ອົງການກຳມະບານ ເພື່ອການພັດທະນາສາກົນ ອາຟີດາ ໄດ້ສະໜັບສະໜູນທຶນ ມູນຄ່າ 24.138 ໂດລາອົດສະຕຣາລີ ໃນການສ້າງຖານຂໍ້ມູນ ແລະ ນິຕິກຳການນຳໃຊ້ແຮ່ໄຍຫີນຮ່ວມກັບກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ (ອຄ) ເພື່ອເປັນບ່ອນອີງໃຫ້ພາກອຸດສາຫະກຳເຂົ້າໃນການແນະນຳ, ຄຸ້ມຄອງການນຳໃຊ້ ແລະ ຫຼຸດຜ່ອນຜົນກະທົບຄວາມອັນຕະລາຍຂອງສານດັ່ງກ່າວຕໍ່ຜູ້ຊົມໃຊ້.
ພິທີເຊັນສັນຍາສະໜັບສະໜູນທຶນໄດ້ຈັດຂຶ້ນໃນວັນທີ 3 ທັນວາ ຜ່ານມາທີ່ກະຊວງ ອຄ ມອບໂດຍ ທ່ານ ຄຳປະສົງ ສີຫາລາດ ຜູ້ຕ່າງໜ້າອົງການອາຟີດາປະຈຳລາວ ຮັບໂດຍ ທ່ານ ສົມຟອງ ສຸລິວັນ ຮອງຫົວໜ້າກົມອຸດສາຫະກຳ ແລະ ຫັດຖະກຳ.
ທ່ານຮອງຫົວໜ້າກົມອຸດສາຫະກຳ ແລະ ຫັດຖະກຳ ກະຊວງ ອຄ ກ່າວວ່າ: ເລີ່ມແຕ່ປີ 2013 ເປັນຕົ້ນມາ ກະຊວງ ອຄ ໂດຍແມ່ນກົມອຸດສາຫະກໍຳ ແລະ ຫັດຖະກຳ ໄດ້ຮ່ວມມືດ້ານວິຊາການ ແລະ ໄດ້ຮັບງົບປະມານສະໜັບສະໜູນຈາກອົງການກຳມະບານເພື່ອພັດທະນາອາຟີດາ ໃນການສຳຫຼວດເບື້ອງຕົ້ນກ່ຽວກັບການນຳໃຊ້ທາດໄຍຫີນໃນໂຮງງານທົ່ວປະເທດ.
ຄັ້ງນີ້ເປັນຄັ້ງທີ 3 ທີ່ໄດ້ຮັບການສະໜັບສະໜູນ ມີມູນຄ່າທັງໝົດ 24.138 ໂດລາອົດສະຕຣາລີ ໂດຍຈະລົງເລິກໃນວຽກງານສະໜັບສະໜູນການສ້າງກົດໝາຍວ່າດ້ວຍເຄມີ ແລະ ນິຕິກຳກ່ຽວກັບການນຳໃຊ້ແຮ່ໄຍຫີນ, ສ້າງຖານຂໍ້ມູນແຫ່ງຊາດກ່ຽວກັບການນຳໃຊ້ແຮ່ໄຍຫີນ, ຈັດກອງປະຊຸມເປີດກວ້າງທັງພາຍໃນ ແລະ ສາກົນ ເພື່ອນຳສະເໜີຖານຂໍ້ມູນແຫ່ງຊາດກ່ຽວກັບການນຳໃຊ້ແຮ່ໄຍຫີນສະບັບທຳອິດ ແລະ ວາງແຜນໃນຕໍ່ໜ້າ ເພື່ອພັດທະນາຍຸດທະສາດແຫ່ງຊາດໃນການຢຸດນຳໃຊ້ແຮ່ໄຍຫີນ, ໄປທັດສະນະແລກປ່ຽນບົດຮຽນກ່ຽວກັບສານໄຍຫີນ ເພື່ອຍົກລະດັບຄວາມສາມາດໃຫ້ຜູ້ຮັບຜິດຊອບຫຼັກ ໂດຍການເຂົ້າຮ່ວມການຝຶກອົບຮົມ ຫຼື ກອງປະຊຸມໃນພາກພື້ນ.
ແຮ່ໄຍຫີນຖືກນຳໃຊ້ເຂົ້າໃນອຸດສາຫະກຳຕ່າງໆຢ່າງແພ່ຫຼາຍໃນທົ່ວໂລກ ໂດຍສະເພາະໃນຂົງເຂດອຸດສາຫະກຳທີ່ກ່ຽວຂ້ອງກັບເຄື່ອງໃຊ້ທົນຕໍ່ຄວາມຮ້ອນ, ອຸປະກອນທົນທານຕໍ່ແຮງຮຸກຖູ ແລະ ອື່ນໆ. ໄລຍະຫຼັງໆມານີ້ຫຼາຍປະເທດລວມທັງປະເທດລາວພວກເຮົາກໍ່ມີມາດຕະການໃນການຄວບຄຸມການນຳໃຊ້ພ້ອມທັງເຝີຍແຜ່ຜົນກະທົບຕໍ່ລະບົບຫາຍໃຈ ຫາກມີການສະສົມເຂົ້າຫຼາຍກໍ່ຈະກໍ່ໃຫ້ເກີດເປັນມະເຮັງປອດໄດ້.
ອີງຕາມຂໍ້ມູນການນຳໃຊ້ສານດັ່ງກ່າວໃນ ສປປ ລາວ ພວກເຮົາໃນຊຸມປີ 2000 ປະມານ 5 ພັນໂຕນ ແລະ ຂໍ້ມູນ ປີ 2013 ທີ່ກົມອຸດສາຫະກຳ ແລະ ຫັດຖະກຳ ໄດ້ສຳຫຼວດທົ່ວປະເທດມີປະມານ 8 ພັນໂຕນ ຖືກນຳໃຊ້ຫຼາຍໃນຜະລິດຕະພັນກະເບື້ອງມຸງຫຼັງຄາ, ແຜ່ນຢິບຊຳຕ່າງໆ ຜູ້ທີ່ສ່ຽງໄດ້ຮັບຜົນກະທົບສ່ວນຫຼາຍແມ່ນກຳມະກອນທີ່ເຮັດໃນໂຮງງານກະເບື້ອງ.
[ພາບ ແລະ ຂ່າວຈາກ ໜັງສືພິມເສດຖະກິດ-ການຄ້າ]
