ໃນຕອນບ່າຍຂອງວັນທີ 13 ພຶດສະພາ 2014 ເວລາ 15:00 ໄດ້ມີການຈັດພິທີມອບໃບຍ້ອງຍໍໃຫ້ແກ່ບຸກຄົນ ແລະ ກົມກອງຕ່າງປະເທດຈໍານວນໜຶ່ງທີ່ມີຜົນງານດີເດັ່ນໃນຂະບວນການເຈລະຈາເຂົ້າເປັນສະມາຊິກ ອຄລ ຂອງ ສປປ ລາວ ທີ່ກະຊວງອຸດສາຫະກໍາ ແລະ ການຄ້າ ເຊິ່ງໃຫ້ກຽດມອບໃບຍ້ອງຍໍໂດຍ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກໍາ ແລະ ການຄ້າ.
ຈຸດປະສົງຂອງການຈັດພິທີດັ່ງກ່າວ ເພື່ອສະແດງຄວາມຮູ້ບຸນຄຸນ ພ້ອມທັງຍ້ອງຍໍຊົມເຊີຍບຸກຄົນ ແລະ ກົມກອງຕ່າງປະເທດຈໍານວນໜຶ່ງທີ່ໄດ້ປະກອບສ່ວນສຸມສະຕິປັນຍາ, ທຸ້ມເທເຫື່ອແຮງ ແລະ ສະໜັບສະໜູນທາງດ້ານການເງິນເຂົ້າໃນຂະບວນການເຈລະຈາເຂົ້າເປັນ ສະມາຊິກ ອຄລ ຂອງ ສປປ ລາວ ຕະຫຼອດໄລຍະເວລາ 15 ປີ ຈົນໄດ້ຮັບຜົນສໍາເລັດອັນຈົບງາມ ແລະ ໄດ້ເຂົ້າເປັນສະມາຊິກ ອຄລ ຢ່າງເປັນທາງການ ໃນວັນທີ 2 ກຸມພາ 2013. ໃນງານດັ່ງກ່າວ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກໍາ ແລະ ການຄ້າ ໄດ້ກ່າວເຖິງຜົນງານ ແລະ ຜົນສໍາເລັດການເຈລະຈາເຂົ້າເປັນສະມາຊິກ ອຄລ ຂອງ ສປປ ລາວ ກໍ່ຄືການປະກອບສ່ວນຂອງທຸກໆພາກສ່ວນຕ່າງປະເທດ ໂດຍສະເພາະແມ່ນການສ້າງ ແລະ ປັບປຸງບັນດານິຕິກໍາທີ່ກ່ຽວກັບລະບອບການຄ້າ ຂອງ ສປປ ລາວ ໃຫ້ສອດຄ່ອງກັບຫຼັກການການຄ້າສາກົນ ເຊິ່ງຕະຫຼອດໄລຍະການເຈລະຈາ 15 ປີ ສປປ ລາວ ໄດ້ສ້າງ ແລະ ປັບປຸງນິຕິກໍາ 90 ກວ່າສະບັບ ລວມມີກົດໝາຍ 18 ສະບັບ ແລະ ດໍາລັດ 26 ສະບັບ ເຊິ່ງໄດ້ຮັບການຕີລາຄາສູງຈາກບັນດາສະມາຊິກ ອຄລ ແລະ ບັນດາອົງການຈັດຕົ້ງສາກົນ. ຈຸດປະສົງຂອງການເຂົ້າເປັນສະມາຊິກ ອຄລ ຂອງ ສປປ ລາວ ແມ່ນເພື່ອສ້າງສິ່ງແວດລ້ອມທີ່ດີໃຫ້ແກ່ການດໍາເນີນທຸລະກິດ ແລະ ສ້າງຄວາມເຊື່ອໝັ້ນໃຫ້ແກ່ນັກລົງທຶນຕ່າງປະເທດເຊິ່ງເປັນປັດໃຈສໍາຄັນໃນການຫັນປ່ຽນປະເທດເຮົາໃຫ້ກາຍເປັນປະເທດອຸດສາຫະກໍາ ແລະ ທັນສະໃໝໂດຍຜ່ານໂຄງການລົງທຶນຈາກຕ່າງປະເທດ ແລະ ການຖ່າຍທອດເຕັກໂນໂລຊີທີ່ກ້າວໜ້າ
ທ່ານ ນາງ ເຂັມມະນີ ພົນເສນາ ຍັງກ່າວຕື່ມອີກວ່າ: ພາຍຫຼັງທີ່ ສປປ ລາວ ໄດ້ເຂົ້າເປັນສະມາຊິກ ອຄລ ຢ່າງເປັນທາງການ, ສປປ ລາວ ກໍ່ໄດ້ສຶບຕໍ່ຈັດຕັ້ງປະຕິບັດພັນທະ ແລະ ແຜນການພາຍຫຼັງເຂົ້າເປັນສະມາຊິກ ອຄລ ຊຶ່ງກວມເອົາວຽກງານຫຼາຍດ້ານ ແລະ ກ່ຽວຂ້ອງກັບຫຼາຍກະຊວງ ແລະ ຂະແໜງການ ເຊິ່ງໄດ້ສ້າງແຜນດໍາເນີນງານຢ່າງລະອຽດ ໃນການຈັດຕັ້ງປະຕິບັດພັນທະສັນຍາໃຫ້ສໍາເລັດຕາມກໍານົດໄລຍະເວລາ. ໃນງານດັ່ງກ່າວໄດ້ມອບໃບຍ້ອງຍໍໃຫ້ແກ່ບຸກຄົນ 3 ທ່ານ ແລະ ຈາກກົມກອງ 7 ທ່ານ. ພິທີໄດ້ດໍາເນີນໄປດ້ວຍບັນຍາກາດຟົດຟື້ນ ແລະ ໄດ້ຮັບຜົນສໍາເລັດຕາມຄາດໝາຍ ແລະ ໄດ້ປິດລົງໃນເວລາ 16:30 ຂອງວັນດຽວກັນ.
