ເພື່ອເປັນການເສີມຂະຫຍາຍສາຍການພົວພັນ-ຮ່ວມມື ລະຫວ່າງ ສປປ ລາວ ແລະ ສປປ ເກົາຫລີ ໃຫ້ມີຄວາມແໜ້ນແຝ້ນ ແລະ ຂະຫຍາຍຕົວຍິ່ງຂຶ້ນ, ໃນວັນທີ 22 ຕຸລາ 2015 ທີ່ຜ່ານມາ ທີ່ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມພົບປະ ລະຫວ່າງ ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ແລະ ທ່ານລັດຖະມົນຕີວ່າການກະຊວງພົວພັນເສດຖະກິດກັບຕ່າງປະເທດ. ກອງປະຊຸມພົບປະໃນຄັ້ງນີ້ໂດຍການເປັນປະທານຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກໍາ ແລະ ການຄ້າ ແລະ ທ່ານ ຣີ ຢອງນາມ ລັດຖະມົນຕີວ່າການກະຊວງພົວພັນເສດຖະກິດກັບຕ່າງປະເທດ ສປປ ເກົາຫລີ. ຜູ້ແທນຝ່າຍລາວເຂົ້າຮ່ວມກອງປະຊຸມປະກອບມີ ທ່ານ ສຽວສະຫວາດ ສະແຫວງສຶກສາ ລັດຖະມົນຕີຊ່ວຍວ່າການກະຊວງອຸດສາຫະກໍາ ແລະ ການຄ້າ ປະທານຄະນະກໍາມະທິການຮ່ວມມືດ້ານເສດຖະກິດ, ການຄ້າ, ວິທະຍາສາດ, ເຕັກໂນໂລຊີ ຝ່າຍ ສປປ ລາວ, ມີບັນດາຫົວໜ້າກົມ, ຮອງຫົວໜ້າກົມ, ພະນັກງານວິຊາການ ທີ່ກ່ຽວຂ້ອງຈາກກະຊວງອຸດສາຫະກໍາ ແລະ ການຄ້າ, ກະຊວງພະລັງງານ ແລະ ບໍ່ແຮ່, ກະຊວງແຜນການ ແລະ ການລົງທຶນ, ກະຊວງການຕ່າງປະເທດ, ກະຊວງກະສິກໍາ ແລະ ປ່າໄມ້, ກະຊວງໂຍທາທິການ ແລະ ຂົນສົ່ງ, ກະຊວງວິທະຍາສາດ ແລະ ເຕັກໂນໂລຊີ, ລັດວິສາຫະກິດນ້ຳມັນເຊື້ອໄຟລາວ ແລະ ສະພາການຄ້າ ແລະ ອຸດສາຫະກໍາແຫ່ງຊາດ.
ຜູ້ແທນຝ່າຍ ສປປ ເກົາຫລີ ປະກອບມີ ທ່ານ ລີ ຊານ ກຸນ ເອກອັກຄະລັດຖະທູດ ສປປ ເກົາຫລີ ປະຈຳ ສປປ ລາວ, ທ່ານ ຄິມ ຊອງກຸນ ລັດຖະມົນຕີຊ່ວຍວ່າການກະຊວງອຸດສາຫະກໍາບໍ່ແຮ່ ພ້ອມດ້ວຍຄະນະ ລວມທັງໝົດ 21 ທ່ານ.
ຈຸດປະສົງ ຂອງການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະທ່ານລັດຖະມົນຕີວ່າການກະຊວງພົວພັນເສດຖະກິດກັບຕ່າງປະເທດຂອງ ສປປ ເກົາຫຼີ ຄັ້ງນີ້ ແມ່ນເພື່ອແລກປ່ຽນ ແລະ ປຶກສາຫາລື ກ່ຽວກັບ ຊຸກຍູ້ສົ່ງເສີມການຣ່ວມມື ທາງດ້ານການຄ້າ, ວິທະຍາສາດ ແລະ ເຕັກໂນໂລຊີ ລະຫວ່າງ ສປປ ລາວ ແລະ ສປປ ເກົາຫລີ ໃຫ້ປະກົດຜົນເປັນຈິງ. ການພົບປະໃນຄັ້ງນີ້ ທັງສອງຝ່າຍຍັງໄດ້ນຳສະເໜີ ກ່ຽວກັບ ນະໂຍບາຍການລົງທຶນຕ່າງປະເທດ ຢູ່ ສປປ ລາວ ແລະ ສະເໜີບົດດ້ານວິຊາການ ກ່ຽວກັບ ເຕັກນິກການໝູນໃຊ້ຖ່ານຫີນ ປະເພດລິກໄນ ໃນການຜະລິດພະລັງງານໄຟຟ້າ ຂອງ ສປປ ເກົາຫລີ. ນອກນີ້ ກໍ່ໄດ້ມີການປຶກສາຫາລືການຮ່ວມ ກັບບັນດາຂະແໜງການທີ່ກ່ຽວຂ້ອງ ເປັນຕົ້ນ: ການຮ່ວມມືທາງດ້ານການບິນພົນລະເຮືອນ; ສັນຍາການຮ່ວມມືດ້ານວິທະຍາສາດ ແລະ ເຕັກໂນໂລຊີ; ການຮ່ວມມືທາງດ້ານກະສິກຳ ແລະ ດ້ານວິທະຍາສາດ ແລະ ເຕັກໂນໂລຊີໃນຂະແໜງກະສິກຳ; ການຮ່ວມມືດ້ານການຂຸດຄົ້ນບໍ່ແຮ່ ແລະ ຖ່ານຫີນ (ໂດຍສະເພາະການຮ່ວມມືດ້ານການໝູນໃຊ້ຖ່ານຫີນປະເພດລິກໄນ ໃນການຜະລິດພະລັງງານໄຟຟ້າ.
ນອກຈາກນີ້ ຄະນະຝ່າຍ ສປປ ເກົາຫລີ ຍັງໄດ້ເຂົ້າຢ້ຽມຂໍ່ານັບ ພະນະທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ແຫ່ງ ສປປ ລາວ; ທ່ານລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ.
ໃນວັນທີ 23 ຕຸລາ 2015 ທ່ານລັດຖະມົນຕີວ່າການ ຂອງ ສປປ ລາວ ແລະ ສປປ ເກົາຫລີ ກໍ່ໄດ້ເຊັນບົດບັນທຶກ ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ເພື່ອເປັນການຕິດຕາມ ແລະ ຊຸກຍູ້ການຈັດຕັ້ງປະຕິບັດວຽກງານ ທີ່ ສປປ ລາວ ແລະ ສປປ ເກົາຫລີ ກໍ່ຄືສັນຍາການຮ່ວມມື ຂອງສອງປະເທດໃຫ້ເກີດດອກອອກຜົນຍິ່ງໆຂຶ້ນ.
[ພາບ ແລະ ຂ່າວ: ສູນສະຖິຕິ ແລະ ຂ່າວສານ, ກະຊວງອຸດສາຫະກຳ ແລະ ການຄ້າ]
