ໂດຍປະຕິບັດຕາມແຜນການສ້າງ ແລະ ປັບປຸງ ກົດໝາຍ 5 ປີ ຂອງສະພາແຫ່ງຊາດຊຸດທີ VII (2011-2015) ສະບັບເລກທີ 05/ສພຊ , ລົງວັນທີ 24 ມີຖຸນາ 2011 ແລະ ອີງຕາມແຜນແມ່ບົດການສ້າງປະຊາຄົມເສດຖະກິດອາຊຽນ ທີ່ໄດ້ກຳນົດໃຫ້ບັນດາປະເທດສະມາຊິກອາຊຽນ ຕ້ອງໄດ້ນຳສະເໜີນະໂຍບາຍ ແລະ ກົດໝາຍວ່າດ້ວຍການແຂ່ງຂັນການຄ້າຂອງຕົນ ໃຫ້ສໍາເລັດໃນປີ 2015 .
ສະນັ້ນ,ເພື່ອເປັນການສືບຕໍ່ຈັດກອງປະຊຸມລະດົມຄວາມຄິດຄວາມເຫັນຕໍ່ “ຮ່າງ” ກົດໝາຍວ່າດ້ວຍການແຂ່ງຂັນການຄ້າ ຈາກພາກສ່ວນຕ່າງໆຢູ່ຂັ້ນທ້ອງຖີ່ນ ໃນຂອບເຂດທົ່ວປະເທດ. ພາຍຫຼັງທີ່ສໍາເລັດການຈັດກອງປະຊຸມດັ່ງກ່າວຢູ່ບັນດາແຂວງໃນພາກເໜືອແລ້ວ. ກົມການຄ້າພາຍໃນ,ກະຊວງອຸດສາຫະກໍາ ແລະ ການຄ້າ ຖານະທີ່ຮັບຜິດຊອບໂດຍກົງກ່ຽວກັບວຽກງານແຂ່ງຂັນການຄ້າ ທັງເປັນກອງເລຂາຄະນະຮັບຜິດຊອບການສ້າງຮ່າງກົດໝາຍວ່າດ້ວຍການແຂ່ງຂັນການຄ້າ ໄດ້ຈັດກອງປະຊຸມສໍາມະນາກ່ຽວກັບວຽກງານດັ່ງກ່າວຂຶ້ນໃນລະຫວ່າງວັນທີ 17-18 ພະຈິກ 2014 ທີ່ຫ້ອງວ່າການປົກຄອງແຂວງ ສາລະວັນ ໂດຍການເປັນປະທານ ທ່ານ ບຸນມີ ມະນີວົງ ຄະນະພັກກະຊວງ, ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ,ໃນກອງປະຊຸມມີບັນດາທ່ານຫົວໜ້າ,ຮອງຫົວໜ້າພະແນກອຸດສາຫະກໍາ ແລະ ການຄ້າ 04 ແຂວງພາກໃຕ້,ຜູ້ຕາງໜ້າຈາກຂະແໜງການຕ່າງໆອ້ອມຂ້າງແຂວງສາລະວັນ ພ້ອມດ້ວຍຜູ້ຕາງໜ້າຈາກພາກທຸລະກິດ ຈາກ 04 ແຂວງພາກໃຕ້ເຂົ້າຮ່ວມ,ເຊິ່ງມີຜູ້ເຂົ້າຮ່ວມທັງໝົດ 90 ກວ່າທ່ານ.ຈຸດປະສົງຂອງການຈັດກອງປະຊຸມໃນຄັ້ງນີ້ແມ່ນເພື່ອລະດົມຄວາມຄິດຄວາມເຫັນຈາກພາກສ່ວນຕ່າງໆ ທີ່ກ່ຽວຂ້ອງຕໍ່ຮ່າງກົດໝາຍວ່າດ້ວຍການແຂ່ງຂັນການຄ້າຂອງ ສປປ ລາວ ເພື່ອເຮັດໃຫ້ຮ່າງກົດໝາຍດັ່ງກ່າວມີເນື້ອໃນ ລະອຽດ ຈະແຈ້ງ ແລະ ຄົບຖ້ວນ ທັງຖືກຕ້ອງ ແລະ ສອດຄ່ອງກັບສະພາວະຄວາມເປັນຈິງຂອງບ້ານເຮົາ ພ້ອມທັງສາມາດເຊື່ອມໂຍງເຂົ້າກັບພາກພື້ນ ແລະ ສາກົນ ໄດ້. ກອງປະຊຸມດັ່ງກ່າວແມ່ນຈັດຂຶ້ນໂດຍການສະໜັບສະໜູນຊ່ວຍເຫຼືອດ້ານງົບປະມານຈາກລັດຖະບານເຢຍລະມັນ ພາຍໃຕ້ໂຄງການຮ່ວມມືອາຊຽນ-ເຢຍລະມັນ (CPL) ແລະ ແມ່ນອົງການ GIZ ເປັນຜູ້ຈັດຕັ້ງປະຕິບັດໂຄງການດັ່ງກ່າວ.
ໃນກອງປະຊຸມທ່ານລັດຖະມົນຕີຊ່ວຍວ່າການກະຊວງອຸດສາຫະກໍາ ແລະ ການຄ້າ ໄດ້ມີຄໍາເຫັນໂອ້ລົມ ຕໍ່ກອງປະຊຸມ,ເຊິ່ງທ່ານໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງວຽກງານດັ່ງກ່າວ ແລະ ຈຸດປະສົງຫຼັກໃນການສ້າງກົດໝາຍວ່າດ້ວຍການແຂ່ງຂັນການຄ້າແມ່ນ: ເພື່ອຕ້ານ ແລະ ສະກັດກັ້ນການແຂ່ງຂັນການຄ້າທີ່ບໍ່ເປັນທໍາ ພ້ອມດຽວກັນນັ້ນກໍເປັນການຊຸກຍູ້ສົ່ງເສີມແລະປົກປ້ອງຂະບວນການແຂ່ງຂັນການຄ້າທີ່ເປັນທໍາ, ປົກປ້ອງສິດ ແລະ ຜົນປະໂຫຍດ ອັນຊອບທໍາ ຂອງຜູ້ຊົມໃຊ້ ໃຫ້ໄດ້ຊົມໃຊ້ສິນຄ້າ ແລະ ການບໍລິການ ທີ່ດີ ມີຄຸນນະພາບ,ລາຄາເປັນທໍາ,ນໍາໃຊ້ຊັບພະຍາກອນ ຢ່າງມີປະສິດທິພາບສູງ ແນໃສ່ຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າ ໃຫ້ນັບມື້ສູງຂຶ້ນ,ຫຼຸດພົ້ນອອກຈາກຄວາມທຸກຍາກ ປະກອບສ່ວນເຂົ້າໃນການສ້າງສາ ແລະ ພັດທະນາເສດຖະກິດ-ສັງຄົມຂອງຊາດ ແລະ ສາມາດເຊື່ອມໂຍງກັບພາກພື້ນ ແລະ ສາກົນ.
