ໃນວັນທີ 4 ກຸມພາ ຂອງອາທິດທີ່ຜ່ານມາ ຢູ່ກະຊວງອຸດສາຫະກຳ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ (ອຄ) ໄດ້ໃຫ້ກຽດຕ້ອນຮັບ ແລະ ພົບປະກັບ ທ່ານ ເລ ເລື່ອງ ມິນ ເລຂາທິການໃຫຍ່ອາຊຽນ ພ້ອມຄະນະໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນ ໃນປີ 2016.
ໃນໂອກາດນີ້, ທ່ານ ນາງ ເຂັມມະນີ ພົນເສນາ ກໍ່ໄດ້ສະແດງຄວາມຂອບໃຈ ສຳລັບການຊ່ວຍເຫຼືອອັນຕໍ່ເນື່ອງຂອງກອງເລຂາອາຊຽນ ຕໍ່ບັນດາປະເທດສະມາຊິກອາຊຽນ ທັງດ້ານເນື້ອໃນ ແລະ ການປະສານງານລະຫວ່າງອົງກອນ ຫຼື ກົນໄກຕ່າງໆຂອງອາຊຽນ ລວມທັງການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນການເປັນປະທານອາຊຽນ ຄັ້ງທຳອິດໃນປີ 2004 – 2005 ແລະ ທັງຊົມເຊີຍຕໍ່ການຈັດຕັ້ງປະຕິບັດໜ້າທີ່ອັນສຳຄັນຂອງກອງເລຂາອາຊຽນໃນຂະບວນການສ້າງປະຊາຄົມອາຊຽນ ໂດຍສະເພາະການຈັດຕັ້ງປະຕິບັດແຜນການສຳລັບສ້າງປະຊາຄົມອາຊຽນ 2009 – 2015.
ນອກນັ້ນ ທ່ານ ລັດຖະມົນຕີວ່າການ ຍັງໄດ້ຢຳ້ເຖິງຄວາມສຳຄັນຂອງການເປັນປະທານອາຊຽນຂອງ ສປປ ລາວ ໃນປີ 2016 ເຊິ່ງເປັນປີທີ່ອາຊຽນກາຍເປັນປະຊາຄົມອາຊຽນ ແລະ ທັງເປັນປີເລີ່ມຕົ້ນຂອງການຈັດຕັ້ງປະຕິບັດວິໄສທັດ ປະຊາຄົມອາຊຽນ 2025 ແລະ ແຜນແມ່ບົດສຳລັບເສົາຄ້ຳປະຊາຄົມອາຊຽນ ແລະ ຝ່າຍລາວເຮົາຍັງໄດ້ແຈ້ງບຸລິມະສິດ ສຳລັບການເປັນປະທານອາຊຽນຂອງ ສປປ ລາວ ໂດຍຈະເສີມຂະຫຍາຍຜົນສຳເລັດທີ່ອາຊຽນສາມາດຍາດມາໄດ້ ໃນເດືອນ 5 ທົດສະວັດທີ່ຜ່ານມາ ແລະ ຈັດຕັ້ງປະຕິບັດວິໄສທັດ ປະຊາຄົມອາຊຽນ ໃຫ້ມີປະສິດທິພາບຕາມຄຳຂວັນ “ຫັນວິໄສທັດໃຫ້ເປັນຮູບປະທຳເພື່ອຄວາມເຂັ້ມແຂງຂອງປະຊາຄົມອາຊຽນ” ສຳລັບການເປັນປະທານອາຊຽນຂອງ ສປປ ລາວ ໃນປີ 2016.
ໃນໂອການດຽວກັນ, ພະນະທານເລຂາທິການໃຫຍ່ອາຊຽນ ກໍ່ໄດ້ສະແດງຄວາມຊົມເຊີຍ ຕໍ່ການຮັບກຽດເປັນປະທານອາຊຽນຂອງ ສປປ ລາວ ຄັ້ງທີ 2 ເຊິ່ງເປັນປີທີ່ມີຄວາມໝາຍຄວາມສຳຄັນ ແລະ ສັບອາຊຽນ ແລະ ຢັ້ງຢືນວ່າ ກອງເລຂາອາຊຽນກຽມພ້ອມໃຫ້ການສະໜັບສະໜູນ ແລະ ການຊ່ວຍເຫຼືອການເປັນປະທານອາຊຽນ ຂອງ ສປປ ລາວ ເພື່ອຜົນສຳເລັດອັນຍິ່ງໃຫຍ່ກວ່າເກົ່າຂອງອາຊຽນ ໃນປີ 2016 ແລະ ໃນຊຸມປີຕໍ່ໜ້າ.
[ພາບ ແລະ ບົດຂ່າວ: ສູນສະຖິຕິ ແລະ ຂ່າວສານ]
