ໃນຕອນເຊົ້າເວລາ 8:00 ໂມງ ຂອງວັນທີ 19 ທັນວາ 2016 ທີ່ຫ້ອງປະຊຸມໃຫຍ່ ຂອງກະຊວງອຸດສາຫະກໍາ ແລະ ການຄ້າ ກົມກວດກາ ໄດ້ເປີດບັ້ນດໍາເນີນກອງປະຊຸມກ່ຽວກັບການຜັນຂະຫຍາຍເນື້ອໃນກອງປະຊຸມວຽກກວດກາທົ່ວປະເທດຄັ້ງທີ 3 ແລະ ສະຫລຸບຕີລາຄາການເຄື່ອນໄຫວວຽກງານກວດກາຂອງກະຊວງອຸດສາຫະກໍາ ແລະ ການຄ້າ 5 ປີ ໃນຕໍ່ຫນ້າ ປີ 2016-2020 ຂື້ນ ໂດຍການ ເປັນປະທານ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ມີ ທ່ານ ດາວບົວລະພາ ບາວົງເພັດ ຮອງປະທານອົງການກວດກາລັດຖະບານ, ແລະ ມີຮອງລັດຖະມົນຕີ, ຫົວຫນ້າກົມ, ຮອງກົມ ຕາງຫນ້າລັດວິສາຫະກິດ,ສະພາການຄ້າ ແລະ ອຸດສາຫະກໍາແຫ່ງຊາດເຂົ້າຮ່ວມ.
ລັດຖະມົນຕີກະຊວງອຸດສາຫະກໍາ ແລະ ການຄ້າໄດ້ກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນສະຫລຸບຕີລາຄາການເຄື່ອນໄຫວວຽກງານຕິດຕາມກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫລວງ, ຄົ້ນຄວ້າຄໍາຮ້ອງ-ຄໍາສະເໜີຕ່າງໆ ໃນ 5 ປີຜ່ານມາ, ໂດຍສົມທຽບໃສ່ທິດທາງຄາດຫມາຍກອງປະຊຸມໃຫຍ່ຄັ້ງທີ X ຂອງພັກ, ກອງປະຊຸມໃຫຍ່ອົງຄະນະພັກກະຊວງ ກໍ່ຄືກອງປະຊຸມໃຫຍ່ຂັ້ນຕົນວາງອອກ ພ້ອມກັນຕີລາຄາ ແລະ ເບິ່ງລົງເລິກໃນການຄົ້ນຄວ້າ ແລະ ຈັດຕັ້ງປະຕິບັດມະຕິ, ຄໍາສັ່ງ, ກົດຫມາຍ ແລະ ລະບຽບການຕ່າງໆຂອງລັດຜ່ານມາ. ພ້ອມກັນນັ້ນ ທ່ານ ພັນ ວິໄລສົມ ຫົວໜ້າກົມກວດກາ ກະຊວງອຸດສາຫະກໍາ ແລະ ການຄ້າ ຍັງໄດ້ຂື້ນລາຍງານສະຫລຸບຕີລາຄາການເຄື່ອນໄຫວວຽກງານໃນ 5 ປີຜ່ານມາເຫັນວ່າບັນດາອົງການ ລັດ ແຕ່ລະຂັ້ນ ຂອງຂະແໜງອຸດສາຫະກໍາ ແລະ ການຄ້າ ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃນແຕ່ລະສົກປີໄດ້ຕາມຄາດຫມາຍ ໂດຍສະເພາະວຽກງານການຄ້າພາຍໃນ ໄດ້ເອົາໃຈໃສ່ຄຸ້ມຄອງລາຄາສິນຄ້າທີ່ກະທົບໄວໃຫ້ຢູ່ໃນເກນປົກກະຕິ ບໍ່ໃຫ້ມີການເໜັງຕີງແຮງ ຈົນເກີນໄປເພື່ອປົກປ້ອງຜູ້ຊົມໃຊ້ ແລະ ສົ່ງເສີມການແຂ່ງຂັນດໍາເນີນທຸລະກິດການຄ້າທີ່ຖືກຕ້ອງເປັນທໍາໂດຍສະເພາະຢູ່ບັນດາເມືອງສາມສ້າງ ແລະ ຫລາຍໆບ່ອນກໍ່ໄດ້ຈັດຕັ້ງກຸ່ມການຜະລິດ ແລະ ກຸ່ມເກັບຊື້ສິນຄ້າກະສິກໍາ-ຫັດຖະກໍາຢູ່ແຂວງຕ່າງໆຢ່າງຖືກຕ້ອງ, ໃນ 5 ປີຜ່ານມາໄດ້ກວດພົບການລະເມີດລະບຽບການຄ້າເຊັ່ນ: ການຄ້າສິນຄ້ານອກລະບົບ ແລະ ການດໍາເນີນທຸລະກິດທີ່ບໍ່ມີທະບຽນມີທັງຫມົດ 1,537 ກໍລະນີ ຄິດເປັນເງິນ ປະມານ 17.6 ຕື້ກີບ. ໃນນັ້ນວຽກງານການກວດກາ ສະກັດກັ້ນ ແລະ ຕ້ານການສໍ້ລາດບັງຫລວງໃນ5 ປີຜ່ານມາ ຄະນະກວດກາແຕ່ລະຂັ້ນໄດ້ເອົາໃຈໃສ່ຕໍ່ການເຄື່ອນໄຫວວຽກງານດັ່ງກ່າວຕາມພາລະບົດບາດ, ຂອບເຂດສິດຫນ້າທີ່ຂອງຕົນ ຕາມແຜນກວດກາປົກກະຕິແຕ່ລະຄັ້ງ ແລະ ຕາມການຕົກລົງ ຫລື ຄໍາສັ່ງແຈ້ງການຕ່າງໆ.
ນອກນີ້ໃນກອງປະຊຸມແມ່ນໄດ້ຮັບຟັງການລາຍງານບົດສະຫລຸບຕີລາຄາການເຄື່ອນໄຫວວຽກງານກວດກາຂອງກະຊວງອຸດສາຫະກໍາ ແລະ ການຄ້າ ໃນ 5 ປີ 2011-2016 ແລະ ທິດທາງ 5 ປີ 2017-2020 ພ້ອມທັງຮັບຟັງການເຜີຍແຜ່ບົດຂັດຈ້ອນການເຄື່ອນໄຫວວຽກງານກວດກາປີ 2011-2015 ແລະ ທິດາທາງ 2016 – 2020 ຂອງຄະນະກວດກາສູນກາງພັກ, ຮັບຟັງການເຜີຍແຜ່ ໂອ້ລົມຂອງເລຂາທິການໃຫຍ່ ຄະນະບໍລິຫານງານສູນກາງພັກຕໍ່ກອງປະຊຸມວຽກງານກວດກາທົ່ວປະເທດຄັ້ງທີ 3 .
[ສູນສະຖິຕິ ແລະ ຂໍ້ມູນຂ່າວສານ]
