ໃນວັນທີ 17 ພຶດສະພາ 2016 ທີ່ຜານມາ. ກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ ແລະ ໂຄງການ GIZ ໄດ້ຮ່ວມກັນຈັດກອງປະຊຸມ ທົບທວນຄືນ ໂຄງການ ເຊື່ອມໂຍງເສດຖະກິດຂອງ ສປປ ລາວ ເພື່ອພັດທະນາດ້ານເສດຖະກິດ ແລະ ການຄ້າ (RELATED Project) ແລະ ປຶກສາຫາລືກ່ຽວກັບ ຂໍ້ລິເລີ່ມຂອງໂຄງການ ການເຊື່ອມໂຍງພາຍໃຕ້ຂອບຕະຫຼາດ ແລະ ຖານຜະລິດໜຶ່ງດຽວໃນອາຊຽນ (IAI) ພາຍໃຕ້ການຊ່ວຍເຫຼືອຂອງ ປະເທດເຢຍລະມັນ. ກອງປະຊຸມດັ່ງກ່າວຈັດຂື້ນທີ່ ໂຮງແຮມເມີກຽວ, ນະຄອນຫຼວງວຽງຈັນ ໂດຍການເປັນປະທານຂອງທ່ານ ສີລິສຳພັນ ວໍຣະຈິດ ຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ແລະ ປະທານຮ່ວມໂດຍທ່ານ Ernst Hustaedt, ຜູ້ອຳນວຍການ ໂຄງການ GIZ ປະຈຳລາວ ແລະ ມີຜູ້ເຂົ້າຮ່ວມຈາກຕົວແທນບັນດາຄູ່ຮ່ວມພັດທະນາ ແລະ ພາກສ່ວນຈັດຕັ້ງປະຕິບັດໂຄງການຂອງໂຄງການ RELATED ແລະ IAI ຈຳນວນ 47 ທ່ານ.
ກອງປະຊຸມໃນຄັ້ງນີ້ໄດ້ດຳເນີນໄປເປັນເວລາເຄິ່ງມື້ ໂດຍໄດ້ພ້ອມກັນທົບທວນຄືນ ແລະ ປຶກສາຫາລື ບັນດາຄວາມຄືບໜ້າຂອງການຈັດຕັ້ງປະຕິບັດໂຄງການ RELATED ຕະຫຼອດໄລຍະເວລາ 6 ເດືອນ ທີ່ຜ່ານມາ ແລະ ຍັງໄດ້ປຶກສາຫາລື ກ່ຽວກັບບັນດາສິ່ງຈຳເປັນໃນການປັບປຸງສຳລັບແຜນວຽກ ປະຈຳສົກປີ 2015-2016 ກ່ອນສົ່ງໃຫ້ຄະນະກຳມະການ ຊີ້ນຳແຜນງານຈັດຕັ້ງປະຕິບັດໂຄງການ (Programm Executive Committee) ເພື່ອພິຈາລະນາ ແລະ ຮັບຮອງ.
ນອກນັ້ນ, ກອງປະຊຸມຍັງໄດ້ນຳສະເໜີ ແລະ ພ້ອມກັນປຶກສາຫາລື ກ່ຽວກັບຂອບເຂດ ຂອງໂຄງການຊ່ວຍເຫຼືອໃໝ່ ພາຍໃຕ້ໂຄງການ ຮ່ວມມືຂອງເຢຍລະມັນ ແລະ ອາຊຽນ ໃນການໃຫ້ການຊ່ວຍເຫຼືອການເຊື່ອມໂຍງເຂົ້າອາຊຽນຂອງບັນດາປະເທດ CLMV ຫຼື ເອີ້ນວ່າ ໂຄງການ IAI.
ໃນບົດກ່າວເປີດຂອງທ່ານ ສີລິສຳພັນ ວໍຣະຈິດ ໄດ້ເນັ້ນໃຫ້ເຫັນວ່າ “ໂຄງການນີ້ ແມ່ນໂຄງການໜຶ່ງທີ່ໄດ້ເຮັດວຽກຢ່າງໃກ້ຊິດກັບພາກລັດ ແລະ ເອກະຊົນ ແນໃສ່ໃນການໃຫ້ການຊ່ວຍເຫຼືອດ້ານວິຊາການທີ່ມີເປົ້າໝາຍ ແລະ ສ່ວນຕົວແລ້ວ ຂ້າພະເຈົ້າເຫັນວ່າ ນີ້ເປັນໂອກາດອັນດີ ສຳລັບການເຮັດວຽກຮ່ວມກັນລະຫວ່າງ ໂຄງການ RELATED ແລະ ໂຄງການອື່ນໆ ທີ່ສະໜັບສະໜູນ ແກ່ການພັດທະນາຂະແໜງການຄ້າ ແລະ ພາກເອກະຊົນຂອງພວກເຮົາ”.
ທ່ານ Ernst Hustaedt, ຜູ້ອຳນວຍການ ໂຄງການ GIZ ປະຈຳລາວ ກໍ່ໄດ້ກ່າວ ວ່າ ພາຍຫຼັງ ສອງປີ ໃນການຈັດຕັ້ງປະຕິບັດໂຄງການ RELATED ແລະ ກະກຽມຈະເລີ່ມຈັດຕັ້ງປະຕິບັດໂຄງການ IAI, ກອງປະຊຸມມື້ນີ້ ຈິ່ງເປັນໂອກາດອັນມີຄຸນຄ່າທີ່ສຸດ ເພື່ອປຶກສາຫາລືບັນດາຄວາມຄືບໜ້າ, ສິ່ງທ້າທາຍ ແລະ ບັນດາແນວຄວາມຄິດ ສຳລັບການເຊື່ອມໂຍງເຂົ້າອາຊ່ຽນຂອງ ສປປ ລາວ ໃນອະນາຄົດ. ຂ້າພະເຈົ້າຫວັງຢ່າງຍິ່ງວ່າ ພວກເຮົາ ຈະໄດ້ພ້ອມກັນ ສຸມໃສ່ ການປຶກສາກາລື ວ່າຈະເຮັດແນວໃດ ເພື່ອໃຫ້ໂຄງການ RELATED ແລະ ໂຄງການ IAI ສາມາດປະກອບສ່ວນແກ່ຜົນສຳເລັດຂອງ ສປປ ລາວ ໃນເວທີ AEC ໄດ້ຫຼາຍຂື້ນກ່ວາເກົ່າ”.
ໂຄງການ ເຊື່ອມໂຍງເສດຖະກິດຂອງ ສປປ ລາວ ເພື່ອພັດທະນາດ້ານເສດຖະກິດ ແລະ ການຄ້າ (RELATED) ມີໄລຍະເວລາ 3ປີ (2014-2017) ເຊິ່ງມີມູນຄ່າ 6.4 ລ້ານ ຢູໂຣ.
[ກົມແຜນການ ແລະ ການຮ່ວມມື, ກະຊວງ ອຄ]
