ພາຍຫຼັງທີ່ສຳເລັດການເຂົ້າຜ່ານຮ່າງກົດໝາຍວ່າດ້ວຍ ການແຂ່ງຂັນທາງທຸລະກິດ ໃນກອງປະຊຸມສະໄໝ ສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VII ໃນຄັ້ງວັນທີ 14 ກໍລະກົດ 2015 ທີ່ຜ່ານມາ ແລະ ກອງປະຊຸມດັ່ງກ່າວນີ້ ກໍໄດ້ມີການຮັບຮອງເອົາກົດໝາຍ ສາມສະບັບ ຊຶ່ງໃນນີ້ກໍຄື ກົດໝາຍວ່າດ້ວຍ ການແຂ່ງຂັນທາງທຸລະກິດ ແລະ ໄດ້ມີມະຕິຮັບຮອງເອົາສະບັບເລກທີ 09/ສພຊ, ລົງວັນທີ 21 ກໍລະກົດ 2015, ດ້ວຍເຫດນີ້ ກົມການຄ້າພາຍໃນ ກໍຄືກະຊວງ ອຸດສາຫະກຳ ແລະ ການຄ້າ ໃນຖານະທີ່ຮັບຜິດຊອບໂດຍກົງວຽກງານແຂ່ງຂັນທາງທຸລະກິດ ໄດ້ຮ່ວມກັບກຳມາທິການ ກົດໝາຍ ແລະ ກຳມາທິການເສດຖະກິດ ແຜນການ ແລະ ການເງິນ ຂອງສະພາແຫ່ງຊາດ ຈັດກອງປະຊຸມຮຽບຮຽງຄືນ ຮ່າງກົດໝາຍວ່າດ້ວຍ ການແຂ່ງຂັນທາງທຸລະກິດ ໃນລະຫວ່າງວັນທີ 10 – 11 ສິງຫາ 2015 ທີ່ທ່າລາດ ແຂວງ ວຽງຈັນ ໂດຍການເປັນປະທານຮ່ວມຂອງ ສຈ ດາວອນ ຫວ່າງວິຈິດ ປະທານກຳມາທິການກົດໝາຍ, ສະພາແຫ່ງຊາດ, ທ່ານ ບຸນມີ ມະນີວົງ ລັດຖະມົນຕີຊ່ວຍວ່າການກະຊວງ ອຸດສາຫະກຳ ແລະ ການຄ້າ ແລະ ທ່ານ ດຣ ນ ສຸວັນເພັງ ບຸບຜານຸວົງ ປະທານກຳມາທິການເສດຖະກິດ ແຜນການ ແລະ ການເງິນ, ສະພາແຫ່ງຊາດ ເຂົ້າຮ່ວມໃນກອງປະຊຸມນີ້ຍັງມີທ່ານ ຫົວໜ້າກົມກົດໝາຍ ຈາກສະພາແຫ່ງຊາດ, ຫົວໜ້າກົມກົດໝາຍ ຫ້ອງວ່າການປະທານປະເທດ, ຫົວໜ້າກົມກົດໝາຍ ກະຊວງຍຸຕິທຳ, ຫົວໜ້າກົມການຄ້າພາຍໃນ ກະຊວງ ອຸດສາຫະກຳ ແລະ ການຄ້າ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ແລະ ພະນັກງານວິຊາການ ຈາກສະພາແຫ່ງຊາດ ພ້ອມດ້ວຍຄະນະຮັບຜິດຊອບສ້າງຮ່າງກົດໝາຍດັ່ງກ່າວ ແລະ ຜູ້ປະສານງານໂຄງການ GIZ ເຂົ້າຮ່ວມ, ເຊິ່ງມີຜູ້ເຂົ້າຮ່ວມທັງໝົດ 50 ກວ່າທ່ານ.
ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການປັບປຸງ ແລະ ຮຽບຮຽງຄືນ ຮ່າງກົດໝາຍວ່າດ້ວຍ ການແຂ່ງຂັນທາງທຸລະກິດ ທີ່ໄດ້ຖືກພິຈາລະນາຮັບຮອງເອົາ ໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VII ໃນວັນທີ 14 ກໍລະກົດທີ່ຜ່ານມາ, ຕາມການປະກອບຄໍາເຫັນຂອງບັນດາທ່ານຜູ່ແທນສະມາຊິກສະພາແຫ່ງຊາດ ແລະ ທິດຊີ້ນຳຂອງທ່ານປະທານກອງປະຊຸມ ທັງນີ້ກໍເພື່ອເຮັດໃຫ້ກົດໝາຍດັ່ງກ່າວນີ້ ມີເນື້ອໃນຄົບຖ້ວນ, ຮັດກຸມ, ສົມບູນດ້ານເນື້ອໃນ ສາມາດນໍາໄປຈັດຕັ້ງປະຕິບັດໄດ້ຢ່າງມີປະສິດທິຜົນ ທັງໃຫ້ສອດຄ່ອງ ກັບສະພາບການຂະຫຍາຍຕົວ ເສດຖະກິດ-ສັງຄົມ ຂອງລາວເຮົາ ພ້ອມທັງສາມາດເຊື່ອມໂຍງເຂົ້າກັບພາກພື້ນ ແລະ ສາກົນ ຊຶ່ງຕາມແຜນແມ່ບົດການສ້າງປະຊາຄົມເສດຖະກິດອາຊຽນ ແມ່ນ ໃຫ້ບັນດາປະເທດສະມາຊິກອາຊຽນ ຕ້ອງໄດ້ປະກາດໃຊ້ ນະໂຍບາຍ ແລະ ກົດໝາຍວ່າດ້ວຍ ການແຂ່ງຂັນທາງທຸລະກິດ ກ່ອນການລວມຕົວເຂົ້າເປັນປະຊາຄົມເສດຖະກິດອາຊຽນ ໃນທ້າຍປີ 2015 ນີ້.
ໃນກອງປະຊຸມດັ່ງກ່າວນີ້ ບັນດາຜູ້ເຂົ້າຮ່ວມໄດ້ມີການປະກອບຄຳຄິດຄຳເຫັນໃສ່ຮ່າງກົດໝາຍຢ່າງກົງໄປກົງມາ ພ້ອມນີ້ທີ່ປະຊຸມຍັງເຫັນດີເປັນເອກະພາບໃຫ້ເພີ່ມອີກ ໜຶ່ງມາດຕາ (ຄື: ກອງເລຂາ ຂອງ ຄະນະກຳມະການຄວບຄຸມການແຂ່ງຂັນທາງທຸລະກິດ) ຊຶ່ງເຮັດໃຫ້ກົດໝາຍສະບັບນີ້ ລວມທັງໝົດມີ IX ພາກ, 8 ໝວດ ແລະ 95 ມາດຕາ.
