ກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ໃນຖານະທີ່ຮັບຜິດຊອບໂດຍກົງວຽກງານປົກປ້ອງຜູ້ຊົມໃຊ້ ແລະ ວຽກງານແຂ່ງຂັນທາງທຸລະກິດ ໄດ້ຈັດກອງປະຊຸມສຳມະນາ ການສ້າງຄວາມຮັບຮູ້ ຄວາມເຂົ້າໃຈ ກ່ຽວກັບວຽກງານ ປົກປ້ອງຜູ້ຊົມໃຊ້ ແລະ ການແຂ່ງຂັນທາງທຸລະກິດ ທີ່ແຂວງຈຳປາສັກ ໃນລະຫວ່າງວັນທີ 21-24 ກັນຍາ 2015 ແລະ ແຂວງຫຼວງພະບາງ ໃນລະຫວ່າງວັນທີ 27-30 ກັນຍາ 2015 ທີ່ຜ່ານມາ, ຊຶ່ງທັງສອງກອງປະຊຸມດັ່ງກ່າວນີ້ ແມ່ນໄດ້ຮັບການສະໜັບສະໜູນທຶນ ຈາກອົງການ AANZ – CLIP ອົດສະຕຣາລີ – ນິວຊີແລນ ໂດຍການເປັນປະທານຮ່ວມຂອງ ທ່ານ ບຸນທຽນ ແກ້ວສີພາ ຮັກສາການຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ແລະ ທ່ານ Derek Farrell ຜູ້ອຳນວຍການພາກເໜືອ ຈາກຄະນະກຳມະການແຂ່ງທາງທຸລະກິດ ແລະ ປົກປ້ອງຜູ້ຊົມໃຊ້ ຈາກອົດສະຕຣາລີ ເຂົ້າຮ່ວມໃນກອງປະຊຸມສໍາມະນາມີ ຂະແໜງອຸດສາຫະກຳ ແລະ ການຄ້າ 4 ແຂວງ ພາກກາງ, 4 ແຂວງ ພາກໃຕ້ ແລະ 8 ແຂວງ ພາກເໜືອ, ບັນດາຂະແໜງການທີ່ກ່ຽວຂ້ອງ, ພາກທຸລະກິດ ແລະ ຜູ້ປະສານງານໂຄງການ GIZ ເຂົ້າຮ່ວມ, ເຊິ່ງມີຜູ້ເຂົ້າຮ່ວມທັງໝົດ 140 ກວ່າທ່ານ.
ຈຸດປະສົງຂອງການຈັດກອງປະຊຸມສຳມະນາໃນຄັ້ງນີ້ ແມ່ນ ເພື່ອເປັນການສ້າງຄວາມຮັບຮູ້ ແລະ ຄວາມເຂົ້າໃຈ ກ່ຽວກັບວຽກງານ ປົກປ້ອງຜູ້ຊົມໃຊ້ ແລະ ການແຂ່ງຂັນທາງທຸລະກິດ ໃຫ້ແກ່ພະນັກງານພາກລັດ ແລະ ເອກະຊົນ ເຊັ່ນ ຄວາມໝາຍຄວາມສໍາຄັນ, ກາລະໂອກາດ ແລະ ສິ່ງທ້າທາຍ ຂອງສອງວຽກງານດັ່ງກ່າວ ໂດຍສະເພາະແມ່ນ ການປົກປ້ອງສິດຂອງຜູ້ຊົມໃຊ້ ທີ່ໄດ້ຮັບຜົນກະທົບທາງລົບຕໍ່ຊີວິດ, ສຸຂະພາບ ແລະ ຊັບສິນ ຈາກການຊົມໃຊ້ສິນຄ້າ ແລະ ການບໍລິການ ແລະ ວຽກງານແຂ່ງຂັນທາງທຸລະກິດ ແມ່ນພັນທະໜຶ່ງທີ່ ສປປ ລາວ ໄດ້ລົງນາມແຜນແມ່ບົດການສ້າງປະຊາຄົມເສດຖະກິດອາຊຽນ ໃນທ້າຍປີ 2015 ນີ້ ດ້ວຍເຫດນີ້ ວຽກງານແຂ່ງຂັນທາງທຸລະກິດ ຖືໄດ້ວ່າເປັນວຽກງານໃໝ່ ສຳລັບ ສປປ ລາວເຮົາ ດັ່ງນັ້ນ ມັນມີຄວາມຈຳເປັນທີ່ຈະຕ້ອງໄດ້ສ້າງ ຄວາມຮູ້ຄວາມເຂົ້າໃຈພື້ນຖານໃຫ້ທັງພາກລັດ ແລະ ພາກທຸລະກິດ ເພື່ອເປັນການກະກຽມຄວາມພ້ອມ ແລະ ປັບປຸງດ້ານຕ່າງໆ ເປັນຕົ້ນແມ່ນ ດ້ານການເງິນ, ບຸກຄະລາກອນ, ຄຸນນະພາບ ມາດຕະຖານ ຂອງສິນຄ້າ ແລະ ການບໍລິການ ເພື່ອສາມາດແຂ່ງຂັນກັບປະເທດອື່ນໄດ້ ໃນກອງປະຊຸມດັ່ງກ່າວນີ້ ບັນດາຜູ້ເຂົ້າຮ່ວມໄດ້ມີການສົນທະນາແລກປ່ຽນ ບົດຮຽນ ແລະ ປະສົບການ ແລະ ສະພາບການປົກປ້ອງຜູ້ຊົມໃຊ້ ແລະ ການແຂ່ງຂັນທາງທຸລະກິດ ແມ່ນເຕັມໄປດ້ວຍບັນຍາກາດທີ່ຟົດຟື້ນດີ, ຊຶ່ງທ່ານ Derek Farrell ມີຄວາມເພິງພໍໃຈຫຼາຍໃນການຈັດສໍາມະນາຄັ້ງນີ້ ແລະ ໃຫ້ຄໍາໝັ້ນສັນຍາແກ່ທີມງານຂອງຝ່າຍລາວວ່າ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ໃນລັກສະນະນີ້ຕື່ມອີກ.
ກອງປະຊຸມ ທີ່ແຂວງຫຼວງພະບາງ
ກອງປະຊຸມ ທີ່ແຂວງຈຳປາສັກ
[ພາບ ແລະ ຂາວ: ກະຊວງອຸດສາຫະກຳ ແລະ ການຄ້າ]
