ໃນລະຫວ່າງວັນທີ 25-29/09/2013 ກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກໍາ ແລະ ການຄ້າລາວ ໄດ້ມີພິທີເຊັນບົດບັນທຶກຄວາມເຂົ້າໃຈ (MOU) ກັບກົມສົ່ງເສີມການຄ້າລະຫວ່າງປະເທດ ກະຊວງພານິດໄທ ໃນການສົ່ງເສີມການຄ້າລະຫວາງປະເທດ, ການຮ່ວມມືດ້ານການຄ້າ 2 ຝ່າຍໃນຄັ້ງນີ້ຈະເປັນຜົນດີໃນການຊຸກຍູ້ສົ່ງເສີມການຄ້າ ແລະ ການລົງທຶນລະຫວ່າງ 2 ປະເທດກໍ່ຄືພາຍໃນອາຊຽນ ຊຶ່ງຈະຊ່ວຍສ້າງໃຫ້ແນວຄວາມຄິດເສດຖະກິດເປັນໜຶ່ງດຽວນັ້ນໃຫ້ເປັນຮູບປະທຳ ໂດຍເນື້ອໃນບົດບັນທຶກດັ່ງກ່າວປະກອບດ້ວຍ 6 ເງື່ອນໄຂດັ່ງນີ້:
- ທັງສອງຝ່າຍຈະຕ້ອງໄດ້ແລກປ່ຽນຂໍ້ມູນຂ່າວສານຂອງແຕ່ລະປະເທດກ່ຽວກັບ ກາລະໂອກາດທາງດ້ານທຸລະກິດ ເພື່ອເປັນການສົ່ງເສີມໃຫ້ມີການຄ້າຮ່ວມກັນ.
- ທັງສອງຝ່າຍຈະຕ້ອງສ້າງຄວາມເປັນໄປໄດ້ໃນການຈັດກິດຈະກຳຮ່ວມກັນ ເປັນຕົ້ນ ການຮ່ວມຈັດສຳມະນາ, ວາງສະແດງ ເພື່ອສົ່ງເສີມກາລະໂອກາດທາງດ້ານການຄ້າ ແລະ ການລົງທຶນລະຫວ່າງສອງປະເທດ.
- ຄູ່ຮ່ວມສັນຍາຈະຕ້ອງໄດ້ລະດົມທຸລະກິດພາຍໃນຂອງຕົນໃຫ້ເຂົຮ່ວມງານວາງສະແດງລະດັບສາກົນ ທີ່ຈັດຂຶ້ນໃນປະເທດຄູ່ຮ່ວມສັນຍາ.
- ຄູ່ສັນຍາຈະຕ້ອງໄດ້ສົ່ງເສີມການຈັດຕັ້ງຄະນະນັກທຸລະກິດ ເພື່ອໃຫ້ມີການໄປ-ມາຫາສູ່ກັນຂອງຄະນະນັກທຸລະກິດ ແລະ ພ້ອມດຽວກັນນີ້ ຄູ່ສັນຍາກໍ່ຕ້ອງໄດ້ອຳນວຍຄວາມສະດວກໃນການຈັດຕັ້ງກິດຈະກຳການຈັບຄູ່ທຸລະກິດໃນເວລາທີ່ປະເທດໃດໜຶ່ງສົ່ງຄະນະນັກທຸລະກິດມາຢ້ຽມຢາມ.
- ຄູ່ຮ່ວມສັນຍາຈະຕ້ອງໄດ້ສົ່ງເສີມທຸລະກິດພາຍໃນຂອງຕົນໃຫ້ສາມາດນຳໃຊ້ເຄື່ອງມືສື່ທາງດ້ານອີເລັກໂຕຣນິກ ເພື່ອຂະຫຍາຍຕະຫຼາດຂອງຕົນ ເປັນຕົ້ນການສ້າງຕະຫຼາດທາງອິນເຕີເນັດ.
- ທັງສອງເຫັນດີທີ່ຈະຮ່ວມກັນແກ້ໄຂບັນຫາ ຫຼື ສິ່ງກີດຂວາງທາງດ້ານການຄ້າ ແລະ ການລົງທຶນ ລະຫວ່າງສອງປະເທດ ແລະ ຈະຊ່ວຍໃນການຈັດປະຊຸມລະຫວ່າງ ນັກທຸລະກິດພາຍໃນຂອງຕົນ ກັບ ໜ່ວຍງານພາກລັດທີ່ກ່ຽວຂ້ອງ.
ຕໍ່ກັບບັນຫານີ້ ກົມສົ່ງເສີມ ແລະ ພັດທະນາສິນຄ້າ, ກະຊວງອຸດສາຫະກຳ ແລະ ການຄ້າ ກໍ່ຈະໄດ້ສືບຕໍ່ຜັນຂະຫຍາຍຕາມພາລະບົດບາດຂອງກົມກ່ຽວກັບການຮ່ວມມືກັນໃນບັນດາໜ້າວຽກທີ່ໄດ້ເຊັນສັນຍາຮ່ວມກັນ ໃຫ້ປະກົດ ຜົນເປັນຈິງ ແລະ ມີປະສິດທິຜົນສູງສຸດເປັນຕົ້ນແມ່ນຈະໄດ້ແລກປ່ຽນຂໍ້ມູນຂ່າວສານການຄ້າເພື່ອໂຄສະນາເຜີຍແຜ່ໃຫ້ຜູ້ປະກອບການພາຍໃນຂອງລາວໄດ້ຮັບຮູ້ຢ່າງທົ່ວເຖິງ, ກິດຈະກຳຈັດງານວາງສະແດງສິນຄ້າລາວ-ໄທ ປີ 2014 ຜ່ານມາງົບປະມານແມ່ນຝ່າຍໄທເປັນເຈົ້າການຈັດແຈງທຸກຢ່າງ ຊຶ່ງເປັນການຍາກທີ່ຝ່າຍລາວຈະເຈລະຈາຕໍ່ລອງໃນດ້ານຕ່າງໆເນື່ອງຈາກວ່າຝ່າຍລາວບໍ່ມີງົບປະມານສົມທົບ ຕໍ່ບັນຫາດັ່ງກ່າວ ເຫັນວ່າຄວນມີງົບມະມານໃດໜຶ່ງ ເພື່ອຮອງຮັບງານວາງສະແດງດັ່ງກ່າວ ເພື່ອສິດຜົນປະໂຫຍດຂອງທຸລະກິດລາວ ແລະ ເພື່ອໜ້າຕາຂອງປະເທດລາວ, ຈະຈັດກອງປະຊຸມເຜີຍແຜ່ບັນດານິຕິກຳຕ່າງໆໃຫ້ແກ່ຫົວໜ່ວຍທຸລະກິດໄດ້ຮັບຮູ້ ເພື່ອປັບຕົວເຂົ້າກັບສະພາບການເໜັງຕີງດ້ານການຄ້າ, ຄົ້ນຄ້ວາກົນໄກ ສິ່ງອຳນວຍຄວາມສະດວກດ້ານການຄ້າ ເພື່ອດຶງດູດນັກທຸລະກິດຕ່າງປະເທດເຂົ້າມາລົງທຶນໃຫ້ຫຼາຍຂຶ້ນແລະ ຈະປະສານສົມທົບກັບຂະແໜງການຕ່າງໆ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ບັນດາສະມາຄົມທຸລະກິດຕ່າງໆ ເພື່ອຄັດເລືອກຫົວໜ່ວຍທຸລະກິດທີ່ມີທ່າແຮງເພື່ອເຂົ້າຮ່ວມງານວາງສະແດງສິນຄ້າພາຍໃນ ແລະ ຕ່າງປະເທດ, ເຂົ້າຮ່ວມກອງປະຊຸມພົບປະທຸລະກິດກັບຕ່າງປະເທດ ແລະ ຈັດຕັ້ງປະຕິບັດກິດຈະກຳອື່ນໆຮ່ວມກັນໃນຕໍ່ໜ້າ.
ຂ່າວ: ໂດມ
