ກອງປະຊຸມການສ້າງຄວາມເຂັ້ມແຂງໃຫ້ແກ່ການຄຸ້ມຄອງເສດຖະກິດຂັ້ນແຂວງ ໂດຍສານຕໍ່ຂໍ້ລິເລີ່ມການອຳນວຍຄວາມສະດວກຂັ້ນແຂວງຕໍ່ກັບການຄ້າ ແລະ ການລົງທຶນ ຈັດຂື້ນໃນວັນທີ 14 ຕຸລາ 2024 ຜ່ານມາ, ທີ່ ໂຮງແຮມ ເດີແກຣນ ຫຼວງພະບາງ ເປັນປະທານຮ່ວມຂອງທ່ານ ນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ບູນເຫຼືອ ສິນໄຊວໍຣະວົງ ຮອງເຈົ້າແຂວງຫຼວງພະບາງ, ມີຕາງໜ້າຈາກກະຊວງກ່ຽວຂ້ອງ, ຊ່ຽວຊານຂອງໂຄງການ ແລະ ມະຫາວິທະຍາໄລແຫ່ງຊາດ, ອົງການມູນນິທິເອເຊຍປະຈຳລາວ, ຂະແໜງການຢູ່ຂັ້ນທ້ອງຖິ່ນທີ່ຕິດພັນກັບການອຳນວຍຄວາມສະດວກທາງດ້ານການຄ້າ ແລະ ການລົງທຶນ 7 ແຂວງພາກເໜືອພ້ອມດ້ວຍຜູ້ຕາງໜ້າພາກທຸລະກິດເຂົ້າຮ່ວມ.

ທ່ານ ນາງ ຈັນສຸກ ແສງພະຈັນ ໄດ້ມີຄຳເຫັນວ່າ: ‘‘ການສ້າງຄວາມເຂັ້ມແຂງໃຫ້ແກ່ການຄຸ້ມຄອງເສດຖະກິດຂັ້ນແຂວງ ໂດຍສານຕໍ່ຂໍ້ລິເລີ່ມການອໍານວຍຄວາມສະດວກຂັ້ນແຂວງຕໍ່ກັບການຄ້າ ແລະ ການລົງທຶນ’’ ເຊິ່ງໄດ້ຮັບທຶນຊ່ວຍເຫຼືອຈາກກະຊວງການຕ່າງປະເທດ ແລະ ການຄ້າ ປະເທດອົດສະຕາລີ, ນອກນັ້ນ, ໃນໄລຍະການດໍາໂຄງການ ພວກເຮົາກໍ່ໄດ້ຮັບການສະໜັບສະໜູນຈາກກະຊວງການຕ່າງປະເທດ (ລາວ) ແລະ ກະຊວງອຸດສາຫະກໍາ ແລະ ການຄ້າ, ສະພາການຄ້າ ແລະ ອຸດສາຫະ ກຳແຫ່ງຊາດ; ໂດຍອີງຕາມ ແຜນການຈັດຕັ້ງປະຕິບັດໂຄງການແມ່ນມີ 3 ກິດຈະກໍາຄື: 1 ການສໍາຫຼວດຫົວໜ່ວຍທຸລະກິດ ແລະ ການສໍາຫຼວດພາກລັດ; 2 ການຂຽນບົດລາຍງານຈາກຜົນການສໍາຫຼວດ ແລະ ການເຜີຍແຜ່ຜົນຂອງບົດສຶກສາ ແລະ 3 ການສ້າງຄວາມເຂັ້ມແຂງໃຫ້ແກ່ພະນັກງານ ແລະ ອົງກອນທ້ອງຖິ່ນທີ່ຕິດພັນກັບການອໍານວຍຄວາມສະດວກທາງດ້ານການຄ້າ ແລະ ການລົງທຶນ (ໂດຍອີງໃສ່ຜົນຂອງການສຶກສາເປັນພື້ນຖານ). ໂຄງການແມ່ນໄດ້ສໍາເລັດກິດຈະກໍາທີ່ໜຶ່ງ ແລະ ຢູ່ໃນຊ່ວງການຈັດຕັ້ງປະຕິບັດກິດຈະກໍາທີ່ 2 ແລະ 3 ໄປຄວບຄູ່ກັນ. ກະຊວງອຸດສາຫະກຳ ແລະ ການຄ້າ ກໍ່ຄືລັດຖະບານເຫັນໄດ້ຄວາມສໍາຄັນຂອງໂຄງການໂດຍມີເປົ້າໝາຍເພື່ອສ້າງສະພາບແວດລ້ອມທາງດ້ານການຄ້າ ແລະ ການລົງທຶນພາຍໃນປະເທດທີ່ດີ ຜ່ານການສຶກສາຄົ້ນຄວ້າຢ່າງມີວິທະຍາສາດ ເພື່ອເປັນຫຼັກຖານອັນສໍາຄັນໃຫ້ແກ່ລັດຖະບານ ໃນການກໍານົດນະໂຍບາຍ ໃນແຕ່ລະໄລຍະໃຫ້ສອດຄອງກັບສະພາບການພັດທະນາເສດຖະກິດ-ສັງຄົມ. ນອກຈາກນັ້ນ, ໂຄງການຍັງຈະໄດ້ຊ່ວຍສ້າງຄວາມອາດສາມາດໃຫ້ແກ່ພະນັກງານ ແລະ ອົງກອນທີ່ຢູ່ທ້ອງຖິ່ນ ເປັນການປະກອບ ສ່ວນໃນການສ້າງສະພາບແວດລ້ອມທີ່ດີຕໍ່ກັບພາກທຸລະກິດຕື່ມອີກ.

ພ້ອມນັ້ນຜູ້ເຂົ້າຮ່ວມກອງປະຊຸມຍັງໄດ້ ປະກອບຄຳເຫັນແລກປ່ຽນ, ປຶກສາຫາລື ຫາທາງອອກຊ່ວຍກັນ, ໃຫ້ຂໍ້ມູນເຊິ່ງກັນ ແລະກັນ ເພື່ອເຮັດແນວໃດໃຫ້ວຽກງານການອໍານວຍຄວາມສະດວກທາງດ້ານການຄ້າ ແລະ ການລົງທຶນຂັ້ນແຂວງ ໃນຂອບເຂດທົ່ວປະເທດໄດ້ຮັບການພັດທະນາ ແລະ ປັບປຸງດີຂຶ້ນ, ສິ່ງໃດທີ່ເຫັນວ່າມັນສ່ອດຄ່ອງກັບຄວາມເປັນຈິ່ງກໍ່ໃຫ້ຍອມຮັບ ແລະ ຫາວິທີແກ້ໄຂຕາມຄວາມເໝາະສົມ ເຊິ່ງເປັນບັນຫາພື້ນຖານທີ່ຈະເຮັດໃຫ້ເສດຖະກິດສາມາດຄົງຕົວ ແລະ ຂະຫຍາຍຕົວໃນຕໍ່ໜ້າ.

ຂ່າວ-ພາບ: ສະຖາບັນອຸດສາຫະກໍາ ແລະ ການຄ້າ