ກົມສົງເສີມວິສາຫະກິດ ຂະໜາດນ້ອຍ ແລະ ກາງ ກະຊວງອຸດສາຫະກໍາ ແລະ ການຄ້າ ໄດ້ຈັດພິທີເປີດໂຄງການສະໜັບສະໜູນການກໍ່ສ້າງຜູ້ປະກອບກິດຈະການໃໝ່ ໂດຍແນ່ໃສ່ສົ່ງເສີມຊາວໜຸ່ມ, ນັກສຶກສາ ແລະ ຜູ້ສົນໃຈຍາກສ້າງຕັ້ງວິສາຫະກິດໃໝ່ ໃຫ້ມີຄວາມຮູ້ພື້ນຖານໃນການວາງແຜນ, ຈັດຕັ້ງ ແລະ ບໍລິຫານວິສາຫະກິດໃໝ່ ເພື່ອເປັນການຊຸກຍູ້ໃຫ້ເກີດມີຫົວໜ່ວຍທຸລະກິດໃໝ່ແຜ່ຫຼາຍ.
ພິທີດັ່ງກ່າວມີຂຶ້ນໃນຕອນບ່າຍຂອງວັນທີ 31 ມັງກອນ ທີ່ຫໍວັດທະນາທໍາແຫ່ງຊາດ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ດຣ. ນາມ ວິຍະເກດ ລັດຖະມົນຕີວ່າການກະຊວງອຸດສາຫະກໍາ ແລະ ການຄ້າ, ທ່ານ ສົມດີ ອິນມີໄຊ ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ຜູ້ອໍານວຍການກອງທຶນສົ່ງເສີມ ແລະ ພັດທະນາ ວນກ ພ້ອມດ້ວຍຜູ້ຕາງໜ້າຈາກສະຖາບັນຕ່າງໆທາງພາກລັດ, ພາກທຸລະກິດ, ບັນດາອາຈານ ແລະ ນັກສຶກສາ ຈາກສະຖາບັນການສຶກສາຕ່າງໆເຂົ້າຮ່ວມ.
ໂຄງການສະໜັບສະໜູນການກໍ່ສ້າງຜູ້ປະກອບກິດຈະການໃໝ່ເປັນການສະໜອງທຶນສົມທົບຈາກພາກລັດຖະ ບານໂດຍກອງທຶນສົ່ງເສີມ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ໃນມູນຄ່າ 50% ຂອງຄ່າຝຶກອົບຮົມ ແລະ ການບໍລິການທີປຶກສາຂອງສະຖາບັນທີມີຄວາມຊ່ຽວຊານ ໂດຍມີເປົ້າໝາຍໃນການເພີ່ມປະຊາກອນທຸລະກິດໂດຍສະເພາະແມ່ນນັກທຸລະກິດໜຸ່ມມີພຶ້ນຖານການສຶກສາ ມີຄວາມພ້ອມທີຈະພັດທະນາຕົວເອງ ໃຫ້ສາມາດດໍາເນີນທຸລະກິດຮ່ວມກັບນັກທຸລະກິດໃນເຂດພາກພື້ນ ແລະ ສາກົນ, ສາມາດປັບປຸງປ່ຽນແປງຕົວເອງໄປພ້ອມກັນກັບການແລກປ່ຽນແປງຢ່າງໄວວາຂອງຕະຫຼາດ ແລະ ນະໂຍບາຍດ້ານການຄ້າຂອງພາກພື້ນ ແລະ ສາກົນ.
ໂຄງການສະໜັບສະໜູນການກໍ່ສ້າງຜູ້ປະກອບກິດຈະການໃໝ່ຈະດໍາເນີນໃນສອງຮູບແບບຄື: 1. ແມ່ນການຝຶກອົບຮົມຫຼັກສູດການກໍ່ສ້າງຜູ້ປະກອບກິດຈະການໃໝ່ ໂດຍສະຖາບັນທີ່ມີຄວາມຊ່ຽວຊານທັງພາກລັດ ແລະ ເອກະຊົນເປັນການກໍ່ສ້າງໄລຍະສັ້ນເໝາະສົມສໍາລັບການດໍາເນີນທຸລະກິດ, 2. ການເຂົ້າສູນກໍ່ສ້າງຜູ້ປະກອບກິດຈະການໃໝ່ໃນສູນຜູ້ປະກອບກິດຈະການຂອງມະຫາວິທະຍາໄລ ເຊິ່ງປັດຈຸບັນມີຢູ່ໜຶ່ງສູນຄື: ສູນກໍ່ສ່້າງຜູ້ປະກອບກິດຈະການດ້ານທຸລະກິດໄອທີເປັນການກໍ່ສ້າງໄລຍະຍາວແບບຄົບວົງຈອນ ແລະ ລົງເລິກດ້ານທຸລະກິດໃດໜຶ່ງ.
ສ່ວນສະຖາບັນ ຫຼື ສູນຝຶກອົບຮົມທີ່ເຂົ້າຮ່ວມໂຄງການເພື່ອສະໜອງການຝຶກອົບຮົມ ແລະ ບໍລິການທີ່ປຶກສາຜູ້ທີ່ສົນໃຈຍາກສ້າງຕັ້ງທຸກິດໃໝ່ປະກອບມີ 5 ພາກສວ່ນຄື: ສະຖາບັນລາວ-ຢີ່ປຸ່ນ (LJI), ສູນພັດທະນາຜູ້ຜູ້ປະກອບກິດຈະການລາວ-ອິນເດຍ (LIEDC), ບໍລິສັດທີ່ປຶກສາດ້ານການພັດທະນາ ແລະ ວິສາຫະກິດຈໍາກັດ (EDC), ສູນທີປຶກສາເທັກໂດ (TACDO).
ສໍາລັບຜູ້ສະໝັກຂໍທຶນສະໜັບສະໜູນຕ້ອງເປັນນັກສຶກສາຈາກມະຫາວິທະຍາໄລ ແລະ ວິທະຍາໄລນັບແຕ່ປີ 3 ຂຶ້ນໄປ, ນັກສືກສາອາຊີວະນັບແຕ່ປີໜຶ່ງຂຶ້ນໄປ, ບຸກຄົນທົ່ວໄປ ຫຼື ຜູ້ປະກອບອາຊີບອື່ນໆທີ່ສົນໃຈຍາກສ້າງທຸລະກິດໃໝ່, ຜູ້ປະກອບການທີ່ດໍາເນີນທຸລະກິດບໍ່ເກີນ 3 ປີ, ຕ້ອງແມ່ນສັນຊາດລາວ, ອາຍຸບໍ່ເກີນ 35 ປີ, ຖ້າເປັນເພດຍິງຈະໄດ້ຮັບການພິຈາລະນາເປັນພິເສດ.
ທ່ານ ສົມດີ ອິນມີໄຊ ໃຫ້ຮູ້ວ່າ: ຈາກການສໍາຫຼວດດ້ານເສດຖະກິດໃນປີ 2006 ປະເທດເຮົາມີຫົວໜ່ວຍທຸລະກິດທັງໝົດປະມານ 127.000 ຫົວໜ່ວຍ ໃນນັ້ນ ເປັນວິສາຫະກິດຂະໜາດນ້ອຍ ແລະ ກາງ ຫຼາຍເຖິງ 99,8%, ປະກອບສ່ວນເຂົ້າໃນການສ້າງວຽກເຮັດງານທໍາໃນຂະແໜງທຸລະກິດໄດ້ປະມານ 81%. ໂຕເລກດັ່ງກ່າວສະແດງໃຫ້ເຫັນວ່າຈໍານວນຜູ້ປະກອບກິດຈະການທີ່ເປັນເຈົ້າຂອງທຸລະກິດ ຫຼື ເປັນຜູ້ບັນຊາໃນຫົວໜ່ວຍທຸລະກິດມີປະມານ 127.000 ຄົນ ຫຼື ເທົ່າກັບ 2% ຂອງຈໍານວນປະຊາກອນທັງໝົດເຊິ່ງເປັນຕົວເລກທີ່ຕໍ່າຫຼາຍຖ້າທຽບໃສ່ບັນດາປະເທດໃນພາກພື້ນ ແລະ ສາກົນ, ບໍ່ສົມຄູ່ກັບເງືອນໄຂຊັບພະຍາກອນ ແລະ ໂອກາດທີປະເທດເຮົາມີ.
ອີງຕາມແຜນພັດທະນາວິສາຫະກິດຂະໜາດນ້ອຍ ແລະ ກາງ ແຕ່ປີ 2011-2015 ໄດ້ກໍານົດຄາດໝາຍສູ້ຊົນສົ່ງເສີມການຂະຫຍາຍຕົວຂອງຫົວໜ່ວຍວິສາຫະກິດຂະໜາດນ້ອຍ ແລະ ກາງທີ່ຂຶ້ນທະບຽນໃຫ້ໄດ້ໃນລະດັບ 13% ຕໍ່ປີ, ຜົນຜະລິດຂອງວິສາຫະກິດຂະໜາດນ້ອຍ ແລະ ກາງໃຫ້ເພີ່ມຂຶ້ນສະເລ່ຍ 15% ຕໍ່ປີ, ອັດຕາການສ້າງວຽກເຮັດງານທໍາຂອງວິສາຫະກິດຂະໜາດນ້ອຍ ແລະ ກາງໃຫ້ເພີ່ມຂື້ນ 10% ຕໍ່ປີ ເພື່ອໃຫ້ບັນລຸຄາດໝາຍດັ່ງກ່າວໄດ້ກໍານົດເອົາ 7 ໜ້າທີວຽກງານເປັນບຸລິມະສິດໃນການຈັດຕັ້ງປະຕິບັດເຊິ່ງໜຶ່ງໃນນັ້ນກໍ່ແມ່ນວຽກງານສົ່ງເສີມການກໍ່ສ້າງຜູ້ປະກອບການທຸລະກິດໃໝ່. ທ່ານ ລມຕ ກະຊວງອຸດສາຫະກໍາ ແລະ ການຄ້າກ່າວວ່າ: ເພື່ອບັນລຸຄາດໝາຍດັ່ງກ່າວ, ນອກຈາກຈະສົ່ງເສີມການຂະຫຍາຍຕົວຂອງວິສາຫະກິດທີມີຢູ່ແລ້ວ ພວກເຮົາມີຄວາມຈໍາເປັນທີ່ຈະຕ້ອງສົ່ງເສີມ ເພື່ອໃຫ້ເກີດມີຫົວໜ່ວຍວິສາຫະກິດໃໝ່ຢ່າງແຜຫຼາຍໂດຍການກໍ່ສ້າງຜູ້ປະກອບກິດຈະການໃໝ່ເພື່ອລົງທຶນໃນຂະແໜງການທີພວກເຮົາມີທ່າແຮງ. ທ່ານ ກ່າວຕື່ມອີກວ່າ: ໃນໄລຍະທົດສະວັດມານີ້ ເສດຖະກິດຂອງປະເທດເຮົາມີການເຕີບໂຕຢ່າງໜັກແໜ້ນໂດຍສະເລ່ຍແມ່ນປະມານ 7% ຕໍ່ປີແຕ່ການເຕີບໂຕນັ້ນ ແມ່ນອາໄສການເຕີບໂຕຂອງຂອງຂະແໜງຊັບພະຍາກອນທໍາມະຊາດເປັນຫຼັກເຊິ່ງບໍ່ມີຄວາຫຼາກຫຼາຍໃນພື້ຍຖານເສດຖະກິດ ແລະ ເປັນການເຕີບໂຕທີ່ບໍ່ສາມາດແຈກຢາຍໃຫ້ແກ່ສັງຄົມໄດ້ຢ່າງກ້ວາງຂວາງທັງບໍ່ຮັບປະກັນຄວາມຢືນຢົງ, ການສົ່ງເສີມວິສາຫະກິດຂະໜາດນ້ອຍ ແລະ ກາງໂດຍເອົາການກໍ່ສ້າງຜູ້ປະກອບກິດຈະການໃໝ່ເພື່ອລົງທຶນ ແລະ ດໍາເນີນທຸລະກິດໃນຂະແໜງການທີ່ພວກເຮົາມີຄວາມໄດ້ປຽບໃນການແຂງຂັນ ເຫັນວ່າເປັນມາດຕະການໜຶ່ງທີ່ສາມາດປະກອບສ່ວນໃນການສົ່ງເສີມຄວາມຫຼາກຫຼາຍດ້ານເສດຖະກິດທັງສາມາດກະຈາຍລາຍໄດ້ ແລະ ສ້າງວຽກເຮັດງານທໍ່ຢ່າງກ້ວາງຂວາງ ແລະ ໝັ້ນຄົງ ທັງຍັງເປັນການປະສ່ວນລຶບລ້າງຄວາມທຸກຍາກຂອງປະຊາຊົນ. ສະນັ້ນ, ພາກລັດ ໂດຍສະເພາະກະຊວງອຸດສາຫະກໍາ ແລະ ການຄ້າພວດເຮົາຈະສືບຕໍ່ສ້າງເງື່ອນໄຂໃຫ້ມີລັກສະນະເປັນລະບົບຄົບຊຸດເພື່ອເຮັດໃຫ້ການດໍາເນີນທຸລະກິດການຜະລິດ, ການຄ້າ ແລະ ການບໍລິການ ໃຫ້ນັບມື້ໄດ້ຮັບຄວາມສະດວກຂຶ້ນເລື້ອຍໆ.
