ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມສໍາມະນາ ກ່ຽວກັບຊັບສິນທາງປັນຍາໃນຫົວຂໍ້: “ຄວາມຄິດວັນນີ້ ເປັນຊັບສິນມື້ອື່ນ”, ໃນວັນທີ 20 ທັນວາ 2024, ທີ່ ໂຮງແຮມສຸພັດຕາ, ເປັນກຽດເຂົ້າຮ່ວມກ່າວເປີດ ໂດຍ ທ່ານ ນ. ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ມີທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ, ມີທ່ານ ນ. ສີອານົງ ພົມກອງ, ຜູ້ຈັດການໂຄງການ RT4D ປະຈໍາ ສປປ ລາວ, ທ່ານ ບັນຊາ ຈັນມິ່ງ ຮອງຫົວໜ້າກົມຊັບສິນທາງປັນຍາ, ມີຜູ້ຕາງໜ້າຈາກພະແນກອຸດສາຫະກໍາ ແລະ ການຄ້າ ແຂວງຫຼວງພະບາງ, ຜູ້ປະກອບການທຸລະກິດຍິງ ທີ່ເຂົ້າຮ່ວມໂຄງການ ແລະ ພະນັກງານກົມຊັບສິນທາງປັນຍາ ທີ່ກ່ຽວຂ້ອງເຂົ້າຮ່ວມ.
ຈຸດປະສົງ ເພື່ອແລກປ່ຽນຄວາມຮູ້ ແລະ ປະສົບການ ໃຫ້ແກ່ຜູ້ປະກອບການ ແລະ ຜູ້ທີ່ເຂົ້າຮ່ວມສໍາມະນາ, ພ້ອມດຽວກັນນັ້ນ ຜູ້ປະກອບການ ນັກທຸລະກິດຍິງ ຈໍານວນ 13 ທ່ານ, ກໍໄດ້ມີການນໍາສະເໜີຜົນງານ ຫຼັງຈາກໄດ້ເຂົ້າຮ່ວມໂຄງການ RT4D ເພື່ອເປັນການແລກປ່ຽນປະສົບການ, ຜົນປະໂຫຍດການນຳໃຊ້ຊັບສິນທາງປັນຍາ ໃນການເພີ່ມມູນຄ່າ, ການຊອກຫາຕະຫຼາດພາຍໃນ ແລະ ຕ່າງປະເທດ, ພ້ອມທັງເປັນການແບ່ງປັນ ຄວາມຮູ້ ແລະ ປະສົບການ ທີ່ສາມາດນຳໄປຜັນຂະຫຍາຍ ແລະ ພັດທະນາສິນຄ້າຂອງຕົນໃຫ້ດີຂື້ນເທື່ອລະກ້າວ. ງານນີ້ໄດ້ສະແດງໃຫ້ເຫັນເຖິງຜົນສຳເລັດອີກດ້ານໜຶ່ງຂອງໂຄງການ ທີ່ຊ່ວຍເຫຼືອບັນດາຜູ້ປະກອບການໃນການສ້າງເຄື່ອງໝາຍການຄ້າ, ພັດທະນາຜະລິດຕະພັນສິນຄ້າໄດ້ຢ່າງສວຍງາມ ແລະ ໜ້າປະທັບໃຈເປັນຢ່າງຍິ່ງ.
ທ່ານ ນາງ ສີອານົງ ພົມກອງ ກ່າວເຖິງປະຫວັດຄວາມເປັນຂອງໂຄງການ ວ່າ: ຈຸດປະສົງຂອງໂຄງການ ແມ່ນເລັ່ງສ້າງຄວາມຮັບຮູ້ດ້ານຊັບສິນທາງປັນຍາ, ຄວາມສຳຄັນຂອງເຄື່ອງໝາຍການຄ້າ ແລະ ແບບອຸດສາຫະກຳ ໃຫ້ຜູ້ແກ່ປະກອບການທີ່ເຂົ້າຮ່ວມໂຄງການຊາບ. ໂດຍ “ເລັ່ງລັດເສີມສ້າງຄວາມຮູ້ດ້ານຊັບສິນທາງປັນຍາ ໃຫ້ຜູ້ປະກອບການຍິງ” ໂຄງການໄດ້ເລີ່ມຈັດຕັ້ງປະຕິບັດມາແຕ່ເດືອນພະຈິກ ປີ 2023, ໂດຍໄດ້ມີການຄັດເລືອກເອົາຜູ້ປະກອບການຍິງຈາກ 18 ແຂວງໃນທົ່ວປະເທດ, ແຂວງລະ 1 ບໍລິສັດ, ເຂົ້າຮ່ວມ. ມາຮອດທ້າຍປີ 2024, ຊຶ່ງແມ່ນໄລຍະສຸດທ້າຍຂອງໂຄງການ, ມີ 14 ບໍລິສັດ ໄດ້ຮັບການຊ່ວຍເຫຼືອຈາກຊ່ຽວຊານທັງພາຍໃນ ແລະ ຕ່າງປະເທດ ເພື່ອປັບປຸງເຄື່ອງໝາຍການຄ້າຈົນສຳເລັດ ພ້ອມທັງໄດ້ຍື່ນໃບສະໝັກຂໍຂຶ້ນທະບຽນປົກປ້ອງ ນຳກົມຊັບສິນທາງປັນຍາເປັນທີ່ຮຽບຮ້ອຍແລ້ວ.
ໂດຍໄດ້ຮັບການສະໜັບສະໜູນຈາກ ໂຄງການການຄ້າລະດັບພາກພື້ນເພື່ອການພັດທະນາ ຊຶ່ງແມ່ນອົງການລະດັບພາກພື້ນທີ່ໄດ້ຮັບທຶນຊ່ວຍເຫຼືອຈາກ ລັດຖະບານອົດສະຕຣາລີ ແລະ ນິວຊີແລນ ເພື່ອຊ່ວຍບັນດາປະເທດສະມາຊິກອາຊຽນ ໃນການຈັດຕັ້ງປະຕິບັດ ສັນຍາເຂດການຄ້າເສລີ ອາຊຽນ-ອົດສະຕຣາລີ-ນິວຊີແລນ (ASEAN – Australia – New Zealand Free Trade Area agreement – AANZFTA) ແລະ ສັນຍາການຮ່ວມມືເສດຖະກິດຂົງເຂດແບບຮອບດ້ານ Regional Comprehensive Economic Partnership (RCEP).
ສູນສະຖິຕິ ແລະ ຂໍ້ມູນຂ່າວສານ
