ກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 48 ໄດ້ເປີດຂຶ້ນຢ່າງເປັນທາງການໃນຕອນເຊົ້າຂອງວັນທີ 03 ສິງຫາ 2016 ທີ່ຜ່ານມາ, ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ເຊິ່ງມີບັນດາລັດຖະມົນຕີເສດຖະກິດອາຊຽນຈາກ 10 ປະເທດອາຊຽນ ແລະ ກອງເລຂາອາຊຽນ ເຂົ້າຮ່ວມ ເຊິ່ງເປັນກຽດກ່າວເປີດກອງປະຊຸມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ.
ທ່ານ ທອງລຸນ ສີສຸລິດ ໄດ້ກ່າວວ່າ: ໃນໄລຍະຜ່ານມາ ອາຊຽນໄດ້ປະສົບຜົນສຳເລັດຫຼາຍດ້ານ ໂດຍສະເພາະອັນພົ້ນເດັ່ນແມ່ນພວກເຮົາສາມາດຮັກສາໄດ້ສະຖຽນລະພາບທາງດ້ານເສດຖະກິດ, ເຮັດໃຫ້ເສດຖະກິດມີການເຕີບໂຕຢ່າງໝັ້ນທ່ຽງ ແລະ ຕໍ່ເນື່ອງ. ບໍລິມາດການຄ້າ, ການລົງທຶນ ແລະ ການທ່ອງທ່ຽວຂອງອາຊຽນ ແມ່ນມີທ່າອ່ຽງເພີ່ມຂຶ້ນໃນແຕ່ລະປີ. ສິ່ງສຳຄັນຕົ້ນຕໍ່ແມ່ນການປະກາດສ້າງຕັ້ງປະຊາຄົມເສດຖະກິດອາຊຽນ ໃນທ້າຍປີ 2015, ເຊິ່ງໄດ້ກາຍເປັນນິມິດໝາຍທາງປະຫວັດສາດທີ່ສຳຄັນຂອງອາຊຽນ ໃນການບັນລຸເປົ້າໝາຍ 2015 ຂອງຕົນ ເຮັດໃຫ້ອາຊຽນກາຍເປັນພາກພື້ນທີ່ມີຕະຫຼາດ ແລະ ຖານການຜະລິດໜຶ່ງດຽວ, ມີການເຄື່ອນຍ້າຍສິນຄ້າ, ບໍລິການ ແລະ ແຮງງານຢ່າງເສລີໃນພາກພື້ນ. ພ້ອມດຽວກັນນັ້ນ, ກໍ່ໄດ້ສ້າງໃຫ້ອາຊຽນກາຍເປັນພາກພື້ນທີ່ມີຄວາມອາດສາມາດດ້ານການແຂ່ງຂັນສູງ ແລະ ສາມາດເຊື່ອມໂຍງເສດຖະກິດເຂົ້າກັບພາກພື້ນອື່ນໆຢ່າງກວ້າງຂວາງ, ເຮັດໃຫ້ອາຊຽນກາຍເປັນພາກພື້ນທີ່ມີການເຄື່ອນໄຫວບົນພື້ນຖານຫຼັການ ແລະ ລະບຽບການ ທີ່ນັບມື້ນັບມີຄວາມສອດຄ່ອງກົມກຽວກັນ.
ໄປຄຽງຄູ່ກັບຜົນສຳເລັດດັ່ງກ່າວ ອາຊຽນຍັງຈະໄດ້ສືບຕໍ່ເອົາໃຈໃສ່ຈັດຕັ້ງປະຕິບັດບາງແຜນວຽກທີ່ປະຕິບັດບໍ່ທັນສຳເລັດຕາມທີ່ໄດ້ກຳນົດໄວ້ໃນແຜນແມ່ບົດປະຊາຄົມເສດຖະກິດອາຊຽນ 2015 ເພື່ອເຮັດແນວໃດໃຫ້ໄດ້ຮັບການຈັດຕັ້ງປະຕິບັດໃຫ້ສຳເລັດຕາມເປົ້າໝາຍທີ່ວາງໄວ້. ໂດຍສະເພາະຈະໄດ້ສືບຕໍ່ສຸມໃສ່ການເຈລະຈາເປີດຂະແໜງການການບໍລິການໃຫ້ຄົບຕາມຈຳນວນທີ່ໄດ້ກຳນົດໄວ້ຢູ່ໃນສັນຍາການຄ້າດ້ານການບໍລິການອາຊຽນ ໃຫ້ຄວາມສອດຄ່ອງກັບສະພາບຄວາມເປັນຈິງໃນປັດຈຸບັນ. ໃນດ້ານການຄ້າ, ອາຊຽນ ຕ້ອງໄດ້ສຸມໃສ່ບັນຫາທີ່ຕິດພັນກັບການອຳນວຍຄວາມສະດວກທາງດ້ານການຄ້າ ໂດຍສະເພາະບັນຫາສິ່ງກີດຂວາງທີ່ບໍ່ແມ່ນອັດຕາພາສີ, ຂັ້ນຕອນການແຈ້ງພາສີ ແລະ ການສ້າງລະບຽບການພາຍໃນທີ່ບໍ່ເອື້ອອຳນວຍຕໍ່ການຄ້າ. ສຳລັບວຽກການລົງທຶນ, ອາຊຽນ ຕ້ອງໄດ້ສືບຕໍ່ເພີ່ມທະວີການປັງປຸງບັນດາລະບຽບການ, ກົນໄກ ແລະ ຂັ້ນຕອນຕ່າງໆ ເພື່ອສ້າງສິ່ງແວດລ້ອມທີ່ເອື້ອອຳນວຍໃຫ້ແກ່ການລົງທຶນ ແລະ ເຮັດໃຫ້ອາຊຽນເປັນຈຸດໝາຍປາຍທາງດຽວກັນຂອງການລົງທຶນ, “ ທ່ານ ທອງລຸນ ສີສຸລິດ ກ່າວ ”.
ທ່ານນາຍົກລັດຖະມົນຕີຍັງເນັ້ນຕໍ່ທີ່ປະຊຸມໃຫ້ເອົາໃຈໃສ່ປຶກສາຫາລື 7 ບັນຫາສຳຄັນຄື:
1. ຮັບປະກັນການຈັດຕັ້ງປະຕິບັດແຜນງານ 2025 ໃຫ້ປາກົດຜົນເປັນຈິງໂດຍມີການກຳນົດກົນໄກ, ແຜນວຽກລະອຽດ, ລະບົດການປະສານງານ ແລະ ການຕິດຕາມປະເມີນຜົນຢ່າງເປັນລະບົບ.
2. ສືບຕໍ່ສ້າງສິ່ງແວດລ້ອມທີ່ອຳນວຍໃຫ້ແກ່ການຄ້າ ແລະ ການດຳເນີນທຸລະກິດໃນອາຊຽນ ໂດຍສະເພາະແມ່ນຫຼຸດຜ່ອນ ແລະ ກ້າວໄປເຖິງລົບລ້າງບັນດາສິ່ງກີດຂວາງຕ່າງໆ ແນໃສ່ເພື່ອຮັບປະກັນເຮັດໃຫ້ການດຳເນີນທຸລະກິດໃນອາຊຽນມີຄວາມສະດວກ ແລະ ມີຕົ້ນທຶກຕ່ຳລົງ.
3. ຢຶດໝັ້ນຫຼັກການຄວາມເປັນເອກະສັນຂອງອາຊຽນ ແລະ ຮັບປະກັນເປັນໃຈກາງຂອງອາຊຽນ ຂອງການຮ່ວມມືດ້ານເສດຖະກິດ ກັບບັນດາຄູ່ເຈລະຈາອື່ນໆ.
4. ຮັບປະກັນການສ້າງຕັ້ງຜັນຂະຫຍາຍເນື້ອໃນຄຳຂວັນ “ ຫັນວິໄສທັດໃຫ້ເປັນຮູບປະທຳເພື່ອຄວາມເຂັ້ນແຂງຂອງອາຊຽນ ” ໂດຍສະເພາະແມ່ນການຜັນຂະຫຍາຍ ແລະ ຈັດຕັ້ງປະຕິບັດ 8 ແຜນງານບຸລິມະສິດຂອງເສົາຄ້ຳເສດຖະກິດທີ່ຈະຖືກຮັບຮອງເອົາໃນກອງປະຊຸມສຸດຍອດ ຄັ້ງທີ 28 ຕົ້ນເດືອນກັນຍາ 2016 ທີ່ຈະມາເຖິງນີ້.
5. ສືບຕໍ່ເອົາໃຈໃສ່ຢ່າງຈິງຈັງໃນການຮັດແຄບຄວາມແຕກໂຕນກັນດ້ານການພັດທະນາລະຫວ່າງອາຊຽນດ້ວຍກັນ ເພື່ອຮັບປະກັນໃຫ້ມີການພັດທະນາທີ່ສະເໝີພາບ ແລະ ເທົ່າທຽມກັນໃນອາຊຽນ.
6. ຮັບປະກັນຜົນປະໂຫຍດໃຫ້ແກ່ພາກທຸລະກິດຂອງອາຊຽນ ຈາກການເຂົ້າຮ່ວມເຂດການຄ້າເສລີ ແລະ ຫວ່າງອາຊຽນ ແລະ ບັນດາຄູ່ເຈລະຈາ ໂດຍສະເພາະຄຳນຶງເຖິງຄວາມຮຽກຮ້ອງຕ້ອງການ ແລະ ຄວາມອາສາມາດຂອງພາກທຸລະກິດ.
7. ຮັບປະກັນການເຂົ້າຮ່ວມຢ່າງຫ້າວຫັນ ແລະ ຢ່າງເປັນເຈົ້າການຂອງພາກທຸລະກິດໃນການຈັດຕັ້ງປະຕິບັດແຜນປະຊາຄົມເສດຖະກິດອາຊຽນ 2025.
ທ່ານ ນາງ ເຂັມມະນີ ພົນເສນາ ໄດ້ກ່າວວ່າ: ສຳລັບກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 48 ຈະໄດ້ປຶກສາຫາລືຫຼາຍປະເດັນສຳຄັນຄື: ບັນດາແຜນງານບຸລິມະສິດຂອງເສົາຄ້ຳເສດຖະກິດທີ່ໄດ້ສະເໜີໂດຍ ສປປ ລາວ ໃນໄລຍະເວລາ ສປປ ລາວ ເປັນເຈົ້າພາບອາຊຽນ ໂດຍສະເພາະແມ່ນໄດ້ກຳນົດ 8 ແຜນງານບຸລິມະສິດຄື: 1. ຂອບວຽກການອຳນວຍຄວາມສະດວກທາງດ້ານການຄ້າຂອງອາຊຽນ, 2. ຂອບວຽກທີ່ສອດຄ່ອງກັນຂອງອາຊຽນວ່າດ້ວຍຄວາມປອດໄພທາງດ້ານອາຫານ, 3. ຂອບວຽກຂອງອາຊຽນກ່ຽວກັບການເຂົ້າເຖິງແຫຼ່ງທຶນສຳລັບທຸລະກິດຂະໜາດນ້ອຍ ແລະ ກາງ, 4. ສະພາບແວດລ້ອມທີ່ອຳນວຍໃຫ້ແກ່ການສ້າງຕັ້ງ ແລະ ພັດທະນາວິສາຫະກຳຂະໜາດນ້ອຍ ແລະ ກາງ, 5. ຖະແຫຼງການປາກເຊກ່ຽວກັບການທ່ອງທ່ຽວສີຂຽວ, 6. ລາງວັນດ້ານການທ່ອງທ່ຽວແບບຍືນຍົງອາຊຽນ, 7. ແນວທາງນະໂຍບາຍສຳຄັນສຳລັບການພັດທະນາ ແລະ ການຮ່ວມມືໃນເຂດເສດຖະກິດພິເສດ, 8. ແຜນແມ່ບົດກ່ຽວກັບການພັດທະນາຂອງປະເທດ CLMV.
[ສູນສະຖິຕິ ແລະ ຂ່າວສານ]
