ສະມາຄົມຫັດຖະກຳລາວ ຮ່ວມກັບ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ກົມສົ່ງເສີມການຄ້າ ແລະ ຫັດຖະກໍາ ກະຊວງອຸດສາຫະກໍາ ແລະ ການຄ້າ ໄດ້ເປິດງານມະຫາກຳ ສີມືຫັດຖະກຳລາວ ຄັ້ງທີ 23 ປະຈຳປີ 2024 ຂຶ້ນຢ່າງເປັນທາງການ, ໃນວັນທີ 28 ຕຸລານີ້ ທີ່ສູນການຄ້າລາວ-ໄອເຕັກ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ, ທ່ານ ນາງ ນາລີ ສີສຸລິດ ປະທານຄະນະທີ່ປຶກສາ ສະມາຄົມ ຫັດຖະກຳລາວ ແລະ ແຂກຖືກເຊີນເຂົ້າຮ່ວມ.
ທ່ານ ພູທອງ ໄຊສະນິດ ຮອງປະທານສະມາຄົມຫັດຖະກຳລາວ ໄດ້ລາຍງານວ່າ: ງານມະຫາກຳສີມືຫັດຖະກຳລາວ ຄັ້ງທີ 23 ປະຈຳປີ 2024 ຈັດຂຶ້ນພາຍໃຕ້ຄໍາ ຂວັນທີ່ວ່າ: ສີໄມ້ລາຍມື ຄື ອຸທິຍານແຫ່ງການທ່ອງທ່ຽວ “ເຊື່ອມໂຍງມໍລະດົກຜ້າແພພື້ນເມືອງອາຊຽນ”, ແລະ ຈຸດປະສົງຫຼັກ: ເພື່ອສະເຫຼີມສະຫຼອງ “ວັນຫັດຖະກຳລາວ ວັນທີ 1 ພະຈິກ ເພື່ອສ້າງຂະບວນການຄໍານັບຮັບຕ້ອນ ເປັນເຈົ້າພາບ ຈັດກອງປະຊຸມສໍາມະນາການຕໍ່າແຜ່ນແພພື້ນເມືອງ ອາຊຽນ ຄັ້ງທີ 9 (The 9th ASEAN Traditional Textiles Symposium) ຊຶ່ງຈະໄດ້ຈັດຂຶ້ນໃນວັນທີ 4-6 ພະຈິກ ປີ 2024 ທີ່ ນະຄອນຫຼວງວຽງ ຈັນ, ເພື່ອສ້າງຂະບວນ ການຕ້ອນຮັບປີທ່ອງທ່ຽວລາວ ປີ 2024 ເປັນສະຖານທີ່ທ່ອງທ່ຽວ ດ້ານຫັດຖະກຳ ດັ່ງຄໍາຂັວນ “ສີໄມ້ລາຍມືຄືອຸທິ ຍານແຫ່ງການທ່ອງທ່ຽວ”,ສະເຫຼີມສະຫຼອງ “ຫັດຖະກຳ ພູມປັນຍາການຕໍ່າລາຍ ນາກຂອງຊຸມຊົນເຊື້ອຊາດລາວ” ໄດ້ຮັບເປັນມໍຣະດົກໂລກ ຈາກອົງການ UNESCO, ເພື່ອສ້າງກາລະໂອກາດ ໃຫ້ຊຸມຊົນ ແລະ ລູກຄ້າ ຜູ້ມາທ່ຽວ ຊົມທ່ຽວຊີ້ ໄດ້ພົບ-ໄດ້ເຫັນ ຄວາມຫຼາກຫຼາຍຂອງເຄື່ອງ ຫັດຖະກຳລາວ, ສ້າງຄວາມປະທັບໃຈ ແລະ ຫລົງໄຫຼ ໃນຄວາມມະຫັດສະຈັນຂອງສີໄມ້ລາຍມື ຂອງນາຍ ຊ່າງຫັດຖະກຳລາວເຮົາ, ເພື່ອເຕົ້າໂຮມຄວາມສາມັກຄີ ບັນດາ ຊາວຊ່າງຫັດຖະກຳທຸກໆທ້ອງຖິ່ນໃນທົ່ວປະເທດ ພ້ອມກັນອະນຸລັກ ແລະ ສົ່ງເສີມເຄື່ອງຫັດຖະກຳ ທີ່ມີລັກສະ ນະເປັນມູນເຊື້ອ, ສົ່ງເສີມພູມປັນຍາ, ຂຸດຄົ້ນ ທ່າແຮງທາງດ້ານຫັດຖະກຳ ຢູ່ທຸກທ້ອງຖິ່ນ ປະກອບສ່ວນ ເຂົ້າໃນ ການສ້າງລາຍຮັບ ແລະ ພັດທະນາຊີວິດການເປັນຢູ່ ຂອງທ້ອງຖິ່ນໃຫ້ ນັບມື້ດີຂຶ້ນ, ເພື່ອໃຫ້ບັນດາຊາວຊ່າງ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດ ເຂົ້າເຖິງ ການ ຕະຫຼາດ (ຫຼື ມີບ່ອນຂາຍ) ຜະລິດຕະພັນຫັດຖະ ກຳຂອງຕົນ ພ້ອມທັງ ໄດ້ມີໂອກາດພົບ ປະແລກປ່ຽນບົດຮຽນ, ປະສົບການ ທາງດ້ານການຜະລິດ, ການວາງສະແດງ ແລະ ການຂາຍ, ເພື່ອສະໜັບສະໜູນນະໂຍບາຍ ຂອງລັດ ຖະບານ ໃນການແກ້ໄຂຄວາມທຸກຍາກໃຫ້ ປະຊາຊົນ ແລະ ເພື່ອສ້າງສາຍສຳພັນກັບບັນດາ ປະເທດສະມາ ຊິກອາຊຽນ ດ້ານສິລະປະຫັດຖະກຳ.
ງານມະຫາກຳສີມືຫັດຖະກຳລາວໄດ້ຈັດຂຶ້ນທີ່ສູນວາງສະແດງສິນຄ້າ ລາວ-ໄອເຕັກ ໃຊ້ໄລຍະເວລາ 9 ວັນ, ເລີ່ມແຕ່ວັນທີ 26 ຕຸລາ ຫາ ວັນທີ 3 ພະຈິກ 2024 ຊຶ່ງມີການວາງສະແດງ-ຂາຍ ສິນຄ້າຫັດຖະກຳ ຂອງຫຼາຍພາກ ສ່ວນຄື: ພາກສ່ວນ ແຜ່ນແພ (ຜ້າໄໝ ຜ້າຝ້າຍ), ພາກສ່ວນ ເຄື່ອງປະດັບ (ເງິນ ຄໍາ ແກ້ວປະເສີດ),ພາກສ່ວນ ເຄື່ອງຈັກສານ (ຫວາຍ-ໄມ້ປ່ອງ) ພາກສ່ວນ ຜະລິດຕະພັນວັດທະນະທໍາ (ເຄື່ອງປັ້ນດິນ ເຜົາ, ໄມ້ແກະສະຫຼັກ, ເຄື່ອງດົນຕີ ພື້ນເມືອງ ແລະ ອື່ນໆ…). ພາກສ່ວນ ເຟີນິເຈີ, ພາກສ່ວນ ອາຫານສໍາເລັດຮູບ ພື້ນເມືອງ, ສະໝຸນໄພ ແລະ ອື່ນໆ, ລວມທັງໝົດ: 243 ຮ້ານ (ຫຼື ບຸດ) ພາກສ່ວນຮ່ວມວາງສະແດງມີຊາວ ຊ່າງຫັດຖະກຳລາວ ຈາກ ບັນດາແຂວງຕ່າງໆ, ກົມສົ່ງເສີມການຄ້າ ແລະ ຫັດຖະກຳ ກະຊວງ ອຸດສາຫະກຳ ແລະ ການຄ້າ, ໂຄງການ USAID-CBI, Mottainai project,HABI: THE PHILIPPINE TEXTILE COUNCIL INC. ພ້ອມກັນນີ້ ພາຍໃນງານຍັງມີກິດຈະກຳສຳມະນາຫົວຂໍ້ ປັບປຸງເຕັກນິກການຕໍ່າຜ້າຝ້າຍ, ເຜີຍ ແຜ່ການນໍາໃຊ້ກາໝາຍຫັດຖະກຳ ແຫ່ງຊາດ ແລະຫົວຂໍ້ສົ່ງເສີມການເຂົ້າເຖິງຕະຫຼາດເອີຣົບ (ໂຄງການ USAID-CBI) ແລະ ກິດຈະກຳ ປະກວດ ການແຂ່ງຂັນຜະລິດຕະພັນດີເດັ່ນ, ກິດຈະກຳສາທິດຂັ້ນຕອນການຜະລິດສິນ ຄ້າຫັດຖະກຳ, ການເດີນແບບອາພອນ ແລະ ອື່ນໆ.
ທ່ານ ນາງ ສຸວິດາ ປະເສີດ ປະທານສະມາຄົມຫັດຖະກຳລາວ ກ່າວເປີດການຢ່າງເປັນທາງການວ່າ: ງານມະ ຫາກຳສີມືຫັດຖະກຳລາວ” ຄັ້ງທີ 23 ປະຈຳປີ 2024 ຄັ້ງນີ້ ແມ່ນມີຄວາມໝາຍ-ມີຄວາມສໍາຄັນຍິ່ງ ສໍາລັບ ສະມາຊິກສະມາຄົມຫັດຖະກຳ, ຊາວຊ່າງ, ຜູ້ປະກອບການດ້ານຫັດຖະກຳ ແລະ ຊາວລາວທຸກຖ້ວນໜ້າ, “ງານມະ ຫາກຳສິມີຫັດຖະກຳລາວ ຄັ້ງນີ້ ນອກຈາກເປັນການສ້າງກາລະໂອກາດໃຫ້ບັນດາຊາວຊ່າງຫັດຖະກຳທຸກທ້ອງຖິ່ນ ເຂດແຂວງໃນທົ່ວປະເທດແລະຜູ້ປະກອບການດ້ານຫັດຖະກຳ ໄດ້ເຂົ້າເຖິງການຕະຫຼາດ ມີບ່ອນວາງສະແດງ ແລະ ຈຳໜ່າຍຜະລິດຕະພັນຫັດຖະກຳຂອງຕົນ, ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ, ປະສົບການກ່ຽວກັບເຕັກນິກການວາງສະແດງ ແລະ ການຂາຍແລ້ວ, ການຈັດງານມະຫາກຳສີມີ ຫັດຖະກຳລາວ ຍັງເປັນການສ້າງຂະບວນການຄ້ານັບຮັບຕ້ອນ ແລະ ສະເຫຼີມສະຫຼອງ “ວັນຫັດຖະກຳລາວ ວັນທີ 1 ພະຈິກ”. ພິເສດແມ່ນ ເປັນການສ້າງຂະບວນການ ແລະ ຈັດວາງສະແດງ ເພື່ອຄຳນັບຮັບຕ້ອນ ກອງປະຊຸມສຳມະນາ ກ່ຽວກັບຜ້າແພພື້ນເມືອງອາຊຽນ ຄັ້ງທີ 9 (The 9th ASEAN Traditional Textiles Symposium) ທີ່ ສປປ ລາວ ເປັນເຈົ້າພາບ ແລະ ກອງປະຊຸມດັ່ງກ່າວຈະໄດ້ເປີດຂຶ້ນ ໃນລະຫວ່າງວັນທີ 4 ຫາວັນທີ 6 ພະຈິກ 2024 ໃນມໍ່ໆ ອີກ 6 ວັນຂ້າງໜ້ານີ້ ແລະ ຄາດວ່າຈະມີຜູ້ແທນກອງປະຊຸມ ຈາກປະເທດອາຊ່ຽນ ແລະ ຈາກປະເທດຕ່າງໆ ທົ່ວໂລກ ເຂົ້າມາຢ້ຽມຊົມ ງານມະຫາກຳສີມີຫັດຖະກຳລາວຄັ້ງນີ້ ປະມານ 500 ທ່ານ.
ໃນໂອກາດດັ່ງກ່າວ ທ່ານ ກິແກ້ວ ໄຂຄຳພິທູນ ໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ການເປີດງານດັ່ງກ່າວຢ່າງເປັນທາງການ, ຈາກນັ້ນບັນດາແຂກທີ່ເຂົ້າຮ່ວມໄດ້ໄປຢ້ຽມຊົມ ບັນດາບໍລິສັດ, ຫ້້າງ, ຮ້ານທີ່ນຳເອົາສິນຄ້າມາສະແດງໃນງານອີກດ້ວຍ.
ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ
