ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ໄດ້ຊີ້ແຈງບັນຫາຂອງປະຊາຊົນຜ່ານສາຍດ່ວນສະພາ 156 ບັນຫາການຄຸ້ມຄອງຕະຫຼາດເຊົ້າ ແລະ ຕະຫຼາດຂົວດິນທີ່ມີການຂາຍເຄື່ອງຕາມທາງຢ່າງຊະຊາຍພ້ອມທັງການຈອດລົດບໍ່ເປັນລະບຽບອັນກໍ່ໃຫ້ເກີດການຈໍລະຈອນແອອັດ ແລະ ບໍ່ມີຄວາມເປັນລະບຽບຮຽບຮ້ອຍ, ຕໍ່ບັນຫາດັ່ງກ່າວ ທ່ານໃຫ້ຄຳຊີ້ແຈງວ່າ: ແມ່ນຄວາມຈິງບໍ່ສະເພາະແຕ່ໃນສະຖານທີ່ໆປະຊາຊົນສະເໜີມາທຸກໆຕະຫຼາດ ຫຼື ຕາມສະຖານທີ່ອື່ນໆຕາມສາທາລະນະ ແມ່ນໄດ້ມີຄະນະຄຸ້ມຄອງຈັດສັນຈາກພາກສ່ວນກ່ຽວຂ້ອງບໍ່ວ່າຈະເປັນການຄ້າຂາຍໃນ ແລະ ນອກຕະຫຼາດ, ການຈັດສັນການຈອດລົດ, ການຕິດປ້າຍຫ້າມຂາຍເຄື່ອງ, ປ້າຍການສັນຈອນໃນສະຖານທີ່ຕ້ອງຫ້າມ ພ້ອມດຽວກັນນັ້ນ, ກໍ່ຍັງມີພະນັກງານ-ເຈົ້າໜ້າທີ່ກ່ຽວຂ້ອງອື່ນໆໄດ້ຕິດຕາມ ແລະ ຄຸ້ມຄອງ ແຕ່ກໍ່ຍັງມີການລະເມີດ ເຊິ່ງບັນຫາດັ່ງກ່າວຕ້ອງອາໄສຫຼາຍພາກສ່ວນເປັນເຈົ້າການນຳກັນ.
ການປະຕິບັດຜ່ານມາ ກະຊວງ ອຄ ໄດ້ເຮັດພາລະບົດບາດຄຸ້ມຄອງມະຫາພາກຕາມລະບຽບກົດໝາຍ ແລະ ນິຕິກຳຕ່າງໆ ສ່ວນການຄຸ້ມຄອງການຄ້າຂາຍຢູ່ຕະຫຼາດຕົວຈິງນັ້ນ ໄດ້ແບ່ງການຄຸ້ມຄອງໃຫ້ແກ່ພະແນກການຄ້ານະຄອນຫຼວງ, ແຂວງ ແລະ ເມືອງ ເປັນຜູ້ກວດກາ, ຄຸ້ມຄອງຈັດສັນຕົວຈິງ ແລະ ຕະຫຼາດແຕ່ລະບ່ອນກໍ່ໄດ້ມີຄະນະຈັດສັນຕະຫຼາດເປັນຜູ້ຮັບຜິດຊອບແລ້ວ, ເຈົ້າໜ້າທີ່ຕຳຫຼວດຈາລະຈອນ ກໍ່ມີປ້າຍກຳນົດຢ່າງຄັກແນ່ແລ້ວ ແຕ່ຍັງເກີດມີປະກົດການຫຍໍ້ທໍ້ທີ່ປະຊາຊົນສະເໜີມາ ຍ້ອນຄວາມບໍ່ເປັນເຈົ້າການຮັກສາກົດລະບຽບຂອງປະຊາຊົນຈຳນວນໜຶ່ງ.
ທ່ານກ່າວຕື່ມອີກວ່າ: ມາດຕະການແກ້ໄຂໃນຕໍ່ໜ້າບັນດາກົມທີ່ກ່ຽວຂ້ອງຂອງ ກະຊວງ ອຄ ຈະໄດ້ລົງສົມທົບກັບພະແນກອຸດສາຫະກຳ ແລະ ການຄ້ານະຄອນຫຼວງ, ແຂວງ ແລະ ເມືອງ ກັບຄະນະຈັດສັນຕະຫຼາດ ເພື່ອພ້ອມກັນກວດກາບັນດາຮ້ານຂາຍເຄື່ອງທີ່ຂຶ້ນກັບຄວາມຮັບຜິດຊອບຂອງຕົນຢ່າງລະອຽດ ຫັນໃຫ້ເຂົາເຈົ້າຂາຍເຄື່ອງໃນເຂດກຳນົດ, ດ້ານພະນັກງານຈັດສັນ ແລະ ຄຸ້ມຄອງຕະຫຼາດໃຫ້ກວດກາແນະນຳແກ້ໄຂໃຫ້ເຂົ້າສູ່ລະບຽບ ພ້ອມທັງໃຊ້ມາດຕະການຕໍ່ຜູ້ທີ່ລະເມີດ.
