ກະຊວງອຸດສາຫະກຳ ແລະ ການຄ້າ (ອຄ) ໄດ້ເປີດກອງປະຊຸມປະກາດການແຕ່ງຕັ້ງ ຂອງຄະນະກົມຈຳນວນໜຶ່ງ ແລະ ຫົວໜ້າຫ້ອງການ ໂດຍອີງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ກະຊວງ ອຄ ໃນໄລຍະໃໝ່.
ກອງປະຊຸມໄດ້ຈັດຂຶ້ນໃນ ວັນທີ 09 ຕຸລາ ຜ່ານມາ ທີ່ກະຊວງ ອຄ ໂດຍການເປັນປະທານຂອງ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຄ ມີບັນດາຄະນະນຳກະຊວງ ອຄ, ລັດວິສາຫະກິດທີ່ຂຶ້ນກັບ ແລະ ພະນັກງານຊອງກະຊວງເຂົ້າຮ່ວມ.
ເນື້ອໃນການປະກາດການຈັດຕັ້ງໃນນີ້, ນາຍົກລັດຖະມົນຕີ ອອກດຳລັດເລກທີ 293/ນຍ ລົງວັນທີ 02 ຕຸລາ 2015 ວ່າດ້ວຍການແຕ່ງຕັ້ງຫົວໜ້າກົມກວດກາ ໄດ້ແຕ່ງຕັ້ງ ທ່ານ ພັນ ວິໄລສົມ ເປັນຫົວໜ້າກົມກວດກາ ກະຊວງ ອຄ, ດຳລັດເລກທີ 291/ນຍ ລົງວັນທີ 02 ຕຸລາ 2015 ແຕ່ງຕັ້ງ ທ່ານ ດຣ. ລາວຮົວ ເຈີຈິງ ເປັນຫົວໜ້າກົມນະໂຍບາຍການຄ້າຕ່າງປະເທດ, ດຳລັດເລກທີ 290/ນຍ, ລົງວັນທີ 02 ຕຸລາ 2015 ແຕ່ງຕັ້ງ ທ່ານ ບຸນທຽນ ແກ້ວສີພາ ເປັນຫົວໜ້າກົມການຄ້າພາຍໃນ, ດຳລັດເລກທີ 294/ນຍ ລົງວັນທີ 02 ຕຸລາ 2015 ແຕ່ງຕັ້ງ ທ່ານ ສົມຫວັງ ນິນທະວົງ ເປັນຫົວໜ້າກົມສົ່ງເສີມ ແລະ ພັດທະນາສິນຄ້າ, ດຳລັດເລກທີ 292/ນຍ ລົງວັນທີ 02 ຕຸລາ 2015 ແຕ່ງຕັ້ງ ທ່ານ ນາງ ຈັນສຸກ ແສງພະຈັນ ເປັນຫົວໜ້າກົມຈັດຕັ້ງ ແລະ ພະນັກງານ.
ພ້ອມດຽວກັນນັ້ນຂໍ້ຕົກລົງຂອງລັດຖະມົນຕີວ່າການກະຊວງ ອຄ ເລກທີ 2067/ອຄ.ຈພງ ລົງວັນທີ 09 ຕຸລາ 2015 ແຕ່ງຕັ້ງ ທ່ານ ພຸດທະວັນ ນັນທະວົງ ຮອງຫົວໜ້າຫ້ອງການກະຊວງ ອຄ ຂຶ້ນເປັນຜູ້ຮັກສາການຫົວໜ້າຫ້ອງການກະຊວງ ອຄ.
ສ່ວນ ທ່ານ ປະເສີດ ໃຈຫວັງໝັ້ນ ອະດີດຫົວໜ້າກົມຈັດຕັ້ງ ແລະ ພະນັກງານ ກະຊວງ ອຄ ແມ່ນໄດ້ພັກຜ່ອນ – ບຳນານ ອີງຕາມກົດໝາຍວ່າດ້ວຍລັດຖະບານ ແຫ່ງ ສປປ ລາວ.
[ບົດຂ່າວ: ໜັງສືພິມເສດຖະກິດ-ການຄ້າ]
[ພາບ: ສູນສະຖິຕິ ແລະ ຂ່າວສານ]
