ກົມແຂ່ງຂັນທາງທຸລະກິດ ແລະ ກວດກາການຄ້າ (ກຂກຄ), ກະຊວງອຸດສາຫະກຳ ແລະ ການຄ້າ ໄດ້ຮັບກຽດເປັນເຈົ້າພາບຈັດກອງປະຊຸມຄະນະກຳມະການປົກປ້ອງຜູ້ຊົມໃຊ້ອາຊຽນ ຄັ້ງທີ 29 ແລະ ກອງປະຊຸມກ່ຽວຂ້ອງ ASEAN Committee on Consumer Protection (ACCP) and Relating meetings ການເປັນປະທານຮ່ວມ ຂອງ ທ່ານ ພູວຽງ ພົງສາ ຫົວໜ້າກົມ (ກຂກຄ) ແລະ ທ່ານ  ໃນວັນທີ 18 ພະຈິກ 2024, ຢູ່ທີ່ ໂຮງແຮມດັບເບີທີ, ນະຄອນຫຼວງວຽງຈັນ ມີຜູ້ຕາງໜ້າຈາກ 10 ປະເທດສະມາຊິກອາຊຽນ, ກອງເລຂາອາຊຽນ ແລະ ຕິມໍເລດເຕ ປະເທດສັງເກດການ ເຂົ້າຮ່ວມ ຈຳນວນ 40 ທ່ານ.

ທ່ານ ພູວຽງ ພົງສາ  ຫົວໜ້າກົມ ແຂ່ງຂັນທາງທຸລະກິດ ແລະ ກວດກາການຄ້າ ກະຊວງ ອຄ ໄດ້ຕາງໜ້າໃຫ້ ລັດຖະບານ ສປປ ລາວ ກໍຄື ກະຊວງ ອຄ, ກົມແຂ່ງຂັນທາງທຸລະກິດ ແລະ ກວດກາການຄ້າ ມີຄວາມຍິນດີທີ່ໄດ້ຮັບກຽດເປັນເຈົ້າພາບ ແລະ ຕ້ອນຮັບບັນດາທ່ານຈາກ ຄະນະກຳມະການປົກປ້ອງຜູ້ຊົມໃຊ້ຈາກບັນດາປະເທດສະມາຊິກອາຊຽນ ແລະ ປະເທດ ຕີມໍ ເລສເຕ ເຂົ້າຮ່ວມກອງປະຊຸມຄະນະກຳມະການປົກປ້ອງຜູ້ຊົມໃຊ້ອາຊຽນ   ແລະ ກອງປະຊຸມກ່ຽວຂ້ອງ ຄັ້ງທີ 29 ທີ່ ນະຄອນຫຼວງວຽງຈັນ.

ທ່ານກ່າວວ່າ: ກອງປະຊຸມຄະນະກຳມະການປົກປ້ອງຜູ້ຊົມໃຊ້ອາຊຽນ ແມ່ນໄດ້ຈັດມາແຕ່ປີ 2008 ເປັນຕົ້ນມາ. ໃນໄລຍະຜ່ານມາ ປີ 2017 ສປປ ລາວ ກໍໄດ້ຮັບກຽດເປັນເຈົ້າພາບຈັດກອງປະຊຸມຄະນະກຳມະການປົກປ້ອງຜູ້ຊົມໃຊ້ ອາຊຽນ ຄັ້ງທີ 15 ແລະ ກອງປະຊຸມທີ່ກ່ຽວຂ້ອງ ສະນັ້ນ ຄັ້ງນີ້ ເປັນຄັ້ງທີ່ 02. ລາວ ໄດ້ມີກົດໝາຍ ວ່າດ້ວຍການປົກປ້ອງຜູ້ຊົມໃຊ້ ແລະ ກົດໝາຍວ່າດ້ວຍການແຂ່ງຂັນທາງທຸລະກິດ, ນອກຈາກນັ້ນ ກໍມີນິຕິກຳອຶ່ນທີ່ກ່ຽວຂ້ອງ ເຊິ່ງຕິດພັນກັບການປົກປ້ອງສິດ ແລະ ຜົນປະໂຫຍດຂອງຜູ້ຊົມໃຊ້ ເຊັ່ນວ່າ: ກົດ ໝາຍ ວ່າດ້ວຍອາຫານ, ກົດໝາຍ ວ່າດ້ວຍການປິ່ນປົວສຸຂະພາບ, ກົດໝາຍ ວ່າດ້ວຍມາດຕະຖານ, ກົດໝາຍວ່າ ດ້ວຍການວັດແທກ  ແລະ ກົດໝາຍ ອຶ່ນໆ ເພື່ອເປັນເຄື່ອງໃນການຄຸ້ມຄອງລັດ ແລະ ສັງຄົມ.

ຫຼັງຈາກທີ່ພວກເຮົາໄດ້ມີກົດໝາຍວ່າດ້ວຍການປົກປ້ອງຜູ້ຊົມໃຊ້ ແລະ ກົດໝາຍວ່າດ້ວຍການແຂ່ງຂັນທາງທຸລະກິດ, ການນຳກະຊວງອຸດສາຫະກຳ ແລະ ການຄ້າ ກໍໄດ້ມີການຄົ້ນຄ້ວາ ໄປທັດສະນະສຶກ ແລກປ່ຽນບົດຮຽນຮ່ວມກັບບັນດາປະເທດສະມາຊິກອາຊຽນກ່ຽວກັບກົນໄກ, ລະບົບການຄຸ້ມຄອງ ແລະ ຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້. ສະນັ້ນ,ທ້າຍປີ 2023  ກົມແຂ່ງຂັນທາງທຸລະກິດ ແລະ ກວດກາການຄ້າ ໄດ້ສ້າງຕັ້ງຂຶ້ນໂດຍມີ ພາລະບົດບາດ ສິດ ແລະ ໜ້າທີ່ຢ່າງຊັດເຈນ ຕາມທີ່ໄດ້ກຳນົດໄວ້ໃນຂໍ້ຕົກລົງຂອງທ່ານ ລັດຖະມົນຕີ ກະຊວງອຸດສາຫະກຳ ແລະ ການຄ້າ ສະບັບລກທີ 2075/ອຄ, ລົງວັນທີ 15 ພະຈິກ 2023 ແລະ ຈັດຕັ້ງປະຕິບັດກົດໝາຍ ວ່າດ້ວຍການປົກປ້ອງຜູ້ຊົມໃຊ້, ກົດໝາຍວ່າ ດ້ວຍການແຂ່ງຂັນທາງທຸລະກິດ ແລະ ດຳລັດວ່າດ້ວຍການກວດກາການຄ້າ.

ໃນໄລຍະຂອງກອງປະຊຸມ ນອກຈາກວຽກງານຂອງຄະນະກຳມະການປົກປ້ອງຜູ້ຊົມໃຊ້ແລ້ວ ພວກເຮົາຈະພ້ອມກັນຄົ້ນຄ້ວາ ແລະ ປຶກສາຫາລື ປະກອບຄຳເຫັນໃສ່ ທົບທວນຄືນການຈັດຕັ້ງປະຕິ ບັດແຜນຍຸດທະສາດອາຊຽນວຽກງານປົົກປ້ອງຜູ້ຊົມໃຊ້ ປີ 2025 (Validation workshop for the End –Term Review of the  ASAPCP 2025 ) ແລະ ຄົ້ນຄ້ວາ ປຶກສາຫາລື ການພັດທະນາ ແຜນຍຸດທະສາດອາຊຽນວຽກງານປົກປ້ອງຜູ້ຊົມໃຊ້ ປີ 2030 (Validation workshop for the Development of the  ASAPCP 2030 ) ແລະ ຫົວຂໍ້ອຶ່ນໆ ທີ່ໄດ້ກຳນົດໄວ້ໃນວາລະຂອງກອງປະຊຸມ. ການດຳເນີນທຸລະກິດ ການຊື້ ຂາຍສິນຄ້າ ທາງອອນລາຍ ຍັງເປັນສິງທ້າທາຍສຳລັບອົງການຄຸ້ມຄອງວຽກງານປົກປ້ອງຜູ້ຊົມໃຊ້ພາຍໃນປະເທດ, ລວມໄປເຖິງການຊື້ ຂາຍ ໃນພາກພື້ນອາຊຽນ ແລະ ສາກົນ, ສະນັ້ນ ຈຶ່ງມີຄວາມຈຳເປັນຮຽກຮ້ອງໃຫ້ພວກເຮົາມີການຮ່ວມມືຮອບດ້ານພາຍໃນອາຊຽນ ເພື່ອຊອກຫາວິທີແກ້ໄຂບັນຫາຮ່ວມກັນໃນອານາຄົດ.

ວຽກງານການປົກປ້ອງຜູ້ຊົມໃຊ້ເປັນວຽກງານໜຶ່ງທີ່ມີຄວາມໝາຍຄວາມສຳຄັນ ເຊິ່ງຫຼາຍປະເທດໃນພາກພື້ນ ແລະ ສາກົນໄດ້ໃຫ້ຄວາມສຳຄັນຫຼາຍກ່ຽວກັບວຽກງານປົກປ້ອງຜູ້ຊົມໃຊ້ເວົ້າລວມ ເວົ້າສະເພາະ ບັນດາປະເທດສະມາຊິກອາຊຽນແຕ່ລະປະເທດກໍໄດ້ມີກົດໝາຍວ່າດ້ວຍການປົກປ້ອງຜູ້ຊົມໃຊ້ ພ້ອມມີກົມກ່ຽວຂ້ອງຮັບ ຜິດຊອບຈັດຕັ້ງປະຕິບັດກົດໝາຍ;

ໃນວາລະສຸດທ້າຍຂອງກອງປະຊຸມ ທ່ານ Mr. Loke Shiu Meng ຜູ້ຊ່ວຍຫົວໜ້າບໍລິຫານ ການບັງຄັບໃຊ້ກົດໝາຍ, ຄະນະກຳມະການແຂ່ງຂັນທາງທຸລະກິດ ແລະ ການປົກປ້ອງຜູ້ຊົມໃຊ້ ປະເທດ ສິງກະໂປ ປະທານກອງປະຊຸມຄະນະກຳມະການປົກປ້ອງຜູ້ຊົມໃຊ້ ໄດ້ຕາງໜ້າໃຫ້ຜູ້ເຂົ້າຮ່ວມກອງປະຊຸມກ່າວສະແດງຄວາມຂອບໃຈຢ່າງສູງມາຍັງລັດຖະບານຂອງ ສປປ ລາວ ກໍຄື ກົມແຂ່ງຂັນທາງທຸລະກິດ ແລະ ກວດກາການຄ້າ, ກະຊວງອຸດສາຫະກຳ ແລະ ການຄ້າ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ການກະກຽມສະຖານທີ່ຈັດກອງປະຊຸມໃນຄັ້ງນີ້, ບັນດາແຂກທີ່ເຂົ້າຮ່ວມ, ການປະກອບສ່ວນຂອງບັນດາປະເທດສະມາຊິກ ໂດຍສະເພາະແມ່ນກອງເລຂາອາຊຽນທີ່ໃຫ້ການຊ່ວຍເຫຼືອໃນການປະສານງານໃນການຊຸກຍູ້ຈັດກອງປະຊຸມຄັ້ງນີ້ໃຫ້ປະສົບຜັນສຳເລັດ ແລະ ອວຍພອນໃຫ້ບັນດາທ່ານຜູ້ແທນເດີນທາງກັບຄືນດ້ວຍຄວາມສະຫວັດດີພາບ.

ກອງປະຊຸມໃນຄັ້ງນີ້ ໄດ້ຮັບການຊ່ວຍເຫຼືອຈາກ ໂຄງການ GIZ-PROTECT ຂອງລັດຖະບານເຢຍລະມັນ ແລະ ການມີສ່ວນຮ່ວມຂອງຝ່າຍ ລາວ.

ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ