ໃນລະຫວ່າງວັນທີ 27 ເມສາ ຫາ 22 ພຶດສະພາ 2015 ທີ່ຜ່ານມາ, ສູນສະຖິຕິ ແລະ ຂ່າວສານ, ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ໄດ້ເປີດຊຸດຝຶກອົບຮົມການນຳໃຊ້ປຶ້ມຄູ່ມື ວຽກງານສະຖິຕິອຸດສາຫະກຳປຸງແຕ່ງ ແລະ ການຄ້າ ໃຫ້ຫ້ອງການອຸດສາຫະກຳ ແລະ ການຄ້າ ເມືອງທົ່ວປະເທດຂຶ້ນ ໂດຍການເປັນປະທານຂອງ ທ່ານ ບົວຈັນ ບຸນວົງໄຊ ຮອງຫົວໜ້າກົມແຜນການ ແລະ ການຮ່ວມມື ແລະ ໄດ້ຮັບກຽດກ່າວປິດໂດຍ ທ່ານ ສິລິສຳພັນ ວໍຣະຈິດ ກຳມະການຄະນະພັກກະຊວງ, ຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກຳ ແລະ ການຄ້າ.
ຈຸດປະສົງຂອງການຝຶກອົບຮົມຄັ້ງນີ້ ເພື່ອໃຫ້ພະນັກງານວິຊາການ ຜູ້ເຮັດວຽກສະຖິຕິ ໃນຂົງເຂດອຸດສາຫະກຳ ແລະ ການຄ້າ ທົ່ວປະເທດ ໄດ້ຮຽນຮູ້ວິທີການນຳໃຊ້ປຶ້ມຄູ່ມື ວຽກງານສະຖິຕິອຸດສາຫະກຳປຸງແຕ່ງ ແລະ ການຄ້າ ແລະ ເພື່ອໃຫ້ຮັບຮູ້ ເປັນເອກະພາບກັນ ເຖິງບັນດາຫຼັກການ, ວິທີການ ແລະ ການນຳໃຊ້ຕາຕະລາງເກັບກຳຂໍ້ມູນ ສະຖິຕິອຸດສາຫະກຳປຸງແຕ່ງ ແລະ ການຄ້າ ທົ່ວປະເທດ, ນອກນັ້ນຍັງເປັນການແລກປ່ຽນປະສົບການ ແລະ ບົດຮຽນໃນການຈັດຕັ້ງປະຕິບັດ ການເກັບກຳລາຍງານຂໍ້ມູນຕົວເລກສະຖິຕິຂອງແຕ່ລະທ້ອງຖິ່ນ.
ຜ່ານການຝຶກອົບຮົມໃນແຕ່ລະຊຸດ ບັນດານັກສຳມະນາກອນ ແລະ ນັກວິທະຍາກອນ ໄດ້ເອົາໃຈໃສ່ເຂົ້າຮ່ວມຢ່າງພ້ອມພຽງກັນ ທັງໄດ້ເອົາໃຈໃສ່ຮຽນຮູ້ ແລກປ່ຽນບົດຮຽນເຊິ່ງກັນ ແລະ ກັນ, ມີການປະກອບຄຳຄິດເຫັນ ແລະ ຕັ້ງຄຳຖາມຢ່າງກົງໄປກົງມາ ເຮັດໃຫ້ນັກສຳມະນາກອນສາມາດຮັບຮູ້ໄດ້ເຖິງຄວາມຈຳເປັນ, ຄວາມສຳຄັນ ຂອງຫຼັກການ ວິທີການເກັບກຳ ແລະ ການລາຍງານ ຕົວເລກສະຖິຕິອຸດສາຫະກຳປຸງແຕ່ງ ແລະ ການຄ້າ, ນອກນັ້ນ ນັກສຳມະນາກອນ ຍັງໄດ້ຖືເອົາໂອກາດນີ້ ເປັນເວທີໃນການສົນທະນາ ປຶກສາຫາລື ແລະ ຝຶກຕົນເອງໃນການສະແດງອອກ ແລະ ການເຮັດວຽກດ້ານວິຊາການຂອງຕົນອີກດ້ວຍ.
ການຝຶກອົບຮົມໃນຄັ້ງນີ້ ຖືເປັນບາດກ່າວໜຶ່ງໃນການພັດທະນາ ສ້າງຄວາມເຂັ້ມແຂງ ດ້ານວຽກງານສະຖິຕິອຸດສາຫະກຳປຸງແຕ່ງ ແລະ ການຄ້າ ໃຫ້ກ້າວໄປຂ້າງໜ້າ, ແນ່ໃສ່ສ້າງຄວາມເປັນເອກະພາບກັນ ດ້ານການເກັບກຳ ແລະ ລາຍງານຕົວເລກສະຖິຕິ ເພື່ອຄວາມສະດວກ ວ່ອງໄວ ແລະ ໄດ້ມາຊຶ່ງຂໍ້ມູນທີ່ມີຄຸນນະພາບ ສາມາດຕອບໂຈດ ສະພາບຄວາມເປັນຈິງຂອງເສດຖະກິດພາຍຂອງປະເທດໄດ້.
ຊຸດຝຶກອົບຮົມ ການນຳໃຊ້ປຶ້ມຄູ່ມື ວຽກງານສະຖິຕິອຸດສາຫະກຳປຸງແຕ່ງ ແລະ ການຄ້າ ໃຫ້ຫ້ອງການອຸດສາຫະກຳ ແລະ ການຄ້າ ເມືອງທົ່ວປະເທດ ເປັນກິດຈະກຳໜຶ່ງຂອງ ໂຄງການສ້າງຄວາມເຂັ້ມແຂງ ດ້ານການພັດທະນາວຽກງານສະຖິຕິອຸດສາຫະກຳປຸງແຕ່ງ ແລະ ການຄ້າ (ໂຄງການ LAOSTAT) ທີ່ສະໜັບສະໜູນທຶນໂດຍ ທະນາຄານໂລກ (World Bank), ຈັດຝຶກອົບຮົມກັນ 4 ຊຸດ ແຕ່ລະຊຸດແມ່ນດຳເນີນໄປເປັນໄລຍະເວລາ 05 ວັນ: ຊຸດທີ 01 ຈັດຂຶ້ນໃນລະຫວ່າງ ວັນທີ 27 ເມສາ ຫາ 01 ພຶດສະພາ 2015 ທີ່ໂຮງແຮມ ເມີຄຽວ, ນະຄອນຫລວງວຽງຈັນ ມີນັກສໍາມະນາກກອນເຂົ້າຮ່ວມ 46 ທ່ານ, ຊຸດທີ 2 ຈັດຂຶ້ນໃນລະຫວ່າງ ວັນທີ 04-08 ພຶດສະພາ 2015 ທີໂຮງແຮມ ເສດຖາປາລາສ, ນະຄອນຫຼວງວຽງຈັນ ມີນັກສໍາມະນາກກອນເຂົ້າຮ່ວມ 54 ທ່ານ, ຊຸດທີ 3 ຈັດຂຶ້ນໃນລະຫວ່າງ ວັນທີ 11-15 ພຶດສະພາ 2015 ທີ່ໂຮງແຮມ ເສດຖາປາລາສ, ນະຄອນຫລວງວຽງຈັນ ມີນັກສໍາມະນາກກອນເຂົ້າຮ່ວມ 57 ທ່ານ, ແລະ ຊຸດທີ 4 ຈັດຂຶ້ນໃນລະຫວ່າງ ວັນທີ 18-22 ພຶດສະພາ 2015 ທີໂຮງແຮມ ເມີຄຽວ, ນະຄອນຫລວງວຽງຈັນ ມີນັກສໍາມະນາກກອນເຂົ້າຮ່ວມ 57 ທ່ານ, ພ້ອມນັກວິທະຍາກອນ ແລະ ແຂກຈາກກົມແຜນການ ແລະ ການຮ່ວມມື, ກົມການນຳເຂົ້າ ແລະ ສົ່ງອອກ, ກົມການຄ້າພາຍໃນ, ກົມອຸດສາຫະກຳ ແລະ ຫັດຖະກຳ, ກົມທະບຽນ ແລະ ຄຸ້ມຄອງວິສາຫະກິດ ເຂົ້າຮ່ວມ ລວມທັງໝົດ 214 ທ່ານ.
[ສູນສະຖິຕິ ແລະ ຂ່າວສານ]
