ກົມສົ່ງເສີມ ແລະ ພັດທະນາສິນຄ້າ, ກະຊວງອຸດສາຫະກຳ ແລະ ການຄ້າ ຮ່ວມກັບ ກົມສົ່ງເສີມການຄ້າລະຫວ່າງປະເທດ ກະຊວງພານິດແຫ່ງຣາຊະອານາຈັກໄທ ໄດ້ເປີດງານວາງສະແດງສິນຄ້າປະຈຳປີ 2015 ຂຶ້ນ ໂດຍມີ 308 ຮ້ານເຂົ້າຮ່ວມ, ຄາດປະຊາຊົນເຂົ້າຮ່ວມຫຼາຍກວ່າ 1,3 ແສນຄົນ ແລະ ມູນຄ່າການຄ້າພາຍໃນງານສູງເຖິງ 8 ຕື້ກີບ.
ງານດັ່ງກ່າວຈັດຂຶ້ນລະຫວ່າງວັນທີ 6 – 10 ພຶດສະພາ 2015 ພາຍໃຕ້ຫົວຂໍ້ Lao-Thai Trade Exhibition/Thailand week 2015 ມີຮ້ານທັງໝົດ 308 ຫ້ອງຂາຍ; ໃນນັ້ນ ມີຜູ້ປະກອບການໄທເຂົ້າຮວ່ມງານ 258 ຫ້ອງ ແລະ ຜູ້ປະກອບການສິນຄ້າຂອງລາວເຂົ້າຮ່ວມ 50 ຫ້ອງ ທີ່ປະກອບດ້ວຍ ສິນຄ້າທີ່ມີຄຸນນະພາບຫຼາຍປະເພດເຊັ່ນ: ສິນຄ້າ LifeStyle ( ອັນຍະມະນີ, ເສື້ອຜ້າ ແລະ ເຄື່ອງປະດັບ ) ສິນຄ້າເພື່ອສຸຂະພາບ, ເຄື່ອງດື່ມ, ເຄື່ອງກົນຈັກກະສິກຳ, ອຸປະກອນກໍ່ສ້າງ, ເຄື່ອງໃຊ້ໄຟຟ້າ, ເຄື່ອງດ້ານການສຶກສາ ແລະ ອື່ນໆ.
ທ່ານ ພັນ ວິໄລສົມ ຫົວໜ້າກົມສົ່ງເສີມ ແລະ ການພັດທະນາສິນຄ້າ ໄດ້ກ່າວວ່າ: ການຈັດງານຄັ້ງນີ້ ກໍ່ເພື່ອສືບຕໍ່ເສີມສ້າງການຮວ່ມມືລະຫວ່າງປະເທດລາວ – ໄທ. ນອກນັ້ນຍັງເປັນການຕອບໂຈດດ້ານການສຶກສາຂອງລາວ ແລະ ໄທໃນການສຶກສາຕະຫຼາດ ແລະ ສິນຄ້າເຊິ່ງກັນ ແລະ ກັນ ກ້າວໄປສູ້ການຮ່ວມມືດ້ານການຄ້າຫຼາຍຂຶ້ນ.
ທ່ານກ່າວຕື່ມວ່າ: ງານວາງສະແດງຄັ້ງນີ້ມີຜູ້ປະກອບການຂອງລາວນຳສິນຄ້າເຂົ້າມາວາງສະແດງເຖິງ 50 ຫ້ອງ; ສິນຄ້າສ່ວນໃຫຍ່ແມ່ນຜະລິດຕະພັນຫັດຖະກຳ, ກະສິກຳ, ໄມ້ແກະສະຫຼັກ, ເຟີນີເຈີ, ສິນຄ້າໂອດ໊ອບ, ອາຫານ ແລະ ເຄື່ອງດື່ມ, ຄາດວ່າມູນຄ່າການຄ້າພາຍໃນງານຫຼາຍກວ່າປີຜ່ານມາ ປະມານ 8 ຕື້ກີບ.
ທ່ານ ສຸພາພັດ ອ໋ອງແສງຄຸນ ຮອງຫົວໜ້າກົມສົ່ງເສີມການຄ້າລະຫວ່າງປະເທດ, ກະຊວງພານິດໄທ ໄດ້ກ່າວວ່າ: ງານດັ່ງກ່າວເປັນການສົ່ງເສີມການຄ້າລາວ – ໄທ ໃຫ້ມີການຂະຫຍາຍຕົວຍິ່ງຂຶ້ນ ເຊິ່ງເຫັນວ່າມູນຄ່າການຄ້າລາວ – ໄທ ໃນປີ 2014 ຜ່ານມາມີ 5.100 ລ້ານໂດລາສະຫະລັດ, ສະເພາະ 3 ເດືອນ ຕົ້ນປີນີ້ ໄທ ສົ່ງສິນຄ້າມາລາວເພີ່ມຂຶ້ນ 1,8% ແລະ ລາວ ສົ່ງສິນຄ້າໄປໄທ ເພື່ມຂຶ້ນ 13% .
ໃນງານຈະມີກິດຈະກຳທີ່ຫຼາກຫຼາຍເປັນຕົ້ນແມ່ນ ການວາງສະແດງ ແລະ ຈຳໜ່າຍສິນຄ້າ, ວັນທີ 7 – 8 ພຶດສະພາ ຈະມີງານເປີດເວທີສຳມະນາທາງເສດຖະກິດ, ການຝຶກອົບຮົມວິຊາຊີບ, ການແລກປ່ຽນວັດທະນະທຳ, ງານຄອນເສີດມິດຕະພາບສອງຊາດ ແລະ ອື່ນໆ.
ພີທີເປີດງານ ຈັດຂຶ້ນໃນຕອນບ່າຍຂອງວັນທີ 06/06/2015 ທີ່ສູນການຄ້າລາວ – ໄອເຕັກ ໂດຍການເປັນປະທານຂອງ ທ່ານ ສຽວສະຫວາດ ສະແຫວງສຶກສາ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ, ທ່ານ ພິຊະນຸ ຈັນທະວີທັນ ເອກອະຄະລາຊະທູດຣາຊະອານາຈັກໄທ ປະຈຳ ສປປ ລາວ.
[ບົດຂ່າວ: ໜັງສືພິມເສດຖະກິດ-ການຄ້າ]
