ໃນຕອນເຊົ້າ ຂອງວັນທີ 12 ສີງຫາ 2015 ທີ່ຜ່ານມານີ້ ຢູ່ທີ່ຫ້ອງປະຊຸມ ໂຮງແຮມເຊີ່ງຊ່າງແຂວງອຸດົມໄຊ. ໄດ້ມີກອງປະຊຸມພົບປະລະຫວ່າງຄະນະຜູ້ແທນຂອງແຂວງອຸດົມໄຊ ກັບຄະນະຜູ້ແທນຂອງສະພາການຄ້າ ເມືອງລ້າ ສປ ຈີນ ຂື້ນ. ຝ່າຍລາວເຊີ່ງນຳພາໂດຍທ່ານ ສຸກ ບຸນທະຈິດ ເລຂາໜ່ວຍພັກຮອງຫົວໜ້າພະແນກອຸດສາຫະກຳ ແລະ ການຄ້າແຂວງອຸດົມໄຊ, ເປັນຫົວໜ້າຄະນະ. ຝ່າຍຈີນ ເຊີ່ງນຳພາໂດຍທ່ານ ເຈົາຈ້ຽນມິງ ຮອງປະທານສະພາການຄ້າ ເມືອງລ້າ ແຂວງຢຸນນານ ສປ ຈີນ ມີບັນດາພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມທັງໝົດຈຳນວນ 37 ສະຫາຍ, ຍິງ 5 ສະຫາຍ. ໃນນັ້ນ ຝ່າຍຈີນ 23 ສະຫາຍ, ຍິງ 3 ສະຫາຍ, ຝ່າຍລາວ 14 ສະຫາຍ, ຍິງ 2 ສະຫາຍ. ໃນວາລະດຳເນີນກອງປະຊຸມທ່ານ ສຸກ ບຸນທະຈິດ ຫົວໜ້າຄະນະຜູ້ແທນຝ່າຍລາວໄດ້ກ່າວສະແດງການຕ້ອນຮັບຂອງຄະນະຜູ້ແທນຝ່າຍຈີນທີ່ໄດ້ລົງມາຢ້ຽມຍາມແຂວງອຸດົມໄຊ ແລະ ກໍ່ໄດ້ລາຍງານສະພາບຂອງແຂວງອຸດົມໄຊໃຫ້ແກ່ຝ່າຍຈີນໄດ້ຮັບຊາບ. ຈາກນັ້ນທ່ານ ເຈົາຈ້ຽນມິງ ຫົວໜ້າຄະນະຜູ້ແທນຝ່າຍຈີນ ກໍ່ໄດ້ລາຍງານຈຸດປະສົງຂອງການລົງມາສຳຫຼວດການດຳເນີນທຸລະກິດຢູ່ແຂວງອຸດົມໄຊ. ພ້ອມດຽວກັນນັ້ນທາງຫົວໜ້າບໍລິສັດ ເຊີ່ງຊ່າງ ການຄ້າ ຈຳກັດ ໄດ້ລາຍງານສະພາບການດຳເນີນກິດຈະການຂອງບໍລິສັດ. ຈາກນັ້ນກອງປະຊຸມກໍ່ໄດ້ປຶກສາຫາລືແລກປ່ຽນຄຳຄິດເຫັນຂອງຄະນະຜູ້ແທນທັງສອງຝ່າຍຢ່າງກົງໄປກົງມາ ແລະ ວາງທິດທາງການພົວພັນຮ່ວມມືກັນເພື່ອພັດທະນາເສດຖະກິດສັງຄົມຂອງສອງປະເທດເວົ້າລວມ, ເວົ້າສະເພາະແມ່ນແຂວງອຸດົມໄຊ ກັບ ເມືອງລ້າ ແຂວງຢຸນນານ ສປ ຈີນ ໃຫ້ຈະເລີນງອກງາມຂື້ນກ່ວາເກົ່າ. ມາຮອດເວລາ 11:30 ທ່ານ ສຸກ ບຸນທະຈິດຫົວໜ້າຄະນະຜູ້ແທນຝ່າຍລາວກໍ່ໄດ້ສະຫຼຸບປິດກອງປະຊຸມ ແລະ ຖ່າຍຮູບພາບຮ່ວມກັນໄວ້ເປັນທີ່ລະລືກ.
ຂຽນໂດຍ: ຄຳຝັ້ນ ພາວິວົງກອນ
