ໃນວັນທີ 21 ທັນວາ 2024 ທີ່ແຂວງຫຼວງພະາງ, ກົມຊັບສິນທາງປັນຍາ ແລະ ພະແນກອຸດສາຫະກຳການຄ້າ ແຂວງຫຼວງພະບາງ, ໄດ້ຈັດກອງປະຊຸມແລກປ່ຽນບົດຮຽນວຽກງານຊັບສິນທາງປັນຍາ ຊຶ່ງກັນ ແລະ ກັນຂຶ້ນ, ໂດຍການເປັນປະທານຂອງ ທ່ານ ນ. ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ໃນກອງປະຊຸມ ມີທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ, ມີທ່ານ ຊົມຊື່ນ ໄຊເກິຍາຈົງຕົວ, ຫົວໜ້າພະແນກອຸດສາຫະກຳ ແລະ ການຄ້າ ແຂວງ, ພ້ອມດ້ວຍພະນັກງານຈາກກົມຊັບສິນທາງປັນຍາ, ພະແນກອຸດສາຫະກຳ ແລະ ການຄ້າ ແຂວງ ແລະ ແຂກຖືກເຊີນເຂົ້າຮ່ວມ.

ໃນໂອກາດນີ້ ທ່ານ ນາງຈັນສຸກ ແສງພະຈັນ ຮອງລັດຖະມົນຕີ ກະຊວງ ອຄ ໄດ້ກ່າວວ່າ: ກອງປະຊຸມຖອດຖອນບົດຮຽນໃນຄັ້ງນີ້ ເປັນຂີດໝາຍໃໝ່ທີ່ສໍາຄັນ ໃນການຈັດຕັ້ງປະຕິບັດວຽກງານຮ່ວມກັນໃນຕໍ່ໜ້າ ໂດຍສະເພາະ ແມ່ນວຽກງານຊັບສິນທາງປັນຍາ, ໃນຍຸກທີ່ມີການແຂ່ງກັນກັນສູງ, ພວກເຮົາ ຕ້ອງໄດ້ເພີ່ມທະວີໃນການພົບປະແລກປ່ຽນຊຶ່ງກັນ ແລະ ກັນໃຫ້ຫຼາຍຂຶ້ນ ເພື່ອເປັນການແລກປ່ຽນຂໍ້ມູນຂ່າວສານ, ບົດຮຽນ ແລະ ປະສົບການ ໂດຍສະເພາະ ແມ່ນສິ່ງທ້າທາຍໃນການຈັດຕັ້ງປະຕິບັດວຽກງານດັ່ງກ່າວນີ້ ເພື່ອພ້ອມກັນຊອກຫາວິທີທາງໃນການແກ້ໄຂ ແລະ ແບ່ງປັນຄວາມຮູ້ ຄວາມເຂົ້າໃຈ ກ່ຽວກັບຊັບສິນທາງປັນຍາ ຊຶ່ງຈະເປັນການຍົກສູງບົດບາດໃນການປົກປ້ອງຄວາມຄິດສ້າງສັນ ແລະ ນະວັດຕະກໍາໃນອະນາຄົດ.

ວຽກງານຊັບສິນທາງປັນຍາ ແມ່ນວຽກງານໜຶ່ງທີ່ສຳຄັນ ທີ່ລັດຖະບານເຮົາໄດ້ໃຫ້ຄວາມສຳຄັນ ແລະ ເປັນວຽກງານໜຶ່ງທີ່ສ້າງບົດບາດ ໃຫ້ແກ່ ສປປ ລາວ ກ້າວຂຶ້ນສູ່ເວທີສາກົນ ແລະ ເປັນວຽກງານໜຶ່ງທີ່ ກະຊວງອຸດສາຫະກໍາ ແລະ ການຄ້າ ໄດ້ສຸມໃສ່ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ. ໃນກອງປະຊຸມແລກປ່ຽນຄັ້ງນີ້ ບັນດາຜູ້ເຂົ້າຮ່ວມໄດ້ຮັບຟັງການນໍາສະເໜີ ກ່ຽວກັບວຽກງານຊັບສິນທາງປັນຍາ ໂດຍສະເພາະ ຄວາມຮູ້ກ່ຽວກັບເຄື່ອງໝາຍການຄ້າ, ແບບອຸດສາຫະກໍາ, ສິດທິບັດ ແລະ ພັນພືດໃໝ່ ແລະ ວຽກງານຖິ່ນກໍາເນີດ GI, ຊຶ່ງພະນັກງານທີ່ນໍາສະເໜີວຽກງານດັ່ງກ່າວນີ້ ລ້ວນແລ້ວແຕ່ມີປະສົບການຈາກພາຍໃນ ແລະ ຕ່າງປະເທດ. ສະນັ້ນ, ໃນກອງປະຊຸມຄັ້ງນີ້ ພວກເຮົາຈະມີໂອກາດຮຽນຮູ້ຈາກປະສົບການ ແລະ ຄວາມຊໍານານຂອງນັກວິທະຍາກອນ ແຕ່ລະຫົວຂໍ້ຕື່ມອີກ ຊຶ່ງການຖອດຖອນບົດຮຽນ, ການປຶກສາຫາລືຮ່ວມກັນ ຈະຊ່ວຍໃຫ້ພວກເຮົາເຂົ້າໃຈວຽກງານຊັບສິນທາງປັນຍາໄດ້ດີຂຶ້ນ.

ສູນສະຖິຕິ ແລະ ຂໍ້ມູນຂ່າວສານ