫະກໍາ ແລະ ການຄ້າ ຈັດກອງປະຊຸມສຳມະນາ ການຈັດຕັ້ງປະຕິບັດວຽກງານການຢັ້ງຢືນກາໝາຍ ຄຸນນະພາບ (Q-Mark) ແລະ ສິນຄ້າຫຸ້ມຫໍ່ (L-Mark) ຂື້ນໃນວັນທີ 25 ຕຸລາ 2024 ທີ່ ໂຮງແຮມ ຄຣາວພາຊາ ນະຄອນຫຼວງວຽງຈັນ ເປັນປະທານ ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ມີຜູ້ຊ່ຽວຊານຈາກ ອົງການມາດຕະຖານ ສ. ເກົາຫຼີ, ຜູ້ຕາງໜ້າຈາກ ພາກທຸລະກິດຂະແໜງການຜະລິດອຸດສາຫະກໍາ ເຂົ້າຮ່ວມ.

ກອງປະຊຸມສຳມະນາ ການຈັດຕັ້ງປະຕິບັດວຽກງານການຢັ້ງຢືນກາໝາຍ ຄຸນນະພາບ (Q-Mark) ແລະ ສິນຄ້າຫຸ້ມຫໍ່ (L-Mark) ພາຍໃຕ້ໂຄງການສ້າງຄວມເຂັ້ມແຂງພື້ນຖານໂຄງລ່າງດ້ານຄຸນນະພາບ ຂອງອົງການມາດຕະຖານ ສ. ເກົາຫຼີ. ເພື່ອເສີມສ້າງຄວາມຮັບຮູ້ ແລະ ຄວາມເຂົ້າໃຈໃນການຢັ້ງຢືນກາໝາຍດັ່ງກ່າວ ໂດຍສະເພາະວຽກງານກວດສອບຄວາມປອດໄພຂອງເຄື່ອງອຸປະກອນໄຟຟ້າ-ເອເລັກໂຕຣນິກ ແລະ ການກວດສອບສິນຄ້າຫຸ້ມຫໍ່ ເພື່ອເປັນການຊຸກຍູ້ສົ່ງເສີມຜະລິດຕະພັນ ແລະ ສິນຄ້າພາຍໃນປະເທດ ໃຫ້ມີຄຸນນະພາບ ແລະ ມາດຕະຖານ ຖືກຕ້ອງສອດຄ່ອງກັບມາດຕະຖານພາກພື້ນ ແລະ ສາກົນ.  ເຊິ່ງເປັນສ່ວນໜຶ່ງ ໃນການປະກອບສ່ວນເຂົ້າໃນການສົ່ງເສີມການຊົມໃຊ້ສິນຄ້າພາຍໃນ, ຫຼຸດຜ່ອນການນຳເຂົ້າ ແລະ ສົ່ງເສີມການສົ່ງອອກ ເພື່ອແກ້ໄຂຄວາມຍຸ້ງຍາກທາງດ້ານເສດຖະກິດຂອງຊາດ.

ພາຍໃຕ້ໂຄງການດັ່ງກ່າວ, ໃນປີນີ້ໂຄງການໄດ້ໃຫ້ການຊ່ວຍເຫຼືອດ້ານເຄື່ອງມືອຸປະກອນໃຫ້ແກ່ກົມມາດຕະ ຖານ ແລະ ວັດແທກ ຄື: ເຄື່ອງສອບທຽບຄວາມຍາວ (ໄມ້ແມັດ), ແມ່ແບບນ້ຳໜັກ, ຊິງຊັ່ງຫ້ອງທົດລອງ, ເຄື່ອງກວດສອບຄວາມທົນທານຕໍ່ແຮງຫັກຂອງສາຍໄຟ, ສາຍເຄເບີ່ນ,ສາຍໂທລະສັບ, ສາຍສາກ, ເຄື່ອງກວດສອບຄວາມທົນທານ, ເຄື່ອງກວດສອບແຮງດັນຂອງກະແສໄຟຟ້າ, ເຄື່ອງກວດສອບ ອຸນນະພູມຂອງເຄື່ອງໃຊ້ໄຟຟ້າ,       ເຄື່ອງກວດສອບກະແສໄຟຮົ່ວ, ເຄື່ອງກວດສອບເປືອກຫຸ້ມສາຍໄຟ, ເຄື່ອງກວດສອບປະສິດທິພາບຂອງເຄື່ອງໃຊ້ໄຟຟ້າ ແລະ ເຄື່ອງກວດສອບຄວາມທົນທານຂອງສາຍໄຟ   ລວມເປັນມູນຄ່າ 100.000 ໂດລາສະຫະລັດອາເມລິກາ ເຊິ່ງບັນດາເຄື່ອງມືດັ່ງກ່າວສາມາດກວດສອບໄດ້ເຊັ່ນ: ໄມ້ແມັດ, ແມ່ແບບນໍ້າໜັກ, ຊິງຊັ່ງ, ຕູ້ເຢັນ, ຕູ້ແຊ່, ໃດເປົ່າຜົມ, ໝໍ້ຫຸ່ງເຂົ້າ, ເຕົາລິດ, ໝໍ້ກະທະໄຟຟ້າ, ໝໍ້ຕົ້ມນໍ້າ ແລະ ອື່ນໆ.

ວຽກງານການຢັ້ງຢືນກາໝາຍຄຸນນະພາບ ແລະ ສິນຄ້າຫຸ້ມຫໍ່ ຂອງ ສປປ ລາວ ເຮົາໄດ້ມີການເຄື່ອນໄຫວຢ່າງຕັ້ງໜ້າພາຍໃຕ້ການມອບໝາຍໜ້າທີ່ ແລະ ຄວາມຮັບຜິດຊອບໃຫ້ແກ່ ກົມມາດຕະຖານ ແລະ ວັດແທກ , ກະຊວງອຸດສາຫະກໍາ ແລະ ການຄ້າ. ໃນຊຸມປີຜ່ານມາ, ພາຍໃຕ້ຄວາມຮັບຜິດຊອບດັ່ງກ່າວ ສາມາດສ້າງໄດ້ບັນດາ ນິຕິກຳໃນການຄຸ້ມຄອງ, ພັດທະນາ ແລະ ບໍລິການວຽກງານການກວດສອບ ກໍຄື ການສ້າງກົດໝາຍ, ດຳລັດ, ບັນດານິຕິກໍາ ລຸ່ມກົດໝາຍ ເພື່ອເປັນການຊຸກຍູ້ ການຢັ້ງຢືນກາໝາຍໃຫ້ແກ່ຜະລິດຕະພັນສິນຄ້າ ທີ່ມີຄຸນນະພາບ ແລະ ມາດຕະຖານ ໃຫ້ແກ່ບັນດາບໍລິສັດ ແລະ ໂຮງງານ ທີ່ສອດຄ່ອງກັບຫຼັກການ, ລະບຽບ ແລະ ກົດໝາຍ ຂອງ ພາກພື້ນ ແລະ ສາກົນ.

ຂ່າວ-ພາບ: ກົມມາດຕະຖານ ແລະ ວັດແທກ