ໃນວັນທີ 26 ມີນາ 2025 , ອົງຄະນະພັກ ກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດພິທີປະດັບຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນ ປະຕິວັດລາວ (22/3/1955 – 22/3/2025) ໃຫ້ສະມາຊິກພັກ ຜູ້ທີ່ຍັງປະຈໍາການ ແລະ ສະມາຊິກພັກອາວຸໂສບໍານານ ກະຊວງອຸດສາຫະກໍາ ແລະ ການຄ້າ ໂດຍໃຫ້ກຽດເຂົ້າຮ່ວມ ຂອງສະຫາຍ ມະໄລທອງ ກົມມະສິດ ກຳມະການສໍາຮອງສູນກາງພັກ ເລຂາຄະນະບໍລິຫານງານພັກ ລັດຖະມົນຕີ ກະຊວງ ອຄ, ມີບັນດາສະຫາຍ ຄະນະພັກ, ບັນດາສະຫາຍ ທີ່ໄດ້ຮັບການປະດັບຫຼຽນ, ບັນດາສະຫາຍຄະນະໜ່ວຍພັກຮາກຖານ ພ້ອມດ້ວຍສະມາຊິກພັກ-ພະນັກງານ ທີ່ຂຶ້ນກັບອົງຄະນະພັກ ກະຊວງ ອຄ ເຂົ້າຮ່ວມ.

ໃນໂອກາດນີ້, ສະຫາຍນາງ ກິ່ງສະດອນ ເພັດດາວເຮືອງ ຫົວໜ້າກົມຈັດຕັ້ງ ແລະ ພະນັກງານ ກະຊວງ ອຄ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 425/ຄລສພ,  ລົງວັນທີ 14 ມີນາ 2025  ວ່າດ້ວຍການປະດັບຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນ ປະຕິວັດລາວ ໃຫ້ສະມາຊິກພັກ ກະຊວງ ອຄ ທັງໝົດຈຳນວນ 32 ສະຫາຍ, ຍິງ 4 ສະຫາຍ.

ໃນໂອກາດດຽວກັນ, ສະຫາຍ ມະໄລທອງ ກົມມະສິດ ກໍໄດ້ໃຫ້ກຽດມີຄໍາເຫັນກ່າວຕໍ່ພິທີບາງຕອນວ່າ: ຫຼຽນກາ 70 ປີ ວັນສ້າງຕັ້ງພັກປະຊາຊົນ ປະຕິວັດລາວ ເປັນຫຼຽນກາກຽດຕິຄຸນອັນສູງສົ່ງຂອງພັກປະຊາຊົນ ປະຕິວັດລາວ ທີ່ໄດ້ມອບໃຫ້ແກ່ບັນດາສະຫາຍສະມາຊິກພັກ ທີ່ຍັງປະຈໍາການ ແລະ ສະມາຊິກພັກອາວຸໂສບໍານານ ຜູ້ທີ່ມີຜົນງານອັນໃຫຍ່ຫຼວງ, ໄດ້ປະກອບສ່ວນອຸທິດເລືອດເນື້ອເຫື່ອແຮງ ແລະ ສະຕິປັນຍາ ເຂົ້າໃນພາລະກິດຂອງພັກ, ການປະຕິວັດ ແລະ ປະເທດຊາດ ໃນສະໄໝຕໍ່ສູ້ກູ້ຊາດ ຕ້ານຈັກກະພັດລ່າເມືອງຂຶ້ນຜູ້ຮຸກຮານ ເພື່ອປົດປ່ອຍປະເທດຊາດ, ກອບກູ້ເອົາຄວາມເປັນເອກະລາດ ແລະ ອິດສະຫຼະພາບ ມາໃຫ້ປະຊາຊົນລາວບັນດາເຜົ່າ ລວມທັງໄດ້ສືບຕໍ່ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເປັນແບບຢ່າງອັນປະເສີດແກ່ຮຸ່ນສືບທອດ; ການປະດັບຫຼຽນກາລະນຶກ 70 ປີ ຄັ້ງນີ້ ເປັນການສະແດງໃຫ້ເຫັນເຖິງຄວາມຮູ້ບຸນຄຸນຢ່າງສຸດຊຶ້ງ, ເປັນການຈາລຶກ ແລະ ຈົດຈໍາຜົນງານອັນໃຫຍ່ຫຼວງ ຂອງບັນດາສະຫາຍ ເປັນການຍ້ອງຍໍສັນລະເສີນ, ເປັນຄວາມທະນົງໃຈຂອງພັກ, ລັດຖະບານ ແລະ ປະຊາຊົນລາວບັນດາເຜົ່າ ທີ່ມີຕໍ່ບັນດາສະຫາຍ. ພວກເຮົາ ຜູ້ທີ່ເປັນຮຸ່ນສືບທອດ ຈະສືບຕໍ່ຮໍ່າຮຽນເອົາແບບຢ່າງຄຸນສົມບັດ ສິນທໍາປະຕິວັດ, ຜົນງານ ແລະ ວິລະກໍາ ອັນໂດດເດັ່ນ, ນໍ້າໃຈຮັກຊາດອັນດູດດື່ມ, ຄວາມກ້າແກ່ນເດັດດ່ຽວໜຽວແໜ້ນ, ບໍ່ຍອມຈໍານົນ, ຄວາມຊື່ສັດບໍລິສຸດຈົງຮັກພັກດີ, ຈະສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມ, ຢຶດໝັ້ນໃນອຸດົມການ, ສ້າງຄວາມສາມັກ ຄີອັນເປັນປຶກແຜ່ນຢູ່ພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ສືບຕໍ່ຈັດຕັ້ງປະຕິບັດແນວທາງນະໂຍບາຍຂອງພັກ ໃຫ້ບັນລຸຕາມຈຸດໝາຍທີ່ພັກເຮົາໄດ້ກໍານົດໄວ້.

ໃນໂອກາດນີ້ ສະຫາຍ ນາງ ຈັນສຸກ ແສງພະຈັນ ຮອງເລຂາຄະນະບໍລິຫານງານພັກ ຮອງລັດຖະມົນຕີ ກະຊວງ ອຄ ໄດ້ໃຫ້ກຽດປະດັບຫຼຽນກາລະນຶກ 70 ປີ ໃຫ້ສະຫາຍ ມະໄລທອງ ກົມມະສິດ ເລຂາຄະນະບໍລິຫານງານພັກລັດຖະມົນຕີ ກະຊວງ ອຄ,

ໂອກາດດຽວກັນສະຫາຍ ມະໄລທອງ ກົມມະສິດ ເລຂາຄະນະບໍລິຫານງານພັກ ລັດຖະມົນຕີ ກະຊວງ ອຄ ກໍໃຫ້ກຽດຂື້ນປະດັບປະດັບຫຼຽນກາລະນຶກ 70 ປີ ໃຫ້ບັນດາສະຫາຍທີ່ມີຊື່: 1. ສະຫາຍ ສຽວສະຫວາດ ສະແຫວງສຶກສາ ອາດິດຮອງເລຂາຄະນະພັກກະຊວງ, ອາດິດຮອງລັດຖະມົນຕີ ອຄ;  2. ສະຫາຍ ສົມຈິດ ອິນທະມິດ ອາດິດຄະນະປະຈໍາພັກກະຊວງ, ອາດິດຮອງລັດຖະມົນຕີ ອຄ; 3. ສະຫາຍ ຈັນເພັງ ບຸນນະຜົນ ອາດິດຄະນະປະຈໍາພັກ, ອາດິດຮອງລັດຖະມົນຕີ ອຄ; 4. ສະຫາຍ ປອ ນາງ ບົວຄໍາ ທິບພະວົງ ອາດິດຄະນະປະຈໍາສະພາແຫ່ງຊາດ; 5. ສະຫາຍ ບຸນຕີ ທະມິດ ອາດິດຮອງເລຂາຄະນະພັກກະຊວງວິທະຍາສາດເຕັກໂນໂລຊີ; 6. ສະຫາຍ ສິລິສໍາພັນ ວໍຣະຈິດ ອາດິດຄະນະປະຈໍາພັກກະຊວງ ອຄ; 7. ສະຫາຍ ພັນ ວິໄລສົມ ອາດິດຄະນະບໍລິຫານງານພັກກະຊວງ ອຄ, ອາດິດເລຂາໜ່ວຍພັກກົມ ກວດກາ; 8. ສະຫາຍ ເຫຼື່ອມ ຍົງວົງສິດທິ ອາດິດເລຂາໜ່ວຍພັກກົມການຄ້າພາຍໃນ; 9. ສະຫາຍ ສົມຫວັງ ນິນທະວົງ ອາດິດເລຂາໜ່ວຍພັກກົມສົີ່ງເສີມການຄ້າ ແລະ 10. ສະຫາຍ ແພງສະຫງວນ ຈຸນລະມະນີ ອາດິດເລຂາໜ່ວຍພັກກົມກວດກາ.

ຂ່າວ: ໄພວັນ, ພາບ: ສູນທອງ