ກົມແຜນການ ແລະ ການຮ່ວມມື (ຜຮ) ໄດ້ເປີດກອງປະຊຸມໃຫຍ່ ຄັ້ງທີ I ຂອງໜ່ວຍສະຫະພັນແມ່ຍິງ ກົມແຜນການ ແລະ ການຮ່ວມມື, ພ້ອມທັງປ່ອນບັດເລືອກຕັ້ງເອົາຄະນະໜ່ວຍສະຫະພັນແມ່ຍິງ ກົມ ຜຮ ຂຶ້ນໃນຕອນບ່າຍຂອງວັນທີ 04 ມີຖຸນາ 2015 ທີ່ຜ່ານມາ ໂດຍໃຫ້ກຽດເປັນປະທານຂອງ ທ່ານ ນາງ ຈັນສຸກ ແສງພະຈັນ ປະທານຄະນະບໍລິຫານງານສະຫະພັນແມ່ຍິງ ກະຊວງອຸດສາຫະກຳ ແລະ ການຄ້າ, ພ້ອມດ້ວຍສະມາຊິກ ທັງໝົດ 15 ສະຫາຍ ແລະ ແຂກທີ່ຖືກເຊີນອີກຈຳນວນໜຶ່ງ.
ໃນທີ່ປະຊຸມໄດ້ຜ່ານຮ່າງບົດລາຍງານການເມືອງ ສະຫຼຸບຕີລາຄາການຊີ້ນຳໆພາ ແລະ ການເຄື່ອນໄຫວຂອງໜ່ວຍສະຫະພັນແມ່ຍິງກົມ ຜຮ ຕະຫຼອດໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ຈາກນັ້ນກໍ່ໄດ້ອ່ານຜ່ານບົດສຳຫຼວດການນຳພາຂອງຄະນະໜ່ວຍໃນສະໄໝຜ່ານມາ ແລະ ດຳເນີນການປ່ອນບັດຄັດເລື່ອກຄະນະໜ່ວຍຊຸດໃໝ່.
ຜົນການປ່ອນບັດເລືອກຄະນະໜ່ວຍສະຫະພັນແມ່ຍິງກົມ ຜຮ ຊຸດໃໝ່ ໄດ້ເປັນເອກະພາບເລືອກ ທ່ານ ນາງ ວິພະຈັນ ອົບມາ ເປັນຫົວໜ້າໜ່ວຍສະຫະພັນແມ່ຍິງກົມ ຜຮ; ທ່ານ ນາງ ວິໄລວັນ ບຸນເລີດ ເປັນຮອງຫົວໜ້າໜ່ວຍສະຫະພັນແມ່ຍິງກົມ ຜຮ ແລະ ທ່ານ ນາງ ນິດນິດາ ພົງສະຫວັດ ເປັນກຳມະການ, ຮັບຜິດຊອບວຽກງານກວດກາ.
ໃນຕອນທ້າຍ ທ່ານ ນາງ ຈັນສຸກ ແສງພະຈັນ ໄດ້ໂອ້ລົມຕໍ່ກອງປະຊຸມວ່າ: ຜ່ານການເຄື່ອນໄຫວໃນໄລຍະໜຶ່ງປີຜ່ານມາເຫັນວ່າ ຄະນະໜ່ວຍສະຫະພັນແມ່ຍິງກົມ ຜຮ ໄດ້ເຄື່ອນໄຫວຕາມພາລະບົດບາດໄດ້ດີພໍສົມຄວນ ແລະ ເພື່ອເຮັດໃຫ້ ຄະນະໜ່ວຍສະຫະພັນແມ່ຍິງກົມ ຜຮ ກາຍເປັນກຳລັງແຮງໃຫ້ແກ່ ພັກ-ລັດ ຈະຕ້ອງໄດ້ເອົາໃຈໃສ່ຕໍ່ 3 ບັນຫາຫຼັກຄື: (ໜຶ່ງ) ຄົ້ນຄວ້າເຊື່ອມຊຶມໃນແນວທາງນະໂຍບາຍຂອງພັກ-ລັດ, ຄົ້ນຄວ້າກົດໝາຍ ແລະ ນິຕິກຳຕ່າງໆ ທີ່ຕິດພັນກັບແມ່ຍິງ ແລະ ນັບທັງວຽກເຊື່ຶອມລະຫວ່າງບົດບາດ ຍິງ-ຊາຍ ເພື່ອເປັນການປົກປ້ອງສິດ ແລະ ພັນທະຂອງແມ່ຍິງ; (ສອງ) ເອົາໃຈໃສ່ໃນການພັດທະນາຕົນເອງໃຫ້ມີຄວາມຮູ້ ຄວາມສາມາດ ເພື່ອໃຫ້ທັນຍຸກທັນສະໄໝ, ນອກນັ້ນຍັງຕ້ອງຝຶກຝົນຫຼໍ່ຫຼອມຕົນເອງ ແລະ ພິເສດແມ່ນໃຫ້ຮັກສາຂະໜົບທຳນຽມທີ່ເປັນເອກະລັກຂອງແມ່ຍິງລາວ ເປັນຕົ້ນແມ່ນວັດທະນະທຳການນຸ່ງຖື, ການຢູ່, ການກິນ ໃຫ້ຮັກສາມູນເຊື້ອນີ້ໃວ້, ອີກຢ່າງໜຶ່ງກໍ່ຄືຄວາມການສະແດງອອກໃນການປະກອບຄຳຄິດ ຄຳເຫັນໃນທີ່ກອງປະຊຸມຕ່າງໆ; ແລະ (ສາມ) ໃຫ້ເອົາໃຈໃສ່ໃນການຈັດຕັ້ງປະຕິບັດວຽກງານສະຫະພັນແມ່ຍິງໃຫ້ໄດ້ປະເພດດີເດັ່ນ ໂດຍຂໍໃຫ້ເອົາໃຈໃສ່ເຂົ້າຮ່ວມ ແລະ ປະກອບສ່ວນໃນຂະບວນການເຄື່ອນໄຫວຂອງອົງການຈັດຕັ້ງຕ່າງໆ.
[ບົດຂ່າວ: ສູນສະຖິຕິ ແລະ ຂ່າວສານ]
