ກອງປະຊຸມປະຈຳສົກປີ 2013-2014 ຂອງຂະແໜງການອຸດສາຫະກຳ ແລະ ການຄ້າ ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 12 ມີນາ 2015 ທີ່ຫ້ອງປະຊຸມໃຫຍ່ ກະຊວງອຸດສາຫະກຳ ແລະ ການຄ້າ ພາຍຫຼັງທີ່ໄດ້ດຳເນີນກອງປະຊຸມພາຍໃນມາເປັນເວລາ ໜຶ່ງວັນເຕັມ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດ ການຜະລິດ ແລະ ຈໍລະຈອນ ທັງເປັນຜູ້ຊີ້ນຳ ວຽກງານຂົງເຂດ ອຸດສາຫະກຳ ແລະ ການຄ້າ. ການນຳຂອງກະຊວງ ໂດຍມີ ທ່ານ ນາງ ເຂັມມະນີ ພົນເສນາ, ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ, ບັນດາທ່ານລັດຖະມົນຕີຊ່ວຍວ່າການ, ຄະນະກົມ, ຄະນະພະແນກ ແລະ ພະນັກງານຫຼັກແຫຼ່ງອ້ອມຂ້າງກະຊວງ, ຄະນະພະແນກອຸດສາຫະກຳ ແລະ ການຄ້າຂັ້ນແຂວງ, ນະຄອນຫຼວງ, ຕ່າງໜ້າສະພາການຄ້າ ແລະ ອຸດສາຫະກຳແຫ່ງຊາດ, ຫົວໜ້ວຍທຸລະກິດ, ແຂກທີ່ຖືກເຊີນຈາກບັນດາກະຊວງ ຂະແໜງການ ຂັ້ນສູນກາງ ແລະ ທ້ອງຖິ່ນ ເຂົ້າຮ່ວມ ລວມ 241 ທ່ານ.
ກອງປະຊຸມ ນອກຈາກຈະໄດ້ມີການທົບທວນຄືນບັນດາວຽກງານທີ່ພົ້ນເດັ່ນທີ່ໄດ້ປະຕິບັດໃນໄລຍະຜ່ານມາ ໂດຍສະເພາະບັນດາຄາດໝາຍ-ແຜນການຕ່າງໆທີ່ໄດ້ກຳນົດໃວ້ໃນແຜນພັດທະນາ 5 ປີ ຄັ້ງຜ່ານມາ ກໍ່ຄືແຜນການປະຈຳສົກປີ 2013-2014 ຂອງຂະແໜງການແລ້ວ, ຍັງຈະໄດ້ສຸມໃສ່ຄົ້ນຄວ້າປະກອບຄຳເຫັນຕໍ່ເອກະສານສຳຄັນຈຳນວນໜຶ່ງ ເຊັ້ນ: ຮ່າງວິໃສທັດຮອດປີ 2030, ຍຸດທະສາດ ຮອດປີ 2025, ແຜນພັດທະນາ 5 ປີ ຄັ້ງທີ VIII (2016-2020) ຂອງຂະແໜງ ອຸດສາຫະກຳ ແລະ ການຄ້າ; ນະໂຍບາຍຂອງຂະແໜງ ອຸດສາຫະກຳ ແລະ ການຄ້າ ເພື່ອປະຕິບັດໂຄງການຄ້ຳປະກັນສະບຽງອາຫານຂອງລັດຖະບານ ແລະ ສົ່ງເສີມການຜະລິດເປັນສິນຄ້າຂອງປະຊາຊົນ. ພ້ອມດຽວກັນ, ຍັງຈະໄດ້ພ້ອມກັນປຶກສາຫາລື ເພື່ອຊອກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ບັນຫາ ແລະ ສິ່ງທ້າທາຍ ລວມທັງວິທີການແກ້ໄຂ ຕໍ່ການປະຕິບັດພາລະບົດບາດຄຸ້ມຄອງມະຫາພາກຂອງຂະແໜງການ ເປັນຕົ້ນບັນຫາການປັບປຸງ ແລະ ດັດສົມໂຮງງານປຸງແຕ່ງໄມ້; ບັນຫາການຂຶ້ນທະບຽນວິສາຫະກິດ; ບັນຫາການຄຸ້ມຄອງສິນຄ້າທີ່ກະທົບໄວ; ບັນຫາຂອງການນຳເຂົ້າພາຫະນະ; ບັນຫາໂກຕ້າສົ່ງອອກສິນຄ້າ ແລະ ອື່ນໆ ທີ່ສັງຄົມໃຫ້ຄວາມສົນໃຈ ແນໃສ່ສ້າງຄວາມເປັນເອກະພາບທາງດ້ານທັດສະນະ, ແກ້ໄຂບັນຫາຫຍໍ້ທໍ້ທາງດ້ານນິຕິກຳ ໃຫ້ເຂັ້ມງວດ ແລະ ແກ້ໄຂບັນຫາຊ່ອງຫວ່າງຕ່າງໆໃນສັງຄົມ.
ໃນພາກບ່າຍ ກອງປະຊຸມ ຍັງຈະໄດ້ຮັບຟັງການໂອ້ລົມ ຂອງທ່ານ ສົມສະຫວາດ ເລັ່ງສະຫວັດ ຮອງນາຍົກ ລັດຖະມົນຕີ ຜູ້ຊີ້ນຳວຽກງານຂົງເຂດເສດຖະກິດ ການຜະລິດ ແລະ ຈໍລະຈອນ ເພື່ອເປັນທິດຊີ້ນຳໃນການຈັດຕັ້ງປະຕິບັດວຽກງານຂອງຂະແໜງອຸດສາຫະກຳ ແລະ ການຄ້າໃນຊຸມປີຕໍ່ໜ້າ.
[ພາບ ແລະ ຂ່າວ: ສູນສະຖິຕິ ແລະ ຂ່າວສານ]
